回到過去，破我未婚妻個處: （35）

短鐵棍、假血，紋身/刀疤貼紙，呢啲都揾齊曬，入夜後就請曬我一班同學嚟我屋企，我詳細咁對佢地講解我嘅計劃。

「...Veronica會經過一條巷仔，呢個時候阿輝、阿德、森仔同馬騮你地就前後包抄，我作殿後，高佬威你就睇水，到時只要見到對方拎把𠝹刀出嚟，馬騮你就立即撲埋去…」

「等陣，點解係我撲埋去？」馬騮舉手問。

「因為你最瘦，入面墊住個血袋再加個護墊都唔覺眼呀嘛。」

解釋完我繼續講：「跟住馬騮你訓低，然後我就會擺出好惡嘅樣，指控佢殺左我條𡃁，再恐嚇佢同我上床，唔肯嘅話就嚇佢話要報警，其他人就喺隔離幫手一齊兇佢，咁以上就係大致嘅流程，你地有無問題？」



森仔舉手提問：「我有，點解我地要幫你？」

「你地只要肯幫手，事成之後每人俾五百蚊報酬。」我都知要叫得郁人唔係咁易，所以帶左幾千蚊現金利誘佢地。

「你地點睇？」森仔細細聲問其他人。

「古人有言，勿以惡小而為之，扮黑社會兇人點講都好似唔係幾好。」高佬威話。

「我就覺得條橋有啲唔通，話曬我地係扮黑社會，黑社會報警好似講唔通。」阿德提出疑問。



「通！點會唔通，黑社會同差佬好friend架嘛，有咩事都係揾差佬幫手。」我回答話。

「係咪真係每人俾五百蚊先？」馬騮問。

「梗係啦，呃你乜都得。」

佢地幾個圍埋商量左一陣後，決定就幫我一次。

「見你係阿輝堂大佬，算啦，我地做好人就幫你一次咁大把。」森仔對我講。



「拿，講明先，後日平安夜我地要去石澳bbq，所以六點前就要走架啦。」馬騮提我話。

「無問題！」我將Veronica嘅相print左出嚟派俾佢地，「呢度係今次目標人物嘅相，你地認清佢個樣，聽日上嚟排練一次，後日我地就take action。」

「條女好似都幾大波。」「益曬你啦，有得撲埋去。」「果然係窈窕淑女，君子好求。」「頂！唔好吟詩啦…...」

各人拎完相就紛紛離開。

「你嚟真架？為條女搞場大龍鳳，仲要我地咁多人陪你一齊癲？」十六歲嘅我問。

「呢條女好緊要，破唔到佢處嘅話，我就會無命，我條命你都有份，你都唔想見到『自己』無命架。」

「唔同佢結咪得，何況個咒係真係假都唔知。」

「都無你咁好氣，揸住張相啦，我沖涼先。」我塞張相到佢手中。



同上次一樣，第二朝神咁早，十六歲嘅我就嗌醒我，要我起身讓返個廳出嚟，俾佢同小曼補英文。

「咦，呢個女人係邊個？」

小曼見到茶几上有張Veronica嘅相，應該係我琴日印多左放左喺度。

「呢個人係…」

未等十六歲嘅我解釋，小曼就話：「你平時成日話自己鐘意大波妹，原來係真嘅。」

「哈哈哈，咁好正常啫，係男人都鐘意大波，唔通鐘意你呢啲波平如鏡嘅咩。」

「笑你個死人頭，食屎啦你鐘耀輝！」



小曼嬲嬲地大力搣左十六歲嘅我一下。

「喂你唔好搣啦，好痛呀，快啲教下一題啦...」

我都唔阻住佢地，搭車過黃埔，望下Veronica有無俾Kevin發現佢勾佬。

「Kevin，唔好走，你聽我解釋。」

「我唔要聽你解釋！記住，係我飛你，唔係你飛我！」

一如所料，真係如此。

經過三次穿越我發現，每次穿越我都係返嚟同一條時間線。

照住劇情發展，聽日24號Veronica就會拎刀𠝹手。



而我嘅計劃就會喺佢𠝹手前進行。
 
下晝，我地一班人為聽日嘅計劃而排練。

我約左佢地三點過嚟，等到四點都未齊人，等到齊人，班友又懶懶閒，hea下hea下咁。

「各位大佬，認真啲啦，尤其係你呀馬騮，你呢個角色好重要架，訓落地嗰陣個樣唔好笑笑口咁，邊有人挨左一刀仲咁開心，仲有其他人唔該都俾啲戲，兇狠少少，唔好笑口噬噬。」我十分勞氣。

「得啦，綵排嚟啫，到時認真咪得囉。」馬騮駁我。

「依家唔認真排一次，到時隨時會甩碌。」

「唔好意思，我有啲嘢要做，我想走先。」阿德舉手話。



「哦，咁你走先啦。」我話。

「我都約左人打波，唔練啦。」

「咁我都唔排啦，返屋企溫書好過。」

「綵排左咁耐好攰，我都走。」

馬騮、高佬威、森仔一個接一個話走人。

「唔好走住啦，拍硬擋排多左陣啦…」

班友唔理我，拍拍蘿友就閃人。

見到班友咁唔上心，我真係有啲擔心，求神拜佛聽日一定要順順利利，正所謂事不過三，我已經衰左三次，我唔想再衰第四次。

十六歲嘅我約左小曼，之後連佢走埋，就剩返我一個人喺屋企。