回到過去，破我未婚妻個處: （34）

「先生，你揾邊位？」

「阿叔，我係你個侄鐘耀輝，但就唔係2009年嗰個，我係由未來2021年穿越返嚟。」

「你講乜叉？」

「我知你唔信架啦。」我喺衫袋拎出一架木製嘅火車玩具，「呢架車仔係我五歲生日，你送俾我嘅。」

「喂，你喺邊度撻返嚟？」



「你送俾我架嘛，你望真啲，我真係你個侄，你開門俾我入嚟先，我有緊要嘢同你講。」

阿叔認真打量我俾佢嘅車仔，考慮左一陣，最後選擇開門俾我。

一入門口，我睄到客廳檯面放左一本筆記薄。

阿叔懶係緊張咁收埋本薄，唔知寫緊啲咩唔俾得人睇。

「我信你係阿輝，但你真係從未來嚟嘅？」佢問。



「係呀！我有啲好重要嘅嘢俾你睇。」

我拎電話出嚟，打開之前影低左嘅靈位照俾對方睇。

「咦，呢部咩嚟架？掂一掂個mon，畫面就唔同左嘅？」佢第一眼留意嘅卻係部iPhone。

「呢部係2021年代嘅手提電話，未來嘅電話唔會再有掣㩒，全部都係咁樣嘅touch screen。」我掃兩下個mon，展示俾佢睇。

「幾過癮咁喎。」



「唔好理部電話住，我想俾你睇嘅其實係呢張相。」我開返張相出嚟俾佢睇。

「呢個人咁似我嘅？」

「呢個咪就係你嚟，兩年後你會同Shirley結婚，觸發左家族詛咒，最後喺婚禮上你吐血身亡，呢張就係你張車頭相。」

「唔係呀嘛，你呢啲係咪叫key圖，key我個樣上去就當真？」

「呢張相堅架。」

我都知佢唔會一下子就相信，所以連佢嘅死亡證同埋火葬紙都影低左。

阿叔睇完之後，都係半信半疑：「改圖嚟嘅姐，呃我唔到嘅，我就唔信個詛咒係真。」

「咁你都唔信，我呃你做咩？阿叔你聽我講，你唔能夠同Shirley結婚，最好依家即刻同佢分手。」



「唓~我點會娶Shirley，我同佢都唔係認真嘅。」

頂，又係講呢句。

「既然你都話唔係同佢認真，咁你咪飛左佢溝過第二個，總之千其千其唔好同佢結婚。」

阿叔行左入房，無留心聽我講嘢。

「阿叔，你聽我講啦，我無講大話架！」

「我唔係唔想聽你講，但我的確係唔信個詛咒係真，同埋你又話係我個侄，你應該好了解你阿叔我嘅為人，好似我呢啲浪子，點會上岸呢？」

阿叔喺房拎左工具箱出嚟：「唔好講啦，我準備過隔離樓幫你屋企整水喉，一齊行啦。」



唉...佢果然又硬頸又萌塞，完全唔聽人講嘢，真心無佢符。

睇嚟呢條支線任務係個不可能的任務，唯有將精力focus返主線。

嚟到屋企，十六歲嘅我開門俾我地。

「阿叔，邊個嚟架？」

「佢話自己係未來2021年嘅你。」

我之後又花一番唇舌同十六歲嘅我解釋我嘅身份。

「我穿越返嚟就係為左破未婚妻個處，而我好需要你、阿德、森仔、馬騮同埋高佬威幫手！」

「下？」



「我同你先去買齊要用嘅嘢，然後今晚你幫我約曬阿德佢地出嚟！」

「下？」

「事不宜遲，行啦！」

我揾埋十六歲嘅我幫手，再加埋一班中學同學，合力準備一場大龍鳳，來實行我今次嘅破處計劃。