回到過去，破我未婚妻個處: （24）

「喂！你做咩成隻吊靴鬼咁跟住曬！我依家返屋企，你唔好再跟住嚟！」

「返屋企咪啱，我都係返屋企，都話左你就係我，我就係你，你屋企咪我屋企。」

「頂，你真係好煩！」佢加快腳步想撇甩我。

我就伸手搭住佢膊頭：「喂喂喂！唔好行咁快，我隻腳仲抽抽地……」

筲箕灣耀東邨。



呢度就係我由細住到大嘅地方。

穿越左兩次，今次第三次終於返到屋企。

我入到屋，即刻攤落梳化，啱先同Kevin鬥完波，個人攰到飛起。

「你諗住喺我屋企踎幾耐？」十六歲嘅我問。

我用手指計一計回答：「好彩就一頭半個月都未定，唔好彩就三日。」



「一頭半個月？你真係當正呢度你屋企？」

「無錯！呢度真係我屋企！」

「呢度係『我』屋企，你話你2021年嘅我，咁2021年嗰個屋企先係『你』屋企。」

「呢啲嘢洗唔洗計得咁清楚，你嘅嘢咪即係我嘅嘢，我嘅嘢咪即係你嘅嘢。」

「不過話時話，你話你由2021年時空穿越返嚟，咁你無啦啦返嚟2009年做咩？」佢問我。



「呢樣嘢你真係認真聽我講。」我坐返正個人同佢講，「你都知我同你身上，遺傳左一個家族嘅毒咒，一定要同處女結婚，否則就會死…」

「下？咁你都信，假架喎。」我未講完，對方就插嘴。

「唔係假架，係真有其事，你唔好插嘴住，聽埋我講先。」

我將自己穿越返嚟嘅原因，詳細地講俾對方聽。

「哦~原來你係為左破人個處，所以先穿越返嚟。」

我打開電話，揾左張Veronica嘅相俾佢睇：「拿，呢個女人就係我，亦即係2021年嘅你嘅未婚妻Veronica。」

「哇！條女個心口都幾大喎，2021年嘅我係咪發左達？」佢問。

「唔係呀。」我搖搖頭答。



「無理由，以我同你咁嘅樣，如果唔係好有錢，點會溝到女，仲要係咁大波？」

「呢啲咪就係天賜嘅緣份。」我答。

「咁你話呢條大波妹鐘意你啲咩？」

「Um…」

「答唔出呢，一係你呃我，一係就佢呃你。」

「都話左呢啲係天賜嘅緣份，再加上鐘意就係鐘意，鐘意一個人有時係唔需要理由。」

我反駁完繼續講：「算啦，我地都係講返正題，啱先我咪話2009年嘅Veronica係一個mk妹，同2021年嗰個幾乎判若兩人，計埋今次我已經穿越左三次，結果就衰足三次，所以你可唔可以幫手一齊諗下辦法，睇下點樣追到09年嘅佢。」



「下？呢啲嘢我都幫你唔到架喎，你自己搞掂啦。」

「話曬我條命你都有份，拍硬檔諗下辦法啦，我同Veronica仲有唔夠個半月就結婚，如果我喺2009年破唔到佢嘅處，咁結婚嗰陣我就隨時無命。」

「唓，你唔同佢結婚咪囉！」

「但係日子都定曬，唔係話唔結就可以唔結...」

「鈴—鈴—鈴—」

我話音剛落，放喺梳化隔籬部家用電話響起。

我隨手拎起嚟聽：「喂？」

「唔該我揾鐘耀輝。」電話另一邊傳來一把女仔聲。



「我係。」

「你今日唔係同阿德整電話咩？但佢仲未覆我sms？」

無聽錯嘅話，呢個女仔應該係小曼

同一時間，十六歲嘅我chur住話要聽電話:「邊個打嚟？快俾我聽啦喂！你隨便聽人屋企電話，好無禮貌！」

「Er…你等等…我陣間打返俾你。」我唔知點回應小曼，唯有收線先。

「你有無搞錯，隨便聽人屋企電話都有嘅，係邊個打過嚟？」十六歲嘅我繼續追問。

「我諗應該係小曼。」



「頂你咩！咁你做咩唔俾我聽，仲收佢線？食屎大架！」對方十分不滿，隨即從我手上搶返電話，「快俾返俾電話嚟！」

唔難怪眼前呢個我會咁肉緊同咁緊張，畢竟係鐘意嘅人打電話過嚟。

無錯，十六歲時嘅我鐘意小曼。

只係，小曼鐘意嘅卻係阿德。