回到過去，破我未婚妻個處: （23）

「你，唔好走！」我行到二人面前，指住Kevin講。

「咩料呀你？」Kevin問。

「我要同你1on1，如果我贏左，咁你條女就歸我！」

我每講一句，就撥一次頭髮，因為執陰真係好拮眼。

「哈哈哈！好呀！但如果你輸左，咁點先？」Kevin諗都無諗，就接受我嘅挑戰。



「輸…邊個話我會輸！廢話少講，拿拿臨開波！」

Veronica錫Kevin一啖，俾左啲愛嘅鼓勵，跟住就坐到場邊，休閒淡定咁睇比賽。

Kevin拉高校服嘅衫袖，撥一撥頭髮，臉上流露自信嘅表情：「打幾分？」

「一球定勝負！我開波先！」只要我入左一球，咁就Veronica就係屬於我。

「哈哈！無問題！」Kevin擺出防守嘅姿勢。



我企喺三分線上，瞄一瞄籃框，深呼吸一口氣，回憶起同馬騮練波時出手嘅感覺，拎住個波跳起向上一拋。

「啪！」

個波仲未離手，就俾Kevin一手拍左落嚟。

Kevin好快咁兩下假身過左我，輕鬆走籃得分。

「唓！見你咁牙擦，仲以為你有幾勁，原來不堪一擊！」Kevin好得戚，語氣帶著不屑。



咁樣輸法，我梗係唔憤氣：「我未出力渣嘛，再嚟過，今次打五分！」

「無問題，奉陪到底！」

我同佢由五分打二十一分，由二十一分打到三盤兩勝，結果我一球都入唔到，輸得一派塗地。

「頂！唔玩啦，你咁廢都唔好玩嘅！」Kevin放低籃球。

「唔得！再嚟一鋪！我仲有絕招未出！」我叫停佢。

老老實實，我把口係就係咁講，事實上其實已經攰到仆街。

「我陣間仲要練波，唔得閒同你呢啲垃圾玩。」講完，對方就拖走左Veronica，離開球場。

我諗住行上去截停佢地，但行左無兩步，小腿突然抽筋。



試過小腿抽筋嘅人都知係有幾痛。
 
我被逼坐低，拉返鬆條筋。

雖然心有不甘，但事實擺在眼前，我的而且確唔夠Kevin抽，無論係打籃球定還是打交。

啱先輸到貼地，Veronica又喺場邊睇到曬，啲印象分已經輸曬。

照咁睇，扮mk打波呢個方法似乎行唔通，要再諗過其他方法先得。

我喺場邊休息左好耐先回到氣，之後起返身都要慢慢行，驚行快兩步又抽過。

打完波，全身攰瀨瀨，我諗住返屋企抖下先。



我準備定身份證show俾老豆老母睇，咁佢地實唔會再誤會我係賊。

一個鐘車程後，我喺筲箕灣天悅廣場附近落左車，一個唔覺意行快兩步，小腿真係又再抽過。

成個人企唔穩，差啲跪低，好彩隔籬有個男人扶我一把。

「先生，你無嘢呀嘛。」

「無事，唔該你。」我望佢一眼，嚇到呆左。

呢個男人……

咪......咪就係我？

黑框眼鏡、油光滿臉、頭髮開叉，薯頭薯腦…



無錯！呢個人就係我！

十六歲嘅我！

「你係咪叫鐘耀輝！」我心情激動。

「你…點知我個名？」對方嚇左一跳。

「我梗係知你叫咩名，因為我就係你，你就係我！」

佢一臉茫然，好明顯唔知我講緊乜。

我拉佢到天悅廣場門外，一條圓鏡面柱前：「你快啲望下，我同你係咪好似樣，因為我就係未來2021年嘅你。」



「未來嘅我？」

「無錯！我從2021年穿越返嚟2009年，無諗到居然喺呢度撞到十六歲嘅自己！」

佢四處張望：「請問你係咪電視台整蠱嗰啲節目？」

「我同你餅印一樣，你咁都唔信？」我撥走前面執陰，哄近埋去俾佢睇。

「Er…我好似好樣過你少少。」

「頂，講呢啲！我嚟問你，你個名係咪叫鐘耀輝，1993年11月5號出世，小學讀丘佐榮，依家中學讀緊筲箕灣東官立中學，而且你身上有一個家族遺傳嘅毒咒，我有無講錯？」

「點解...你知我咁多嘢嘅，唔通你地電視台搵私家偵探起我底？」對方仍然唔相信。

「起你個頭咩！讀小三嗰年，你出貓俾先生發現左，先生話要見家長，你講大話話自己係孤兒全家都死曬，後尾俾老豆知道左，打到你屁股開花，去到小六你發現老豆收埋左隻《蜜桃成熟時》，周不時趁屋企無人你就會開嚟打飛機，仲有…」

「得得得，唔好再講，你居然連我呢啲咁私隱嘅嘢知...」

「我咪講左囉，我就係未來嘅你，所以你嘅所有嘢我都一清二楚。」

「阿輝，搞掂啦，行得！」呢個時候，有一個男人行過嚟。

佢外形俊朗，正面七分似金城武，側面五分似梁朝偉，同眼前十六歲嘅我，簡直一個天一個地。

呢個靚仔就係中學最好嘅朋友，阿德。

「你部電話整好啦？」

「整好啦！」阿德望我一眼，「咦？呢位係？」

「Er…呢個人我都唔知…」十六歲嘅我口窒窒，唔識答。

「我係阿輝嘅堂大佬。」我代佢解答。

「哦，咁阿輝我地依家係咪落網吧打機？」阿德問

「屋企個水喉壞左，我約我阿叔陣間上嚟整，今晚先啦。」

阿叔？係喎！2009年嘅阿叔佢仲未死架喎！

「咁好啦，咁我返去先啦。」

十六歲嘅我同阿德喺街口分別，跟住就返屋企。

至於我就跟住「自己」返屋企。