回到過去，破我未婚妻個處: （12）

我被帶到嚟紅磡警署，天氣凍到我猛打乞嚏。

隨後，一名當值差佬走過嚟同我錄口供。

「喂！你叫咩名？幾時偷渡落嚟？邊個係你蛇頭？」

「乞嚏！我咪講左囉，我係如假包換嘅香港人，講左你地又唔信！」

「砰！」個差佬一下大力拍檯，「你老母！家下咩態度，咁同阿sir講嘢架咩？」



警署寒風陣陣，我打完冷震，又打一個乞嚏：「咁阿sir你可唔可以揾張被俾我冚下先，我家下好凍。」

「俾張被你？你當呢度賓館呀？洗唔洗俾埋張床你？」

「有嘅話我唔拘呀。」

個差佬又「砰」一聲怕張檯，凶神惡煞指住我問：「聽住！阿sir再問你一次，你叫咩名，幾時偷渡落嚟，有無同黨？你地個蛇頭係邊個？」

「我都話我有香港身份證，只係漏左喺屋企唔記得拎出街，你要我講幾多次你先信？乞…乞嚏！」



「頂你個肺，仲唔肯講真話，擺明當我流嘅啫？」個差佬企起身，好似想郁手。

「宵夜到！大家過嚟食宵夜啦喂！」呢個時候，有人買左宵夜返嚟。

個差佬放低口供紙同筆：「阿sir家下肚餓要食嘢，陣間返到嚟你再唔講真話，就有排你受。」

臨走前佢攞手扣將我同張櫈鎖埋一齊，仲開住差館把風扇，對正我嚟吹。

我叫佢快放我走，但條友充耳不聞，直接行開左去食宵夜。



天氣已經夠凍，再加埋把風扇猛咁吹，凍到我騰騰震，不停流鼻水同打乞嚏。

我覺得自己真係好黑仔，喺毫無準備之下穿越返到嚟，咩都無帶，搞到咩都做唔到。

之前俾條mk打左兩獲都未夠，家陣衰到俾人拉嚟差館，一個唔好彩隨時坐埋監都未定，都唔知個天係幫我定玩我。

差館墻上嘅掛鐘，由夜晚十二點行到凌晨兩點，條差佬食宵夜食左兩個鐘都未返嚟，我一條友足足吹風吹左兩粒鐘。

我feel到個身好凍，個頭好暈，感覺好辛苦。

「唔好喺度恰眼訓！快啲醒！」啱先個差佬咬住牙籤，終於返埋位。

「幾時…幾時放我出…」說話未講完，神志不清嘅我就眼前一黑，失去知覺。

到我再醒返嘅時候，發現自己身處喺醫院。



個頭仍然有少少暈，把口好乾。

一名護士拎住杯水同兩粒藥行過嚟，佢話我發高燒，昏迷左一日一夜，啱啱先退左燒。

我問護士今日幾號，佢答我今日係24號平安夜。

我的而且確訓左一日一夜。

腦海諗起mk仔Kevin講過，平安夜book左酒店食Veronica隻豬，本來我都以為條友只係吹水，但嗰晚見Veronica幫佢吹得咁落力，隨時一個唔該俾埋隻豬對方都唔奇。

既然我穿越返得嚟，就點都要搶先其他男人一步，破未來老婆個處。

不過依家首先要做嘅，就係離開醫院先。



病房門口有條當值差佬守住，我食完兩粒藥，飲左杯水，攤落床繼續扮訓，等待時機偷走。

果然，過左十分鐘都無，條差佬就去左「蛇王」。

我著住醫院嘅拖鞋，趁無人注意，成功從伊利沙伯醫院偷走出嚟。
 
街上人來人往，店鋪掛滿聖誕裝飾，四周洋溢住一股濃厚嘅節日氣氛。

正正就係喺呢種幸福嘅氣氛催化下，今晚將會有唔少少女失守，獻出寶貴嘅貞操。

平安夜嘅天氣好似無早兩日咁凍，我身處人頭湧湧嘅大街，感到有啲迷茫。

（後來我特登翻查過，原來2009年香港嘅平安夜係有記錄以來，其中一個最暖嘅平安夜）

我一心想搶先Kevin一步「開罐頭」，只但係人海茫茫，要去邊先揾到佢兩個出嚟？



咁嘅情況下只能靠估。

根據常理去思考，一般情侶過平安夜，食完聖誕大餐，多數都會到尖沙咀海傍倒數，尤其Veronica住紅磡，過條天橋就到尖沙咀，我估佢一定會同Kevin到海傍睇燈飾兼倒數。

於是，我就從油麻地徒步行去到尖沙咀。

適逢聖誕節，有唔少鋪頭都搞試食，我一邊行，一邊逐間逐間試食醫肚。

下晝五點幾，尖沙咀一帶都已經逼滿唔少人。

我喺附近一帶四處搜索，尋找一個身高接近米八、gel飛輪海頭嘅mk仔，以及
一個鐘意露對髀出嚟嘅mk妹。