回到過去，破我未婚妻個處: （2）
※ ※ ※
「天靈靈，地靈靈！天地同生，掃穢除污，煉化九道，還形太真，百官納靈……」
一個身穿道士袍，自稱張天師嫡傳弟子第八十八代傳人嘅男人，正喺我面前開壇作法。
佢口中念緊啲無人聽得明嘅口令，左手搖緊鐵鈴，右手揮動貼滿黃色符咒嘅桃木劍，圍住面前放滿祭品同香爐嘅木檯揮劍轉圈。
我就跪喺壇前，望住個道士舞劍舞左十幾分鐘，心諗佢幾時先完。
「喂，個道士都舞左好耐，幾時先舞完架？」唔耐煩嘅我細細聲問企喺我身邊嘅女仔。
佢叫做小曼，係我由中學玩到大嘅好朋友。
「Shh—師父作緊法，好心你就唔好講嘢啦。」小曼提我收聲。
「但我跪到對腳好酸。」
「俾啲耐性，我估應該都就快完。」
小曼話音剛落，個道士就一啖水噴落嚟我塊面上。
我嚇左一跳，差啲想爆粗。
然之後條友放低木劍，喺檯底拎左隻生雞出嚟。
佢喺雞頸度劏一刀，啲鮮紅色雞血巴巴聲流入青花瓷碗度，跟住幾下手勢搣走木劍上嘅黃色符咒，再用打火機點著，最後放埋落個碗度。
「飲左佢！」個道士隊碗嘢埋嚟。
「下？你要我飲左呢碗嘢？」我望見呢碗腥亨亨嘅雞血，心諗點擺得入口。
「附係你身上嘅毒咒隔代相傳，頑固且難除，啱先我已運用多年功力，開壇施法，請左太上老君現身運功，為你消除詛咒，至於呢碗係陰曆初八卯時卯分出世嘅處女雞嘅鮮血，你飲左之後，咁成個儀式就大功告成，自此你就會變返個正常人，你同你嘅下一代以後都唔會再受詛咒影響。」個道士講到好似好堅咁。
「你話請左太上老君？點解我啱先唔見嘅？」我好奇問一句。
「廢話！只有有道行嘅人先會見得到太上老君，你呢啲凡夫俗子當然睇唔到，總之唔好講咁多，快啲飲左碗嘢！」
「咪玩啦，血嚟架喎，點飲呀？」成碗嘢咁核突，我齋睇都覺反胃
「男人老狗，如此婆媽，等我嚟幫你！」個道士箭步上前， 一手擘大我個口，另一隻手就灌我飲曬碗嘢。
我都未嚟得切反應，連續「good」左三下，成碗雞血就吞曬落肚
濃烈嘅血腥味係口腔中迸發，令人作嘔。
「唔好嘔！嘔出嚟就唔靈。」個道士警告。
「水…水…」我拿拿臨問小曼拎樽水浪下個口，沖淡口中嘅血腥味。
個道士收埋把木劍：「好，儀式已經完成，承惠一萬八。」
有無搞錯！呢條友求其笠件袍，舞幾下劍，劏隻生雞咁就收我一萬八？
「你話我個詛咒已經消除左，但係點樣證明先，我點知你係咪吹水？」我提出質疑。
「哈！真係可笑，我堂堂一個張天師嫡傳弟子嘅八十八代傳人，你竟然話我吹水？定係你唔想俾錢，所以喺度玩嘢？」
個道士講完呢句說話，就叫左佢兩個弟子出嚟。
一個塊面有刀疤，一個就手臂有紋身，凶神惡煞咁款，睇嚟惹唔過。
雖然我條氣有啲唔順，但都唔想小事化大，死死地氣俾錢走人算。
「算！我費時同你拗，碌卡得唔得？」
「哈哈，當然可以。」道士收錢時，笑到烚熟狗頭咁。
傍完水，我就同小曼離開道觀。
嚴格嚟講，間嘢應該都唔可以稱作道觀，因為都唔係一座廟，只係位於油麻地某棟唐樓嘅一個單位。
口腔之內仍充滿血腥味，我到七仔買左兩支水浪口，但陣味都好似浪極都浪唔走咁。
「搞錯呀，你隊左兩支水都未夠，家下連我樽水你都搶埋？」小曼手上嘅樽裝水俾我搶去。
「都唔知你揾個咩道士，焗我飲左成碗雞血，搞到家陣口入面陣血腥味仲未散到。」我打開樽蓋，倒水入口。
「啱先你無聽到咩，個師父係張天師傳人嘅弟子，人地叫你飲雞血係想幫你驅邪解咒。」 小曼唔服氣，一手搶返支水。
我lur左口中啖水講：「咩張天師弟子，我就話似神棍多啲。」
「唔係喎，我問左好多人，佢地都話嗰個道士好有料。」
「真定假？都唔知你有無俾人老點。」
「唓~你想知靈唔靈，咪揾Veronica結婚，試一次咪知囉。」
「咁兒戲？如果個道士真係神棍，根本無解除到個詛咒嘅話，咁我同Veronica結婚，咪會無命？我唔會輕易拎自己條命嚟較飛。」
「你咁驚死嘅話，咪揾個處女結婚，咁就包保萬無一失，同埋又係你托我幫你揾道士解咒，家下我幫你揾到左，你又喺度嘰嘰趷趷，諸多質疑，早知就唔幫你。」
「處女呢家嘢，話揾就揾到咩，係處女個額頭又唔會鑿住『處女』兩個字，最緊要係好似Veronica身材咁好嘅女人，無左之後就好難揾得返。」
「講到尾，你咪又係貪人大波。」
「個個男人都中意大波架啦，唔通鐘意你呢啲飛機場？」
「作死呀你鐘耀輝，夠膽笑我飛機場！死啦你！」小曼嬲嬲地，用手上嘅水樽大力敲我背脊。
「喂！你真係打落嚟架？我講下笑，洗唔洗咁認真？」我左閃右避。
其實我無講錯，小曼的確身材無乜，份人又比較男仔頭，係個樣就有啲似《打天下》入面個談善言。
「算啦，我都費事唔同你講咁多，接住！」小曼一嘢丟樽水過嚟。
我反應夠快，一手就接住左。
「我夠鐘返工，你爭我嗰餐飯，遲啲先還啦下。」小曼對我講。
「咪住呀喂，我幾時爭你一餐飯？」我問。
「唔好詐詐帝，之前講到明，我幫你揾到道士解咒，你就請我食飯。」
「無喎，我有咁講過咩？」
「梗係有！總之餐飯你就走唔甩架啦，係咁先，byebye。」小曼轉身行到對面街，坐上巴士離開。
今日其實係閒日，本來我都要返工，只係為左見啱先個道士，我特登請左一日假。
小曼就係私家診所護士，平時比較忙同難啲請假，佢今日淨係請到幾粒鐘假，一夠鐘就要返去開工。
依家係下晝四點，我搭車過海，準備去接女朋友收工。