回到過去，破我未婚妻個處: （1）

（故事純屬虛構，如有雷同，實屬巧合）




「娶老婆一定要娶處女！」

「就算唔係處女，自己老婆個處都一定要係自己破嘅！」

喺呢個二十一世紀，思想開放嘅年代，仍然有不少男士有「揀老婆要揀處女」呢種守舊觀念，本人就覺得假如真心鐘意一個人，係絕對唔會介意對方係咪處。



因此以上兩句說話我並不認同，但係由細到大我老豆同老母都喺我耳邊，不停灌輸呢兩句說話。

大家唔好誤會，佢兩老並無宗教信仰，思想亦唔係封建守舊，佢地之所以一直叮囑我要揾個處女做老婆，其實都係為左我條命仔著想。

因為我一旦同非處女結婚，就會七孔流血而死。

聽落好似好荒謬，我第一次聽到嗰陣，都覺得天下間點會有咁無稽嘅事？

咩娶唔係處女嘅女人做老婆就會死，呢種講法完全就同嗰啲「食剩飯大個會娶豆皮婆」一樣，都係毫無根據。



所以，我自細就唔信我老豆老母呢套講法。

直至到十八歲嗰年，參加過我老豆個細佬，亦即係我阿叔個婚禮，我先知道原來一切都係真有其事。

我阿叔就係唔信邪，唔理多位親友嘅勸阻，堅持要娶一個離過婚嘅女人做老婆。

離過婚唔緊要，問題係個女人唔係處女。

雖然時隔已多年，但當時嘅場面仍然歷歷在目。



喺一間神聖嘅教堂內，我阿叔對愛人講出「我願意」，並喺交換戒指嘅嗰一刻，突然噴血倒地。

準確嚟講，唔單止係個口吐血，就佢連一對眼、兩個鼻哥窿同兩邊耳仔，合共加埋七個窿，都噴出大量鮮血。

場面既恐怖又嚇人。

最後，我阿叔因失血過多，當場斷氣身亡。

呢件事對我衝擊好大，一嚟血腥嘅畫面十分震撼，二嚟阿叔竟然真係死左。

自此我先明白到，老豆老母原來無「昆」我，娶個唔係處女嘅女人做老婆，真係會死人。

至於點解會有啲咁荒謬嘅事，咁就要追溯返我阿爺嘅阿爺嗰一代。
 


我阿爺嘅阿爺以前係個蝦蝦霸霸嘅地主，得罪人多稱呼人少，有一次就唔小心得罪左一個茅山道士。

據聞佢強行拆人地個道觀，霸左塊地嚟起屋。

個道士為左報復，就施法落咒，詛咒我阿爺嘅阿爺，以及其後世子孫，娶老婆如果唔係娶處女就要七孔流血死。

後來，我阿爺個阿爺五十歲大壽嗰年，想迎娶第四個老婆，個臭道士就趁機會，夾埋個大妗姐裝佢彈弓。

佢叫個大妗姐揾個青樓女子，包裝成黃花閨女，介紹俾我阿爺嘅阿爺。

結果個臭道士真係奸計得逞，我阿爺嘅阿爺娶左個一雙玉臂千人枕嘅風塵女子為妾，拜堂嗰一日，夫妻交拜完之後，佢就吐血身亡。

個詛咒並無就此結束，而係一直流傳落去家族每一代男丁身上。

我老豆就好好彩，喺讀書時期識到我阿媽，一畢業出嚟做嘢佢地就結婚。



話曬嗰個年代大部分女人都守身如玉，我阿媽同我老豆都係第一次，佢地結婚完全無問題。

就係咁，我老豆避過一劫，仲生左我出嚟，個詛咒則隨之傳到我呢一代。

隨年月變更，社會風氣越嚟越開放，男又好女又好，喺呢個年代，仲邊有人會將隻「豬」留到結婚嗰日。

除非係超級虔誠嘅教徒，否則正常上到大學，好多人都破曬處。

好樣啲嗰班，讀中學就已經破左處。

我女朋友Veronica就係屬於樣靚波大嗰批，佢話佢讀大學嗰陣就無左第一次。

相比之下，我就遲佢幾年。我係出嚟做左兩年嘢，二十五歲嗰陣識到Veronica先破嘅處。



即係話，我嘅第一次俾左依家嘅女朋友，但係對方嘅第一次就唔係俾左我。

有啲人可能會介意女朋友個處唔係自己破，我就唔介意呢啲嘢。

因為小弟條件唔好，屋企唔係有錢，個樣亦都唔靚仔，由細到大都溝唔到女，所以有女朋友已經好心滿意足。

更難得嘅係，Veronica又靚女又大波，一個外在條件咁好嘅女仔，竟然唔介意我又窮又柒，咁都肯同我一齊，我覺得自己真係幾生修到。

注意：呢度講嘅大波係36E，純天然無添加，揸落軟淋淋。

除左「胸前偉大」之外，佢個樣都唔差，同日本演員佐佐木希都有幾分相似。

講真，一個咁完美嘅女人，願意同我呢個柒頭毒撚一齊，試問我仲可以介意啲咩。

我地拍左拖兩年幾，差唔多都三年，大家感情一直都幾好，好到都已經去到談婚論嫁嘅地步。



對方不時都借啲意問我幾時娶佢，只係一講到結婚，問題就嚟啦。

Veronica唔係處女，個處亦都唔係我破嘅，背負家族詛咒嘅我，假如同佢結婚，隨時就會落得我阿叔咁嘅下場。

面前咁嘅情況，我真係唔知點算好……