《平行軌跡》: Episode 35 - 成長說明書
「無得救？」又在老地方，阿杰嘗試站在鞦韆的座位上蕩，一直都找不到平衡點。
Vincent沒有作聲，只以搖頭作回應，他也在找尋在鞦韆上能夠站立的平衡點。
「諗清楚架喇？」
點頭。
嘆氣。
低頭。
以前，當鞦韆還是以硬塊例如木頭或者鐵塊作座位支撐的時候，要站在鞦韆搖晃根本就是一件等閒事情。隨著年代的演進，可能是玩者對座位舒適的要求提高，也可能是因為家長認為這種玩法太危險，有所警戒的關係，鞦韆的座位統統都變成了軟膠，而且好像很為用家設想，讓軟膠緊貼臀部。這樣的改動，卻使得崇尚站著玩的人困難重重。
兩人幾經辛苦終於能夠站起來，只是兩人的姿勢東歪西倒，一副滑稽相。
「唉…估唔到會發展成咁…」阿杰隨之搖頭：「真係唔可以搵返佢？」
「唔可以…我唔可以。」Vincent語焉不詳地說著，他也不再強行站起來，選擇乖乖地坐下，手裡則多了一枚硬幣。
「無事喎，有我撐住你。」阿杰眼見自己的死黨接連失意，當然不能視而不見。
「得架喇，無問題。」Vincent把玩著硬幣，不停換著不同花式。
「咦？你呢個coin…點呀？下定決心重拾失落咗嘅過去？都話咗你架啦。」
「你夠係啦。」Vincent指著鞦韆旁的結他袋，旁邊還有那把充滿VS回憶的雨傘。
「兜兜轉轉…我哋兩個似乎都即將會向自己嘅志向發展，世事真係奇妙。」阿杰雖然站不穩，卻堅持站著，即使他像要隨時跌下來地搖晃。
「有時真係唔明點解要讀咁多書。」阿杰滔滔不絕，感嘆好像浪費了人生好一段時間，聽說過，讀到大腦亦爆炸快停頓，然後會考得上熱門那一科。
「或者我哋讀大學根本就唔係為咗讀書。」被內定限制一切，被預定各種想法實際。
「不過我都唔知，我都曾經諗過可以讀完大學，搵到份工，穩定就過一世。」聽說過，順應著勢力有美滿前路，無用再走荒野路彎太顛簸。
「成日會聽人講，男人到三十歲仲要依賴公共交通工具真係好可憐。慢慢又發覺，多餘啦，自己揸車咪又係喺隧道口塞住。我真係唔覺得揸住架林寶堅尼、瑪莎拉蒂會威幾多，又唔係要揸跑車先做到人。」個個也都聽過，聽得多，成就會以座駕分類。
「如果打一份牛工咁就一世，其實真係好唔抵。」全力進速這趟路程，風景閃過不必看，活得很快麼？
「偏偏呢個社會每一日都會灌輸一種追求和諧穩定嘅價值俾我哋，要我哋用多啲信用卡，要我哋買多啲唔等使嘅嘢，要我哋買一間貴到離晒譜嘅樓…好彩我哋屋企間屋已經買咗，如果唔係我哋可能都要喺呢個旋渦入面，俾社會潮流捲住嚟走。其實真係唔應該俾個社會迫我哋點樣做人，雖然我係既得利益者，但唔買樓係咪會死得人姐？唔安份過生活係咪會得罪全世界姐？唔通我哋就唔可以跟隨自己嘅節奏生活，一定要俾個世界牽住我哋個鼻走？俾我哋搵多好多錢買到樓有股票有租收又如何？我唔覺得我咁樣會開心咗囉。」細細個都聽過，聽過投誠致富未會飢餓，忘掉這生一個志願，一種心跳，不緊要，定得到更多。
阿杰自我滿足地不斷說話，彷如置身演講台一般。他渾然忘記自己只是站在一塊軟膠上面，在他得意忘形之際，一聲慘叫隨之響起，他失去平衡倒在地上。
在旁的Vincent對阿杰的演說無動於衷，也無視跌在地上的阿杰。
「嗚…好鬼痛，不過唔跌過又點會知痛呢？」阿杰躺在地上，拍拍身上的塵。
「呢位禪師，你講嘢好難明，咁你份工點？」一直有點心不在焉的Vincent問起一個踏實的問題：「我就話無官一身輕，又唔打算做孝順仔姐，你唔同我喎。」
「辭職卦。」阿杰的語氣也很猶豫：「其實我都未算好大決心，但係原來身邊嘅人個個都覺得我應該拎住結他唱歌，到頭來原來反而係自己最唔坦率面對自己，都幾好笑。」
「咁咪幾好，你真係應該多謝個天，為你造就一個咁好嘅環境。」Vincent伸了個懶腰，不知不覺間他手上的硬幣數量由一個變成五個。
「咁你點呀？幾時先肯返屋企住？都咁耐之前嘅事啦，其實你老豆已經好過我果個好多，你而家一闊三大挨唔到幾耐架喎。」
「你識條春咩，挨到幾耐得幾耐囉。總之佢就係對唔住我老母！」原來Vincent之所以搬出去自己住，跟自己父親也有關係。他從口袋裡拿出一包紅萬，作狀給阿杰，自己也點起一支。
「你知我唔食煙架，你免得過都唔好食咁多。」
「戇居。」
「點都好，我哋兩個都好好彩，身邊嘅人都唔係信奉一種維持穩定價值觀嘅人，如果唔係，我哋可能都一樣只係社會上一粒好細好細，有等於無嘅齒輪。我哋未必會成功，但至少我可以話俾人知，我有嘗試過，呢個世界唔一定要跟晒原有嘅遊戲規則，呢個世界唔係只係得一種價值，我哋應該要設立自己一套遊戲規則。」被內定限制一切，被預定各種想法實際，如不懂出走怎欣賞世上美麗？逃過大人的攻勢，逃過類同的複製，逃過順從的洗禮。
「你好煩，不過我同意。『成名要趁早』。」
「成唔成名就係後話啦，我相信，只要努力去追夢，總有一天係會達成嘅。成功之前，絕不放棄！」要蒙蔽我、拿去我頑固理想， 腳鐐銬上還要剪走初生翅膀，那傳說有誰要聽，由我去飛，就趁羽翼剛展起。
「痴線，你條友仔真係好鬼肉麻，你會唔會面紅？」
「似乎係唔會嘅，哈哈哈哈。」
「你決定行呢條路，咁你果粒肥美多汁嘅果實應該會開心到不得了，農夫先生請隨便慢用。」一個又一個煙圈從Vincent口中飄出。
「唔好亂講啦…我同佢真係純朋友關係，又或者，我當佢係我個妹，因為佢性格同我個妹都幾似。」阿杰嚴肅對待對小郎的友誼：「不過佢真係瘦咗好多，我都估唔到一個人可以有咁大轉變，如果佢中學果陣已經係咁，話唔定根本唔會有芊芊黨。」一個人的轉變可以有幾大？相信阿杰日後的體會更加深刻。
「關咩事呀！」Vincent突然激動得差點將煙蒂丟在阿杰身上，然後腦海浮現了一句：「Shirley係獨一無二架。」
「咁激動做乜姐？你係咁緊張人嘅，點解唔搵返佢？仲坐喺度做乜？等運到呀？」
「你唔會明。」
「我唔明你咪講到我明囉，況且要明果個唔係我，你自己諗清楚。」
Vincent默不作聲，將憤怒與悲傷的感情都壓抑住，其實他整晚的表現都顯得有點落寞，沒有平時那麼心高氣傲。到現在，連阿杰也不明白他，究竟為了什麼樣的堅持去放棄這段名為三年，實為七年的感情。
（Next：Episode 36 - 陪著妳走）