《平行軌跡》: Episode 2 - 這些機會不是屬於我的
「我叫李櫻杰，一般人會叫我阿杰，同我熟嘅就會響全朵…廿二歲，大學畢業前路茫茫，誰想上班，都市又局限又太平淡…作為一個IT仔，直到夜晚，彌留工作間，在這規矩中每天往返…係好合理的事。剛剛和她分開了，一切一切都變得淡然無味…但係都要撐住…撐住！其實我啱啱就通完頂趕工，好彩老細都算有少少人性，放我一日假，但係我老死就無乜人性……」
「總會不斷地問原來不用亂問答覆不太再重要…」
阿杰的電話鈴聲不斷響起，來電者是他口中的老死：「你駛唔駛打咁多次奪命追魂call呀…」
「喂！李櫻杰，你放假就啱喇，十萬火急要你幫手，快啲出嚟先講！老地方見！」沒讓阿杰說完，他的老死就已經搶著說話。
「咩話？我啱啱先想瞓個靚覺喎，唔好搞我啦，頂！死仔cut我線！」阿杰不情不願落床，一身街坊裝地出門。
「馬建鋒，同我由細玩到大，大家住埋同一條邨，都係公屋仔，有咩事兩件蛋散拍住上。佢份人無咩嘅，夠義氣，但就更有異氣，有異性無人性果隻異，今次肯定又係關女事。」阿杰在路上一邊行，一邊若有所思。
「我同佢嘅老地方，就係呢度，哈，我就嚟到，但就居然一個人都無，死仔係咪玩嘢？」阿杰去到「老地方」，發現沒人，有衝動拿身旁的鞦韆發洩。
「喂！李櫻杰，呢度呀喂！」阿杰從遠處路邊看到一名聲音略沙，西裝骨骨的人在揮手：「快啲啦，我地要飛的去揾Shirley。」
一個不需跳錶的途程，五分鐘後，兩個大男人就跟Shirley會合，她的身後還有幾個小朋友。
「嘩…我有無睇錯…你幾時搞咗咁多條人命出嚟而我一啲都唔知？」阿杰睡眼惺忪地諷刺他的老死Vincent。
「你成晚無瞓都咁幽默真好嘢，呢班係Shirley啲學生嚟囉好無？」
「你都知我無瞓喎，咁你想點呢？係咪想我死？」
「嗨！Shirley 今日要帶班學生做咩話？社區體驗喎！我驚佢搞唔掂咪諗住幫佢囉！好死唔死今日又要見客，咁你既然得閒，拍硬擋幫吓手啦。」
「唔好意思呀阿杰…我一早同Vincent 講我搞得掂…唔好意思呀…佢係都要你出嚟…」Shirley運用非常溫婉的聲線表示歉意。
「唔緊要啦…咁而家去邊？」聽到Shirley道歉，阿杰又不禁心軟。
「搵間茶餐廳食個下午茶先…之後…一係嚟返呢度俾佢哋玩一陣都可以…其實我都唔知帶佢哋去邊好，只係要帶佢哋戶外活動三個鐘…」Shirley顯得有點迷茫。
「咁我哋行啦。」一群人浩浩蕩蕩到了一間位處街角的茶餐廳。
……
「唉…無你哋咁好氣，個飯嚟到先叫我起身啦，爭取時間…」阿杰連一句說話都不能完整說出就睡著了。
「嘩，Shirley妳睇而家啲後生仔幾唔捱得，喂我快手食埋個星州米就較腳喇，今晚再傾啦。」Vincent 說罷就狼吞虎嚥。
「你慢慢食啦，小心唔好啃親呀。」
「掂喎，我走啦，Take care。」Vincent走得匆忙也不忘一吻Shirley的臉頰，旁若無人，完全不顧身後的一群小朋友。
「炒飯到！」
「唔該…」幾經辛苦，阿杰努力令自己離開睡魔懷抱，但仍然他神智不清，甚至不太知道自己在哪，環顧四周，只見一班嘩鬼，隱若看見Shirley，還有…「唔…呢個All-back 馬尾妹如果將啲頭髮放落嚟，再稍為打扮吓…應該都不失為一位美女…」之後再度趴在枱上。
「喂，起身喇阿杰，有飯食喇，你咁攰不如都係返屋企瞓吓啦，我真係搞得掂。」Shirley見阿杰狀態如此，更感歉意。
「唔緊要…我一陣都會去行吓，妳有咩事call我囉，我就喺附近。」
「咁好啦，你自己小心啲，唔好一個唔覺意衝出馬路。」Shirley一邊逗小朋友，一邊跟阿杰談話。
「哈，咁睇我，妳擔心吓自己好過啦…帶住成班鴨仔，佢哋就真係隨時亂咁衝。」阿杰亦三爬兩撥食完整碟炒飯，活像想連碟也吃下去。
「咦？頭先個All-back 馬尾妹呢？…唔通我撞鬼？」阿杰死命盯著空無一人的收銀櫃台，努力回想那女孩的樣子，卻一點印象也沒有，只記得那條馬尾。
「喂Shirley，咁我行先喇，呢度你自己搞掂喇喎。」
「無問題！Bye！」 阿杰離開茶餐廳，沿著大馬路行，漫無目的地行，不知行了多久，不知不覺走到了海傍，有情侶在談心，也有人在放狗、釣魚和跑步，藍天突然被一層厚厚的烏雲慢慢滲透，令天色變得昏暗。
「…又係呢度…唔…點解又會走咗嚟呢到？」一陣強風迫令阿杰閉上雙眼。
「李櫻杰……我哋分手啦。」
「吓…做咩好地地講埋晒啲咁嘅嘢…？係咪發生咗啲咩事…？不如好好傾吓先？而家咁大雨我哋揾個位避雨先啦！」
「傾？仲有乜嘢好傾？乜你覺得我哋有將來咩？我話要去西餐廳你就帶我落茶餐廳，我想去東京你又話不如返北京，我叫你幫我去撲 EXO 飛，你俾咗啲咩我？XO公仔囉好無？我覺得我哋完全唔啱channel囉。」
「冷靜啲先…妳唔係唔知我鍾意講笑架嘛…撲飛我知係我唔啱…咁我之後都有幫妳買過丫…」
「哈哈哈…好好笑喎，我都未計你成日講埋晒啲無人明嘅爛gag，仲有呀，你睇吓你份工有咩前途？唔該你俾啲上進心，得閒就進修吓，唔好玩埋晒啲無謂嘢啦，唉，真係好無安全感囉。」
「妳平時聽親我啲gag都笑唔停喎…我哋識嘅時候妳都知我有咩工可以揀…妳想我點…咁我為咗妳已經好耐無玩…」
「我笑唔代表我鍾意囉，我而家係唔再鍾意你呀，仲有，其實我真係好唔鍾意喺海邊吹風，睇吓我企咗一陣個頭就亂晒，麻鬼煩！」
「唔好走…求下妳唔好走…點解妳要走…」
「放手呀！我同你分咗手喇！」
水點，滴在李櫻杰的手背…一滴…兩滴…三滴…四滴…
（Next：Episode 3 - 黑眼圈）