《平行軌跡》: Episode 1 - 我愛茶餐廳
「我叫張詠雪，自細同婆婆相依為命，今年十八歲，中學畢業，公開試成績不理想，唔夠資格讀大學，我唔可以再增添屋企負擔，所以唔可以再讀書喇。好彩阿姨經營茶餐廳又正好缺收銀員，佢哋問我有無興趣做一段時間，我當然二話不說應承咗！佢哋對我好好架，唔會要我太辛苦，又包我同婆婆嘅伙食，生活…還可以啦。至少我可以做自己喜歡做嘅事…係咩？嘻嘻…唔話你知！」
「阿雪！阿雪！又發白日夢？妳想班OL姐姐遲到咩？」一名略為中年發福的中年女人叫喊著。
「啊！唔好意思！多謝妳四十蚊…呢度六十蚊找俾妳，聽日見！」
面對熙來攘往的食客，阿雪不停重覆收錢、找錢的動作，除了一群又一群的OL，角落還有一群建築工人也準備離開。一輪混戰後，戰場一般的茶餐廳恢復了寧靜，伙記們正在進行戰場的善後工作。
「雖然Auntie Angel個樣好惡死，講嘢又大聲，但佢好平易近人架！」阿雪望著她的姨姨發呆。
「呢間茶餐廳附近係商業大廈，所以午市一定坐無虛席,仲可能要六個人坐四人卡位！外賣電話更加係接唔停手，不過忙完呢段時間，我就可以享受一段長時間嘅寧靜，繼續我嘅大計…哈哈哈！」阿雪一邊自的陶醉，一邊拿起筆記簿，似是準備要做些什麼。
突然，一陣喧鬧聲音伴隨著幾個身穿幼稚園校服的小朋友和兩男一女一同進入。
「嘩！乜今日咁好生意呀？阿雪，幫手落單呀！」 Auntie Angel 正忙著，沒空理會客人。
「係係係！請問各位想食乜？」
「星州炒米！」「古法蒸青班！」「西冷扒！叉雞飯！」「齋啡！檸水！」「鮮奶！滾水蛋！」
「Auntie Angel！呢度呢度！又會無啦啦咁多人都有嘅？」
「係囉，仲要嗌埋晒啲古靈精怪嘢，妳同個四眼高佬講呀，呢個時間無魚食呀！仲有個西冷扒呀…幾多成熟呀？呢班人都傻嘅！」
「好！即刻去！」
另一方面，Auntie Angel 口中的四眼高佬，落單後就沒氣沒力趴在枱上：「唉呀Vincent哥…我難得有假放你今日咁樣玩我…」
「喂李櫻杰，我女友有事，做兄弟嘅唔係托手踭呀？！」
「而家咪幫緊囉…但我真係好攰囉哥仔…」
「幾位唔好意思！請問邊位嗌咗蒸青班？呢個時間未有呀！要唔要嗌過其他？」阿雪打斷了他們的對話。
「吓…咁…俾個炒飯我啦…」四眼高佬沒有抬起頭來，只是沒精打采地回答，。
「好…炒飯…咁請問西冷扒係邊位嗌嘅？要幾多成熟？」
「七成熟丫唔該您。」聲音來自那位身穿長裙，面容清秀的少女。
「好！你哋等一等！好快有得食！係呢？班小朋友要唔要都食啲嘢？一係我拎啲蛋撻呀波蘿油俾佢地啦！入我數！」
「嘩，妳好好人丫，多謝妳。」少女表示謝意後站起來對著小朋友們說：「各位同學，有位姐姐請你哋食嘢喎…咁你哋應該要講咩呢？」
「多謝，姐姐！」
「乖。」少女保持和藹可親的笑容讚賞小朋友。
只見阿雪面頰通紅，急步走去存放在茶餐廳門口的蛋撻和波蘿油。
不消一會兒，蛋撻波蘿油送到他們眼前。
「嚟試吓我哋馳名嘅蛋撻！雖然不是新鮮出爐，但都好香脆爽口架！」
小朋友們蜂擁而上，而阿雪就回到收銀員的櫃位。
「茶餐廳係一個好特別嘅地方嚟架，每日都會遇到唔同嘅人，從佢哋身上可以見到唔同嘅事，能夠見證每個人同呢個城市嘅『繁榮和低窪』，即使佢只係樸素又平民化又草根，卻從中帶點高雅味道，太可愛了！」
她仔細盯著面前的那群小朋友，又再拿起筆記簿，把眼前的光景畫起來。
「阿雪，喂！阿雪！」又是Auntie Angel 的叫聲。
「…啊？咩事呀Auntie Angel？」
「今晚我同Honey去睇演唱會，做埋呢班細路就早啲收舖囉，妳埋完數可以走先喇，佢哋張單等我搞埋佢…拎埋呢兩盒飯同湯返去，夜晚整熱同你婆婆食啦。」
「唔該晒妳啊Auntie Angel！」
「呵，無啦啦多咗半天假期，真好。」阿雪心底裡暗喜。
阿雪匆匆做好手頭上的工作：「搞掂！咁我走先喇Auntie Angel！」
離開時不忘拿著兩袋食物和她的筆記簿。
踏…踏…踏…
「哎…日日走上走落十層樓都真係唔簡單…」阿雪回到家門口，一邊找鎖匙一邊自言自語：「雖然係好殘舊嘅大廈而且無電梯，但都慶幸總算有瓦遮頭…只係婆婆出入真係唔太方便。」
「我返嚟喇婆婆！今日豐富呀有湯飲！」
「咦？乜妳今日咁早嘅？」婆婆望著窗邊看風景。
「係呀，Auntie Angel 今晚去睇演唱會 happy happy丫嘛，咁佢咪早啲收舖囉。我擺啲飯入廚房先，晏啲再整熱佢！」
「呵…呵…呵…」婆婆輕聲笑了三聲。
「上床攤抖一陣先！」阿雪拿起電話：「嘩！今日咁多Message嘅？」螢幕顯示訊息來自一個叫傲雲的人。
「紫月！好消息！」
「之前咪同妳提過我呢期傾緊一單大生意嘅，」
「今日有突破性進展！」
「睇怕呢鋪都實食無黐牙」
「我咪應承過妳，傾得成呢單生意就帶妳去迪士尼嘅？」
「下個禮拜日我得閒，不如就下個禮拜日去啦好唔好？」
「仲要好好慶祝，一定要玩盡佢！」
「真係嘅？？？？？？？？？？？？」
「好啊好啊好啊好啊好啊好啊好啊好啊好啊好啊！！」
阿雪在床上不停碌來碌去，還差點跌在地上。「要俾個驚喜佢！嗯…好彩儲咗啲錢，呢個星期日去買新裙新鞋，俾個驚喜佢！」
（Next：Episode 2 - 這些機會不是屬於我的）