「失」婚大作戰: （十）

「叩叩—」

喺呢個時候，有人敲門。

有兩個西裝骨骨嘅男人行入房。

佢地係我嘅老友兼婚禮伴郎，安仔同肥榮。

「婚禮就開始啦喂，新郎哥你心情如何，係咪好緊張？」肥榮著嘅係加大碼西裝，但望落去好似都唔太啱身。





「呢刻咩心情？」我苦澀一笑，無法言喻。

再看看手腕上嘅錶，時間顯示為九點五十分，仲有十分鐘個婚禮就要開始。

再唔走人嘅話，我就要同自己個妹成婚。

連續試左三次穿越都改變唔到事實，睇嚟我真係無得揀，只能喺婚禮上做衰人，拋棄新娘。

安仔見我神色慌張，就叫我放輕鬆：「阿康你唔洗咁慌失失喎，雖然第一次係緊張啲嘅。」





佢今日個頭落左好多髮蠟，gel到「臘臘令」。

而我都唔知點同佢地，解釋我呢刻嘅狀況，只能歎一口氣，無視二人，直接行出房間。

剛半隻腳踏出後台，就睄到百幾二百個嚟觀禮嘅賓客坐曬喺度。

咁嘅情況下，我想從正門離開應該係無可能。

我又調頭走返入間房問二人：「安仔、肥榮，你兩個知唔知呢間禮堂有無後門？」





「無端端做咩問埋禮堂有無後門？」安仔問。

「哈！莫非你中左嗰啲咩結婚恐懼症，家下想從後門走人，想做婚禮嘅逃兵？」肥榮講笑咁講。

「呢個時候我解釋唔到咁多，你地知唔知後門喺邊？」我心急追問。

「你無嘢呀嘛，神神化化咁？後門我就唔見有，不過走廊有個轉彎位，嗰度好似有條走火通...」

肥榮講到一半無端端停左落嚟，成個人突然間定左格咁，絲毫不動，就連身邊嘅安仔都一樣。

隨即，四周變得漆黑一片。

當白光照落我頭頂，教堂精靈Jacob亦隨之出現喺眼前。

「做咩扎恆馬咁，你唔係諗住走佬呀？」





「廢話，剩返兩個字個婚禮就開始，再唔走就嚟唔切。」

「你都睇到啦，成百幾二百人坐左喺出面，你唔係想咁多隻眼望住Wendy喺婚禮上，俾你呢個新郎哥拋棄呀嘛？」Jacob反問我。

「我知咁樣會令Wendy非常難堪，但都無辦法，你幫我穿越左三次但一啲效果都無，咁仲可以點？」我表示無奈。

「答案就係再穿越一次。」

「衰左三次仲嚟？」

「你試下認真諗下，你唔返去改變歷史嘅話，咁你同Wendy上床嘅事就將永遠變成事實。」

Jacob摷返我第一次穿越失敗，間接導致自己同Wendy上床嘅事出嚟講。





對此我係無言反駁。

跟住，Jacob清一清喉嚨，以為佢又想唱歌，點知今次玩吟詩作對：「顧城有一首詩係咁寫嘅，」

「你不願意種花
你說：『我不願看見它
一點點凋落』
是的
為了避免結束
你避免了一切開始」

「好心你有嘢就講，唔好又唱歌又吟詩，搞埋啲無謂嘢。」我有少少唔耐煩。

「一句講曬，你信我，今次我有信心你可以同Wendy撇清關係！」Jacob拍心口保證。





「咁你話我仲可以返去幾時同做啲咩？我就真係諗唔到啦。」

「學詩人顧城話齋，避免結束嘅最好方法就係避免開始，一段感情無論以咩形式結束，對雙方都係會造成傷害，而防止受傷嘅方法就係唔好開始。」

我無出聲，俾對方繼續講。

「呢一次，我提議你返去你同Wendy表白嘅嗰一日。」

「表白嗰日？」

「無錯！知唔知點解分手會咁痛？」

「因為大家相愛…」我都未講完就俾佢搶左對白。

「係因為有愛！只有相愛過嘅人先會感覺痛，而且愛得越深，就傷得越痛。假設你一開始無表白，你兩個從來都無開始過呢段感情、亦無愛過對方，咁咪唔會心痛囉！你都唔洗再擔心分開會hurt到對方，甚至你兩兄妹結婚同上床呢兩壇嘢直頭唔會發生。」





雖然我唔明顧城嘅詩同Jacob所提議嘅方法，兩者間有咩直接關聯，但係佢講嘅嘢不無道理。

假若從不曾相愛，咁就唔會為離別而心痛。

Wendy同我係兄妹，彼此有血緣關係，我地喺埋一齊本身就係一個錯誤，呢段關係註定無法修成正果。

既然如此，由最初唔開始呢段感情，或者係對我地最好嘅選擇。

但同時都意味住，我將會連嗰半年嘅回憶都無埋。

所有嘢都會如粉筆字般，統統被抹走。
 
「點呀？呢個提議你覺得點？」

「嗯…你仲有無更好嘅提議？」我有點猶豫。

「無啦，我諗到最好方法就得呢個。」

最終苦無對策嘅我選擇信多一次Jacob，採用左佢嗰建議。