《我強姦咗個女同學》: 《我強姦咗個女同學》(十七.十六)

《我強姦咗個女同學》(十七.十六)

一日裡面，由普通朋友咁再做到好似拍拖咁，跟住嬲咗我然後我又嬲返佢，成日嘅經歷轉變大到好似坐過山車咁。

我以為夜晚佢會瞓返自己嗰邊，大家都各自靜下，估唔到佢臨瞓前又自己走過嚟我度，早知係咁唔訂兩張床啦。
我望下隔離俾執房職員舖到好整齊，但宛兒掂都無掂過，連袋都無擺落去嗰張床。

「你個位喺隔離。」

宛兒彈起身：「係喎。」然後攞埋個枕頭過嚟。



「你打算喺度啊？咁我過去喇。」

宛兒攞我隻手攬住自己。

「都未瞓，陪下我啦。」

「去隔離都一樣可以陪你㗎。」

「唔同，我想咁樣。」



「好，咁你繼續，我瞓喇。」

宛兒搞咗下我啲頭髮：「阿峰。」

「我瞓咗喇。」

「都未。」佢擺隻手喺我膊頭度：「你講你嘅嘢俾我聽吖。」

「你唔識我咩？仲有啲咩好講。」



「尋日我講我嘅嘢你知，你今日都要同我講你嗰啲。」

「咩道理嚟㗎，你都無講明啲規矩。」
然後，我講咗我屋企啲嘢俾佢聽。

係真係屋企。

喺我間房個窗度可以望到對面大廈，以前用咗成十年以上嘅睡床因為佢上次喺家俬舖度喊而換咗佢瞓嗰張，當然，我收到嘅貨係全新嘅，送嚟嘅時候仲有新家俬嗰隻木同油漆味，床單被舖亦都因為咁而換咗套嘅。呢件新家俬，同其他用咗十幾年嘅書檯同衣櫃有少少唔襯。而家每晚我瞓喺度就會望到門隔離個衣櫃，就會想換過個新嘅。門上面有個勾，同宛兒而家一樣咁會掛起一套第日著嘅衫。呢個習慣唔知係我學佢定佢學我，但慣咗又幾好咁。而家返工無特定著咩類型嘅衫，所以都可以襯得好隨意。

咁宛兒你呢？

我講講下問返佢。

宛兒無應我。



扮瞓嘅，我話佢。

佢呢晚無著到睡衣，而係著住件酒店嘅浴袍。啲質地又厚又硬嘅毛巾料嗰隻。

「著住件咁嘅嘢你舒服咩？」我摸一摸佢個背。

宛兒：「咁你係咪想我除咗佢。」

「邊係咁諗，你平時著開啲軟或者薄嘅衫，驚你唔舒服。」

「唔會㗎。」

「真嘅？」
之後，我睇佢個樣真係瞓著咗，搭喺我膊頭嗰隻手感覺好軟好重，佢今日已經瞓咗陣啦，仲咁攰嘅，反而我到而家都未想瞓住。但佢搭住我，又攞我隻手攬住佢自己，搞到我都唔敢立亂郁。



瞓唔著之下我望住佢，喺度諗其實我鍾意佢啲咩，對於以前個女朋友，都無感覺好似佢咁樣鍾意法，又唔係話好靚又唔係特别好，仲要成日突然有脾氣，係有時好嗲咁囉。


………………..