《我強姦咗個女同學》: 《我強姦咗個女同學》(十七.十一)

《我強姦咗個女同學》(十七.十一)


入到去，冷氣開到好大、好凍。

宛兒好快手咁攞咗我揸緊嗰隻紙杯掉咗落垃圾桶。
「劇院嚟㗎。」

「係吖，如果係展覽都可以睇下。」



「就算唔係都一樣可以睇吖。」
宛兒拖我去售票處度，買咗兩張最快演出嘅飛。

「今次我袋吖。」

「咁乖？」

宛兒靜咗一靜。

我見突然大家無嘢講，就問佢覺唔覺得好彩，咁啱嚟到就有嘢睇。



「都唔係，其實係套短片，唔知内容講咩呢，好似講外太空。」

「講咩都無所謂，一場嚟到咩都睇下囉。」

可能只有旅行先會做呢啲嘢，睇下風景、周圍無目的咁行下，感受同認識一個地方，呢啲嘢點會喺住緊嘅地方做吖。
宛兒聽我講埋呢啲無咩重點同内容嘅嘢，聽聽下，佢提我。

「夠鐘入場喇。」



「呢個時間好似無咩人咁，會唔會得我地兩個呢？」

「如果係，咁咪好恐怖？」

「有咩咁恐怖。」

宛兒攬住我隻手：「咁黑，得返兩個人，唔恐怖咩？」

「你咪當係間房或者個廳好大嘅地方度睇電視咁囉，早啲習慣下，第時你嫁到個有錢人住大屋就會係咁。」

「你覺得我會嫁俾啲咩人？」

唔知點解，雖然我好鍾意宛兒，但硬係覺得我唔會同佢結婚。

「唔知呢？你想？」



「嗯......諗唔到。」
入到裡面，大概有七十至八十個座位，係個細細地嘅放映院。

我同宛兒個位係位於中間再高一兩行嘅位。

坐低之後，宛兒除咗件外套，披晒喺我同佢身上。

「呢度凍啊，你著返件衫啦。」

宛兒喺件衫下面落起我隻手擺佢大髀上面。

「唔制。」

「咁你......」



「開場喇，唔好出聲。」

擺隻手喺佢大髀上面時，開頭都有摸下玩下佢啲手指，後來佢挨咗喺我膊頭度，好似想瞓覺咁，咁就無再搞佢，攞返隻手出嚟搭住佢膊頭等佢瞓得舒服啲。
套短片我有専心睇嘅，講太空啲嘢，成個畫面背景係種單純嘅黑色，聽講黑色都會有唔同程度嘅黑，有金屬類形、有偏藍、亦有暗紅。

如果係分咁多種黑色，咁會令人睇到其他顏色嘅黑色仲係咪叫黑色，定應該列返入去嗰隻色。
三十八分鐘之後，套片播完。

場入面原來有三個中學生坐我地後排一齊睇套嘢，估計佢地喺睇嚟做功課上面嘅嘢啩，一路睇嗰陣，佢地三個靜到幾乎無聲，好有家教咁由入場到散場都無傾偈講嘢，行路又無聲。

等嗰三個人走咗之後，我拍醒宛兒。

「起身喇。」



「做完喇？」

我錫咗佢一下，就好似以前每次瞓醒時咁樣：「係啊，好唔尊重囉，人地拍得咁辛苦你就走嚟瞓覺。」

「係咩？套嘢講咩？」
一路行返出去嘅時候，我講咗套片大概嘅内容俾宛兒聽，仲同佢講有三個學生同我地一齊睇。

「唔怪之得你無亂咁摸我。」

「我都唔係啲咁嘅人。」

「我知你想俾我瞓嘅。」

「知就好。」



「佢地套校服靚唔靚？」

「白衫黑褲，又可能深藍色，男仔衫都係咁上下，無女仔咁多款式。」

「嗯......你呢？以前校服係點？」

「白衫灰褲，女仔嗰套都唔靚嘅，就咁一條白色裙。」

「啊.......」

當我想問返佢套校服係點嘅時候，宛兒就話：「我地跟返嘉欣俾我地嘅行程，去步行街行吖。」

呢啲細嘢可以第日先再問佢嘅。

「啊，好吖。」

……………