原來真係有樣野叫「戲假情真」。: 六

「你哋都未食嘢架啦？」 

Koey這樣一問，肚子都響了起來，別忘記我今早一起來就趕著出來，根本沒時間吃早餐。 

「未呀。」 
「我食咗個生果。」 

「都肚餓架啦，我去買嘢比你哋食。」 

或者幫人家拍片其中一個好處，就是有免費午餐吃。 





「我食唔到咁大盒飯架。」 

Angela說。 

「交比佢啦，一睇就知焚化爐。」 

Koey看著我說。 

「喂，你哋洗唔洗飲嘢？我買埋比你哋呀。」 




「唔洗啦，我有茶飲。」 

「你唔洗講啦，我去買埋你嘅。」 
「多謝哂Koey姐。」 

又只剩下我和Angela獨處。 

跟一個人相處久了、彼此熟悉了，跟她或他在一起走著走著不說話也不會覺得不自然。但現在我和她兩個人不是太熟又要在一個密封的環境坐在一起，而相對無言的那種感覺，真的有點兒讓人懢尬。 

於是，我決定打開話匣子。 





「點解你會帶茶返學咁搞笑嘅？」 
「有咩咁搞笑呀。我好易眼瞓架，所以咪每日都沖定茶飲提神囉。」 

「仲有喱樣。」 

她在袋裡拿出一盒薄荷糖，然後遞了一粒給我。 

「你平時就係靠喱兩樣嘢嚟吊命架啦？」 
「係呀。」 

「比著我就直接瞓啦，哈哈。」 

想不到就一天短短的拍攝時間，我會知道了那麼多她的小習慣和小故事。

「跟住喱場呢係講放榜，咁Angela就梗係胸有成竹，而你呢就要走埋去扮自己炒咗，之後再話返比佢知你夠分升原校，咁佢就好開心攬住你啦，因為你有得升原校，一齊讀預科就可以拍拖啦。」 

我倆都很用心的聆聽著Koey所說的一字一句，唯獨是讀到『好開心攬住你』那時，我和Angela的眉頭都不禁皺了起來。 

「不如你哋睇吓啲對白，跟住試吓dem一次先啦。」 

我們互相對著稿練了一次，然後決定就位試一試。 

「唉，無啦無啦。」 

我就到Angela的身邊。 

「吓，真係炒咗呀？」 
「講吓笑咋，你睇吓，我十六分呀，可以升返原校呀。」 





然後我和她對望了一眼，不動聲息。 

「哈哈哈。」 

我和她也笑了出來。 

「點攬呀無啦啦。」 
「咪係囉，無啦啦攬咩嘢。」 

我們一起向著Koey控訴。 

「我諗Jimmy應該係諗住女仔知道男仔竟然升到原校嗰陣好興奮，情不自禁攬住咗佢。」 
「呀！不過算啦，唔知Jimmy喱段寫咩架，唔攬都無所謂啦。」 

說實話，要我攬攬當然沒有大不了，但這種感覺也太奇怪了。不是說我沒有演員的專業（雖然我並稱不上一個演員），而是 ... 真的很奇怪。擁抱，對我而言其實是很溫馨、親密的舉動，這樣在戲中要擁抱，就是沒有那種真正擁抱應該要有的感覺。

「咁今日辛苦哂你哋啦。」 

「唔辛苦。」 

口裡說不，身體卻很誠實。一整天又坐又近，雖然說不上什麼體力勞動，但確是疲倦。不過，我知道Koey姐一個人要照顧那麼多東西其實也很辛苦；不過，也只能怪這份功課太麻煩。 


「你哋係咪走啦？」 
「呀，我約咗人。」 

呃 ... 當我聽到Angela口中說出這一句的時候，心中竟然有點不是味兒。 

「咁你走先啦，whatsapp再連絡你。辛苦哂。」 




「好啦，byebye。」 

就這樣，我和Koey就向左走，Angela就向右走了。 


「喂，Alex你住邊架？」 
「大埔呀。」 
「我都係啵。」 
「咁你咪可以陪我搭車囉。」 

在車程上，她以一個學姐的身份給我訴說了很多系內的事，人與人之間的、關於學業的 ... 

「咁你依家有冇女朋友呀？」 

這一下真的有點突如其來，我望了Koey一眼，有一刻懷疑她對我是否有不軌的企圖。 

「喂，咩樣呀你。我有男朋友架。」 
「呼 ...」 

我鬆了一口氣。 

「無呀，我依家冇女朋友呀。都散咗年幾嚕。」 
「哈哈。」 
「笑咩呀你。」 
「唔知Angela有冇男朋友呢？」 
「有又點，冇又點？」 
「我喺度諗緊，唔知喱份功課會唔會撮合到你哋之嘛。」 

係呢，唔知 ... 會唔會呢？