《你以為Flycation呢件事真係咁簡單？》: 五十三、去留
當楊格問出這個問題的時候，我感覺到自己的心臟猛跳了一下。
同時，我回想起剛才我們之間的對話，我馬上就發現了自己說話中曝露了自己身份的破綻。
「頭先你係特登講起你張卡片嚟引我落搭？」我問了一句。
楊格似笑非笑地點了點頭。
楊格給我卡片，是遠在我們第一次在機場巴士上相遇時發生的事情。
換言之，正常情況下，「善界」的周渡廷根本就不可能知道這件事情。
所以楊格刻意在說話中提起這件事情，明顯地表示他是刻意想套我的話。
可是，既然他刻意套話，代表他在更早之前已經對我的身份有所懷疑了。
哪麼，到底他的懷疑是從何開始的呢？
「點解你會刻意引我落搭？你幾時知道我身份？」我將心中的疑惑問了出來。
楊格展露出一個淺淺的微笑，並說：「呢幾日我喺醫院無所事事，所以不斷諗翻起『惡界』發生嘅事。其中一幕我好深刻嘅係，當我哋最後俾黑衣人追到去海邊，我仲猶豫緊係咪要冒險跳海嘅時候，你當時問咗我一句：『你唔係要翻去見你爸爸媽媽咩？』當時，呢句說話真係好鼓勵到我，但係事後諗翻我就覺得有啲唔對路。
如果你係『善界』周渡廷，你又點會知道我爸爸媽媽嘅事呢？而我亦都唔太相信，短短喺地牢嗰五分鐘，你哋兩個周渡廷會浪費時間嚟講我嘅身世。知道關於我爸爸媽媽嘅事嘅人，就只有喺酒店房入面聽過我分享、同我一直以嚟出生入死嘅周渡廷。所以就係由我諗到呢堆嘢嘅嗰一刻開始，我就想搵個機會去試下你。
果然，我係無估錯嘅，你的確唔係『善界』嘅周渡廷，而係同我嚟自同一世界嘅阿廷。」
楊格的解釋讓我明白，原來，我的破綻早就被他識破了。
與此同時，我不禁想到，到底殷琳會否也已經看穿了我的身份？只是因為她擁有「善界」的善良而不忍說穿？
「無錯，我的確只係扮緊『善界』嘅周渡廷，當然我咁做係有原因嘅。」當我說出這句話時，雖然是一句自曝身份的說話，但我內心卻有一份如釋重負的感覺。
然後，我開始說起跟「善界」周渡廷交換身份的始末，而過程中楊格聽得相當入迷，臉上也變化著複雜的表情。
「成件事，大概就係咁。」花了大概十五分鐘，我終於將事情交代好了。
「嗯。」楊格皺著眉頭，閉合嘴唇，似是仍有說話想說未說。
「你有嘢想講？」我見狀，問了一句。
楊格沉默半晌，然後才說：「其實，當我知道死嘅唔係你，我真係好開心嘅。始終，同我出生入死、共渡患難嘅人係你而唔係『善界』嗰個周渡廷。我亦都好多謝你信任我，唔介意將你嘅身份同背後嘅原因講哂俾我聽。只不過，我而家有一件事好想做。」
「你想做咩？」我好奇地問。
楊格認真地望向了我。
然後，他陡然地向我揮出了一拳。
這拳來得太過突然，我完全沒有防備之心，所以臉上就被結結實實地打了一拳。
口腔內，我感受到陣陣的血腥味。
即使如此，我並沒有感到憤怒，我只是靜靜地看著楊格。
我知道一向樂觀率性的他突然有此行為，背後必然事出有因。
楊格瞪視著用手捂著痛處的我，臉上不無忿怒地說：「明明你就係一路都認識我嘅周渡廷，咁你應該知道我有幾想翻屋企見我阿爸阿媽㗎啦，點解你要搞個咩『新民計劃』出嚟？而家仲要講到喺佢哋身邊有『惡界』嘅人扮成我，咁唔係更加應該俾我翻去咩？」
「『新民計劃』唔係我建議嘅出嚟嘅……」我緩緩地解釋著，也冷靜地看著楊格，「而且湯浩禾講得有道理，如果而家貿貿然翻去本來嘅世界，我哋都唔知『惡界』嘅人會點，反而可能令到自己有危險。而且，湯浩禾建議『新民計劃』都係想幫你哋啫，話哂呢個地方咁好……」
「好又點？呢個地方再好，都無我阿爸阿媽喺度，咁又有咩意思？」楊格激動地打斷了我的說話，「你而家嘅身份係『光僕』總司令啊，你唔係應該有能力去叫你班手下去我哋世界趕走哂『惡界』嘅人嘅咩？」
「平行世界嘅平衡唔係咁簡單，以『善界』嚟講，佢哋一直以嚟都係選擇保護全個『善界』嘅人為主嘅做法，所以對於我哋嘅世界，佢哋只可以靜觀其變……」我無奈地說著。
「咁你呢個總司令即係廢㗎啦？」楊格「哼」了一聲，雙眼圓瞪顯示出他內心中極為憤怒，「都唔緊要，至少你俾我自己翻去吖。而家嗰個湯浩禾仲要話，如果我因為擔心家人安危，佢哋可以嘗試幫手將我嘅家人都轉移埋過嚟『善界』永久居住。但係唔該，無人想加入你哋個『新民計劃』隱姓埋名啊！淨係救家人，咁朋友呢？我一直以嚟建立嘅事業呢？我想講，我而家淨係想翻去救人咋，但係嗰個湯浩禾都話要等風險評估出咗，確認送我翻去呢個決定係安全嘅，佢先肯俾我走。大佬，等得嚟都天光啦！你作為總司令，可唔可以做少少嘢啊？你唔擔心自己老母嘅咩？」
其實，我能夠明白楊格的心情。
畢竟，對於自己的母親也同樣有「惡界」的人在她身邊，我是難以安枕的。
可是，此刻的我，卻根本對這情況無能為力。
正當楊格打算再開口痛罵的時候，旁邊就傳來了一把溫柔的聲音：「兩位唔好意思，Nic先生嘅病房已經準備好，兩位可以上去探病喇。」
我定睛一看，原來有一位身穿白衣的護士正笑容可掬地站在我們身旁。
她的說話，使我們暫時放下了討論，把嘴閉上了並跟她一同前往病房。
病房門一打開，我便看到躺在病床上的Nic。
此刻的他臉色依然偏白，一副大病初癒的樣子，而平日細小的眼睛此刻看來只剩下了一條線。
當他看見我和楊格的時候，他臉上露出了一絲有氣無力的笑容向我們表示歡迎，並等我們走近病床時，氣虛力弱地對著我說：「你就係救我嚟呢度嘅周渡廷先生？多謝你幫我，我俾你救嘅受傷睇唔清楚，而家睇翻，發現你同我之前嗰個又係叫周渡廷嘅朋友真係好似！」
聽著Nic的說話，我知道他仍未知道我的真實身份，所以馬上暗地向楊格打了一個眼色，示意他不要道破。
「係啊，平行世界就係咁㗎啦！人有相似好正常。」我敷衍地笑著回應說。
「係啊，我唔止多謝你救我，我仲多謝你嘅『新民計劃』。」Nic真誠地笑著說。
此言一出，我和楊格都意外地看著他。
「我尋日醒翻之後，我就收到『新民計劃』嘅消息。為咗了解呢個世界，我特登喺醫院附近走咗個圈，我發現，呢個世界真係好到無得頂。而且湯浩禾都話，可以接埋家人過嚟住，對我嚟講，我只係想可以平平安安過好我嘅人生，咩世界並唔重要。所以，我可以住喺『善界』，都係全靠你嘅『新民計劃』咋。」Nic說起話時氣若懸虛，但提到「新民計劃」時總是在臉上略現神采，相信他確實對於可以遷居「善界」一事相當雀躍。
「吓？但係住得呢度，你就要咩都重新開始喎，事業身份咩都無哂，你都肯？」楊格在我身邊帶著質疑的語氣說著。
「事業、身份都唔重要，最緊要人平安。」Nic一邊說，一邊展露出安詳的笑容，「我諗過，如果我真係成功住喺『善界』，我會請湯浩禾幫我將我喺本來世界嘅一半資產，轉俾我死鬼兄弟盧竟光嘅屋企人，當係報答佢哋。做埋呢件事，我相信我就可以放心喺呢個地方住落去。」Nic將想法娓娓道出。
我想，既然他連後來的安排也有了，他應該對自己居住於此地的想法也頗為肯定了。
而楊格應該也跟我有相同的想法，所以他也再沒有對Nic的決定提出質疑，只是繼續陪笑和說著閒話。
探病的時間，只是短短的十五分鐘，然後醫生就邀請我們離開讓Nic可以休息。
我和楊格一直相對無言地從病房走到醫院的門外，然後楊格就停下步來。
我看著他沉思中的表情，我知道他一定有話想說。
果然，片刻之後他便呼出了一口氣，然後抬起頭看著我，並說：「我可以好肯定咁話你知，『新民計劃』，我係一定唔會接受嘅，我一定要翻去本來嘅世界。如果你無因為扮『善界』人扮得太耐而唔記得咗本來嘅世界，唔該你，快啲諗辦法俾我哋翻去。我嘅屋企人等緊我，你嘅屋企人亦都等緊你。」
我完全明白楊格的說話，可是當我同時也明白湯浩禾提及過關於「善界」的考慮時，我實在深感左右為難。
楊格見我對他的說話沒有反應，無奈地歎出了一口氣。
「當初我哋喺『惡界』由一個人都無嘅油麻地行去旺角再行翻去紅隧，一齊逃出生天，一齊去蒲台島，一齊跳海，即使識咗一個星期都唔夠，但都算係一齊出生入死過嘅人吖。我好記得，我哋互相都救過大家條命，我亦都數唔清邊個救邊個多啲，但係而家，你當我欠你一個人情，你幫我吖，你俾我翻去本來個世界吖，即使而家嚟咗呢個世界嘅香港有幾好，但係我都係掛住以前嗰個有朋友、有屋企人、有我熟悉嘅一切嘅香港多啲啊……」
說到這裡，楊格竟然落下淚了。
看著他聲淚俱下的樣子，我也不禁一併心酸。
「我明，我真係明，只係我哋而家嘅世界可能真係比你想像中危險……」我試著伸手輕拍楊格作出安慰，卻給他一手撥開了。
「如果你屋企俾人破壞緊，你會寧願轉去住一間新淨大屋當無事發生，定係翻入屋企阻止佢哋？」楊格凝著眼眶中的淚水，冷靜地看著我，「我肯定，我會翻去。」
留下了這句話後，他沒有擦去淚水就頭也不回地離開了。
我站在原地並沒有挽留他，因為我知道此刻自己的身份根本就不可能安慰得了他。
我也相信，如果我是他，說不定我也會如此激動和歸心似箭。
只可惜，現在的我，是「善界」的周渡廷，也是「光僕」的領袖周渡廷。
我知道「新民計劃」的出發點和限制，也同時明白楊格的急躁與無奈。
可是，我卻找不出兩全其美的方法。
我記得真正的「善界」周渡廷曾經說過，人只有相信自己的選擇已是最好，才會有信心走向下一步。
可是，如果像我此刻連難以作出選擇時，我又如何相信自己的選擇是最好的呢？
可惜，「善界」周渡廷已經不在我的身邊。
而剩下的這一個周渡廷，也就是我，卻沒有能力去解答這個問題。
所以我只可以呆站在原地，諷刺地感受著撲面而來、「善界」溫柔的風。