多謝OPEN DAY，令我鍾意咗妳: 第六章
「Hello，玩得好唔好開心呀你？」我細佬成個撲咗落我度。
我同雲雲一攞完行李行出去接機大堂，就見到我哋啊媽，同我細佬。
「嗯。」我攬返住我細佬。
「玩得開心就好啦。」我啊媽喺後面講。
「不如一齊去食飯啦，而家七點幾。」雲雲媽咪接住講。
「唔～好呀～」我同雲雲一齊點點頭講。
跟住兩位啊媽就各自獨自帶頭行去搭S56去東涌食飯，我同雲雲行後面，細佬跟咗我啊媽行。
「你覺唔覺……有啲奇怪呀？」雲雲拉一拉我件衫問。
「唔～」我微微點一點頭。
其他人睇或者唔覺，覺得好正常，但係如果係睇自己啊媽嘅，一眼就睇得到。
點解佢哋兩個會各自行唔傾偈嘅，我啊媽平時好鐘意同人講嘢，好善談，有咩可能唔講嘢架！
「有啲……有啲唔妥。」我晝住眉頭咁講。
恐怖、不安充斥住我哋，就連吸啖氣都驚啲。但願，只係我哋諗多咗。
返到出東涌揾咗間餐廳坐低食之後，我阿媽開始嚴肅咁講……
「琴日加拿大Albert College嗰邊send咗message嚟啦，佢accept咗你啦。」
「吓真係架！？好嘢！」我興奮大嗌，但係又即刻覺得有啲唔妥。「咦咪住咪住，我幾時可以去讀呀？」
喂唔好呀……唔好而家呀，我要同雲雲一齊多陣呀。
係，雖然問心我真係好想過去嗰邊讀，上年我跟交流團去過Albert College，嗰度真係我夢寐以求嘅中學。
但係我而家寧願留喺香港同雲雲喺一齊呀！就算嗰度有幾靚有幾好，都唔夠雲雲靚，唔夠雲雲好。
大家唔好話我諗都唔諗就自己表白，然後又自己走鬼咗去加拿大，我諗都冇諗過佢會收我啲又差又唔聽書physics又唔合格嘅學生。
不過現實係，我嘅夢想竟然成真咗！
「今個9月，所以即係後日夜晚我哋就會搭飛機去加拿大。」媽媽面無表情講。
只可惜，我而家嘅夢想唔係去Albert College到讀，而係想同雲雲一齊。
「吓……」我同雲雲一齊「吓」咗出聲。
「哈哈……」雲雲阿媽無啦啦壞笑喺咗上嚟。「跟住就到你啦喎晞晴，唔使咁驚訝架一陣。」
「你知唔知你右手手臂條疤係邊個整架？」雲雲阿媽問。
「哼，記仇到。」我阿媽講。
唔通……唔通……唔通……
「就係坐你隔離嗰位啦。」雲雲阿媽毫唔修飾咁講。
「係……係……原來係你呀！！！」雲雲驚訝咁講。
哈哈哈哈，今次噩夢同夢想都一次過成真啦。
［雲晞晴幼稚園K3時候視覺］
「我要同希希落去下面玩呀！」我拉一拉媽咪隻手。
「好呀，你等等呀。」媽咪攞起部電話擺咗埋耳邊。「毛太，今日得唔得閒呀？我個女話想同你個仔落去下面公園玩呀。」
「好呀，咁我而家帶雲雲落嚟啦。」媽咪等咗陣講。
落到去樓下嘅公園，熟悉嘅面孔出現喺我面前。
呢個公園唔算大，但係就起得好靚。公園中間有個魚池，魚池中間仲有個涼亭，隔離有棵松樹。除咗魚池，呢度仲有瀡滑梯、石春路等等，都算配套齊全。
「咦，雲雲好靚喎今日！」希希媽咪温柔烏低身望住我講。「我哋買咗架無人機呀，你同希希一齊玩吖。」
「係呀，你睇下。」希希好配合咁攞架無人機出嚟。
其實架無人機只係一架好細架嘅小型四軸飛行器，同埋無鏡頭，淨係攞住個類似PS4咁嘅遙控嚟控制。
「嗱，你首先呢，就將個桿拉咗落左下面先……」希希細心咁教我。
「嘩，好得意呀。」我學識之後就真係試下起飛，跟住就控制到架無人機向前向後，向左向右，向上向下飛。
而當我哋興奮咁玩緊嘅時候，兩位阿媽即刻行埋一邊坐低閒話家常，講下揀咩小學，講下間小學功課多唔多咁。
我同希希因而變得無皇管，所以……
悲劇就往往喺呢啲時候發生。
「喂，你玩咗好耐啦，到我啦。」希希唔耐煩咁同我講。
「咩呀，你平時都有得玩啦，比我玩多陣啦。」我都開始唔耐煩。
「比我呀！」希希開始郁手嘗試搶我手上嘅遙控。
「唔呀！我要玩呀！」我轉身背脊對住佢唔比佢搶到遙控。
就喺呢一刻，由於我忙住同希希爭遙控，所以遙控就冇人控制，而且可能仲比我亂咁將枝桿推嚟推去，無人機一嘢刮咗落我隻右手手臂度。
由於架無人機嘅螺旋槳片係冇嘢保護，即係槳片外圍冇護罩，所以塊高速轉動緊嘅螺旋槳片就令我右手多咗條永久嘅疤痕。
我喊咗好耐，因為真係好疼。大量嘅鮮血從我隻手上留出嚟，足以形成條血軌，由傷口一路到手指尾。
從傷口走出嘅血一路跟住前血（之前嘅人叫前人；之前嘅血叫前血）開通路線係咁流係咁流。唔知啲血係咪太耐不見天日，竟然撳咗五分鐘先止倒。
搞掂完我之後，兩位阿媽無啦啦開始嗌交，細個嘅我同希希都唔知佢哋喺度嘈乜，淨係好似轆木咁棟咗喺度。佢哋好似話係我阿媽話係希希整到我，要佢負責；希希阿媽就話係我嘅問題，因為我唔比佢玩。
跟住，佢哋就好似真係嗌起咗交嚟，我就再冇見過希希。
［雲晞晴現在2021年暑假視覺］
「吓……吓……吓！？」我驚訝到不得了。「原來係你整架！？」
原……原來係你呀！！！雖然已經咁多年我已經差唔多對呢件事違忘，而且開始接受，但係而家我真係冷靜唔倒。
「對……對唔住。」希希同樣驚訝，不過都不停道歉。
跟住，我哋就各自返咗屋企。
沖完涼阿媽同我講：「所以唔好幫同嗰個衰仔一齊啦，唔係嘅話可能你塊臉有多條疤都唔定架！
我知你而家失戀好唔開心，但係你都要顧及下自己先得架，又多條傷痕你自己都唔開心架，唔好感情用事。
繼我話你同阿賢啦，佢又識錫你又識睇住你，同佢喺埋一齊我就安心啦。
總之唔可以再同毛仁希一齊呀，你同佢唔會一齊架。」
「……唔……」我冇嘢講。
撻上張床度，當然轆嚟轆去都瞓唔着。
唉，我都唔知應唔應該嬲好。一方面我又真係勁嬲整傷我嗰條友，冇啦啦喺度刮傷我。但係另一方面我知道係希希整傷我，我又突然可以怒氣全消，佢可以無罪特赦。
諗返佢對我咁好，咁錫我，我又同佢一齊經歷過咁多，我又真係嬲唔落。
佢做過對我好嘅嘢又完全可以完美咁冚住哂我條疤。
所以而家就好似變咗我外在嘅軀殼要我憎希希，但係我內心其實一啲都唔憎佢。
我應該，點好？
或者學炭治郎咁講？心係人嘅原動力，要仔細聆聽自己心裏嘅聲音？（鬼滅之刃第一季動畫第26集）
唉算啦好攰呀而家，好眼瞓……好眼瞓……
第二日醒返，係晏晝12點幾。
醒返第一個念頭，就係想去見毛仁希。
我即刻走去阿爸間房到問佢可唔可以出去，但係佢竟然唔喺度，落咗去下午買lunch。
等佢返返嚟之後我即刻捉佢入房問佢：「我想出去揾毛仁希呀，我出去啦。」
「喂喂喂，等陣先。」但係阿爸即刻叫停我。「媽咪而家喺屋企呀，佢都唔會比你出去架啦。」
「咦係喎。」我諗深一層又覺得係。
「唉其實呢，你係咪真係咁鐘意佢呢？」阿爸冇啦啦問我。
「係呀，你又唔比我出去呀？你哋個個都唔比我出去，點解要咁樣限制住我姐？唔好話比我知咁樣係對我好呀，咁樣只係親情綁架咋，對我一啲都唔好囉。佢走架啦，佢要去加拿大架啦，點解見一見佢，見一面都唔得姐？」
「我唔係唔比你出去，我係想你諗清楚，係咪真係鐘意佢，唔好三分鐘熱度。你知啦，如果你都係揀佢嘅話你媽咪就一定唔鐘意架啦，所以你要諗清楚。不過見你咁講即係諗得清清楚楚啦，咁就記住啦，唔好之後又放棄佢呀。」
「呃，對唔住呀，我頭先太激動……」
「一陣五點度，你媽咪就會出去，你就趁嗰時出去啦。跟住嘅嘢，就比我啦。」
轉眼間下晝五點鐘，我懷著阿爸嘅一句話衝咗出屋企，即刻去揾希希。
「記住諗清楚自己跟住要做咩，心思熟慮之後就唔好後悔啦。」阿爸摸摸我個頭講。「『我哋因為守護所愛嘅人事物而脆弱，但亦因為佢哋而強悍。』——《鬼滅之刃》。」
佢約咗我去東涌，我唔知點解係呢度，不過唔緊要啦，見到佢我就算要去到天涯海閣我都要去。
一路搭緊東涌綫嘅時候，我不禁拎轉頭望出塊玻璃，今日個天真係灰暗到不得了，都唔知話係天助我也定係天意弄人，呢片天空竟然同我嘅心情連埋咗。
我想見到你呀希希，就算我要同阿媽關係疏離，就算要我同你只可以視像，zoom、google meet都好，我都唔可以冇咗你。
雖然衰啲講句，你唔係好似啲電視劇、小說、動漫咁係喺我啲咩低迷時期都出現，係喺我生活平平常常咁出現，但係卻比咗我又平平常常變到起起伏伏嘅經歷。我哋一齊去過海洋公園，一齊去過旺角銅鑼灣，一齊去過布吉，都係我青春中嘅不平常。
呢啲咁嘅甜蜜經歷，已經唔可以被任何人抹走。一齊嘅經歷，寫低咗拍低咗影低咗，但係，依然唔及刻低咗喺心裏面甜蜜。
佢哋唔係寫喺手上咁簡單，而係已經刻在我心底裏面。
係——刻在我心底的記憶。
所以我更唔可以冇咗你，我唔要令生活變返以前嘅無無聊聊。
「海內在知己，天涯若比鄰。」我哋好快就會分開，一個喺亞洲嘅香港，一個喺北美洲嘅加拿大，但係我相信我哋嘅心靈一定係連繫住，用愛去深深連繫。
［毛仁希視覺］
我拖住雲雲温暖嘅左手。
我幾驚，驚雲雲嚟唔到，咁我就連去加拿大前最後見佢嘅機會都冇咗；驚見到面之後唔知講咩，對唔住，定係咩？
「唔好意思呀，我遲咗……」雲雲仲同我道歉。
「傯妹，我點會怪你。」
我哋長途跋涉嚟到東涌唔係冇原因，只因我想帶佢去一個地方。
「食咗嘢先啦，你都肚餓啦。」我哋行入東薈城食晚飯，然後去東涌站巴士總站上車。
沿途我哋都冇乜點講嘢，處於極度沈默嘅狀態。人哋睇落都以為我哋嗌緊交。
我哋上咗11號（新大嶼山巴士），巴士一路由市區慢慢行轉入村屋，然後上山，開始上「過山車軌道」。
天色越嚟越暗，可惜今日多雲，睇唔到日落。
好快到咗下橫壟，就係我哋嘅目的地——水口。
入到水口，天色已經完全昏暗，好彩我哋有手機電筒，唔係嘅話真係咩都睇唔到。
「唉最衰咁多雲啦，唔係嘅話就應該可以好似我哋喺布吉咁睇到星星。」我歎氣。
我哋行出冇水嘅地方坐低，就好似，我哋喺布吉卡隆沙灘咁。
「好似我哋喺布吉嗰晚咁呀呵～」雲雲同我諗嘅嘢一模一樣。「之但係，咩都唔同哂。」
相信唔識讀心術嘅人都會清楚聽到雲雲講呢句嘢時候嘅傷感。
「你覺得，我哋仲可唔可以繼續一齊到？」我平靜咁問佢。
「唉……」雲雲靜咗幾秒之後答我。「呢樣嘢我都諗咗成日。如果我要咁任性同你繼續喺埋一齊，我就會同阿媽嗌交；如果我要咁任性同你繼續喺埋一齊，我哋就冇得好似而家咁朝見晚見。
不過，呢啲失去嘅，都唔夠你！」
我哋四目相投，唔眨眼咁對望住。
「我想繼續同你一齊呀，異地戀咪異地戀囉！同阿媽嗌交咪同阿媽嗌交囉！信我啦，我哋一定會一齊倒架，去到大個唔會散！」雲雲哽咽。
「但係，如果我哋仲要咁任性一齊，咁就會要犧牲好多嘢……」我已經唔夠膽望住雲雲。
雖然我私心都想繼續唔理一切放任同佢一齊，但係咁樣代價實在大到不得了，所以……
所以對唔住啦雲雲，我哋唔可以咁自私……
「係，但係我哋都唔忍心呢一年嘅經歷就咁灰飛煙滅架！我唔會，我唔會就咁就完呀！」佢突然雙手捉住我塊臉，將我塊臉擰向佢。「點都好，係我錯都好，我都要同你喺埋一齊！」
我終於再次明白到原來我呢個人喺雲雲心中有幾咁重要，雖然已經知得太遲。
「愛」呢門嘢，原來愛得深嘅話就唔可以話冇就冇，話散就散。因為，我哋嘅心，已經緊緊連繫住，任何人都無法干涉。
算啦，我都係想繼續自私落去啦咁樣，我都唔想冇咗你呀！
「唔~我應成你！我一定唔會揼低你，我哋一定可以繼續落去！」我望實雲雲答。
「一起長大的約定 那樣清晰 打過勾的我相信 說好要一起旅行 是妳如今 唯一堅持的任性…」
「嗱你話架，唔準呃我呀！」雲雲捉住我隻手講。
「唔呃你，呢條係《水口約例》。」我講。
「嘻嘻～」我哋相繼而笑。
「以後記得多啲返嚟呀！」雲雲講。「唔好拋低我一個人喺香港然後自己就走咗去加拿大。」
「唔～我一定會得閒就返嚟，隔離21日都返嚟！」我應承你，我唔會拋棄你。「『無論你喺世界嘅邊個地方，我一定會，再次去見你架。』——《你的名字》。」
「嘻～」雲雲甜甜一笑。
「『因為唔願失去你，所以寧願世界繼續瘋狂落去。』——《天氣之子》。」雲雲講。「我寧願屋企變地獄，阿媽變魔鬼，世界變瘋狂，我都唔可以同你分開。」
「銀河上 邊跌宕邊看緊對方 跨宇宙又橫越洪荒 不怕在盡頭無岸 遠近我都護航 還能互安慰 不必天氣多清朗 狂雨暴雪一起對抗 任歲月再壞 不致心慌～」
原來，有個對自己不離不棄，又將自己攞到好重要嘅人係一件咁幸福嘅事！
「我冇一日懷疑過你，而家都一樣相信你，今後都唔會變。」——《刀劍神域》
「有冇咁誇張呀，我唔想喺條JR路軌上面跑去個鳥居度飛上天喎。」我講笑。
無錯，雖然呢度唔係《天氣之子》；唔係《刀劍神域》；唔係《你的名字》，我唔會喺嚿雲到飛落嚟；唔識二刀流；唔會唔記得咗對方個名，雲雲唔係晴女；唔係血盟騎士團嘅副團長；唔會炸爆個變電站。
但係我哋都可以比帆高陽菜，比桐人亞絲娜，比瀧三葉幸福！
滴……
我哋互相攬住大家。
滴滴……
我哋互相擁吻。
滴滴滴……
我哋心連心。
滴滴滴滴滴滴……
「唉，真係落雨！」我望住傷心落淚嘅老天爺。
「祈禱吖！」雲雲捉住我隻手合十，望上天空。「我相信一定會雨過天晴嘅！」
「吓！？但係而家夜晚嚟架啵，點『晴』呀？」
「嘻嘻……」雲雲仰天微微一笑。「咁我哋就等到出太陽晴天啦。還掂你係聽晚先飛呀嘛，咁我哋就一齊到聽日啦！」
「你真係黐線架……」我無奈一笑。
不過，我都幾鍾意。
我哋跟住安靜喺嚟，繼續雙手合十向天。
滴滴滴滴滴滴滴滴滴滴滴滴滴滴滴滴滴……
滴滴滴滴滴滴滴滴滴滴滴……
滴滴滴滴滴滴……
滴滴滴……
滴滴……
滴……
……
「吓唔係啩！？真……真係……雨過天『晴』！？」我驚訝到口窒窒，望下星星，又望下雲雲。「『下呢安娜』（晴れ女，晴女）！？」
「唔～」雲雲點一點頭。「『嘩打絲蛙』（私は，我係）」
「吓！？」我若有所思望住啱啱橫過我哋傷心落淚嘅一大嚿積雨雲。「你唔會一陣就飛咗上去啩？咁睇嚟，上面又真係似有個青青草原啵……」
「你好想我飛上去咩吓！？」雲雲好似好嬲咁望住我。「好唔想見到我咩！？」
「唔係唔係唔係，根係唔係啦，『而耶而耶』（いいえいいえ，唔係唔係），『阿呢呀阿呢呀』（아니다아니다，唔係唔係）。」我連忙解釋。「我係話我哋一齊飛上去呀……唔係淨係你上去呀！」
「好啦，今次信你啦。」雲雲滿意點一點頭。「但係你話架，我哋要一齊飛上去呀，唔可以食言！」
「『嘩加打嘩加達』（分かった分かった，知道）。」I promise you!
講咗咁耐無聊嘢，吹咗咁耐水，我哋終於口乾，一齊好有默契咁抬頭仰望明亮嘅星空。
終於，好似布吉咁，睇到星星！
繁星密布嘅夜空，映入我哋眼簾。無數粒珍珠無規律閃爍起嚟，雜亂但唔令人討厭。
呢個滿天星斗嘅天空，足夠消耗我哋十五分鐘嘅青春，放鬆十五分鐘。
「雖然布吉嘅星空係我見過最璀璨嘅星空，但係我都係最鐘意香港嘅。香港雖然冇布吉咁靚，但係都比佢好。」雲雲講。
「唔～」我同意。
突然，有個浪衝到上嚟我哋隻腳到。由於我哋除咗鞋，所以feel到個浪嘅温暖。
「起身啦，落水玩！」雲雲見狀就扯我起身。
「我同你講都冇帶泳衣……」我無奈咁講。
我突然諗到啲嘢，然後望住佢。
「唔著咪得囉，呢度得嗰少貓三四隻咋嘛～」說罷雲雲就伸手除咗佢件上衣佢。
「喵～」
雖然雲雲講嘅「少貓三四隻」，但係佢絕對係形容緊貓，呢度水口係真係淨係得幾隻野貓，而人影就一個都見唔到。
「吓～」我都係唔係咁想啵。
「唉～」雲雲已經除淨啲內衣褲。
突然，佢伸手將我件衫拉起，拉過隻手除咗我件衫。
「喂呀！」
「唔～你唔係唔同我除衫玩水呀嘛？」雲雲扁住嘴噗固頭埋嚟用嬌慎嘅聲音講。
好……好可愛呀！
「哦唔係，梗係同啦！」試問我有拒絕嘅權力同機會咩？
「嘻嘻～」雲雲暗笑一聲，然後再除埋佢僅餘嘅衫佢。
踏入水度，有種喺布吉嘅感覺。雖然布吉嘅沙灘更靚，更水清沙幼，但係，我都比較鐘意香港嘅。
「濺…」雲雲一手將水潑落我度，搞到我塊臉又係沙又係水。
「你好嘢！」我立即回敬佢。
一輪潑水大戰立即展開，現場坐無虛席，有三四隻貓。
嗰幾隻貓咪就睇到「喵喵」聲，睇嚟睇得勁興奮！我同雲雲就玩到手攰，久久舉唔起手。
「嘩，好攰呀！」我同雲雲玩完之後就瞓咗起啲沙上面，微風輕輕吹過嚟，好舒服！
「我哋今晚係咪咁攤喺瞓呀？」雲雲翻身望住我。
「唔～而家都冇車返去啦，咪喺度囉。人一定要有次難望嘅經歷吖嘛。」我同雲雲講。
「喵～」有隻白貓好似認同我咁。仲爬咗上我個身度企喺身。
「嘩你做咩呀你？」我竟然同隻貓對話。
我坐返起身，隻白貓攤咗起我兩隻大脾度。
雲雲見狀坐埋咗我，順勢輕輕撫摸下隻貓。
「考Q呀！」隻貓被雲雲摸咗幾下之後再放鬆啲身體，繼續比我同雲雲摸。
摸多陣之後，我哋就瞓低返攬埋一嚿瞓着咗
……