毒撚大挑戰之女神要離開了！？: 拾柒(終章)-十年之後

轉眼間又十年。

呢十年嚟，我由一個中學雞變成大學生，再變成一個打工仔。住嘅地方都由大西北轉到九龍市區，但係都係逃唔過一般打工仔屌觀塘老母嘅命運。

呢一日，我選擇返小學探嗰兩位老師。喺路途上，遇到好多母校嘅學生。

「撩撩撩。」

「灑B。」





「lee友豆煙讚烤媽。」

而家嘅學生完全唔識講廣東話...

「先生，你想搵...」校工問我嘢。

「我喺嚟探n老師同t老師嘅。」

「哦，好。」講完之後，校工就去咗搵佢哋。





大約5分鐘後

n老師:瘦咗咁多嘅。

t老師:你嗰班得你一個返嚟咋喎。

呢十年嚟，身形同樣都改變咗好多。冇咗個肚腩，同埋繼承到老豆靚仔嘅基因，變型咗。

我哋坐低吹咗陣水之後就走咗。





雖然得一陣，但係都勾起咗好多回憶，singcon，第一日坐嗰個女仔隔離，俾人屈鍾意嗰個女仔等等，再一次喺腦海入面上演。又開始FF如果早啲表白嘅話，嗰個女仔係咪唔使走，留喺度陪伴住我。亦都唔使驚佢有其他仔。513事件都唔會發生。

不過算，發生咗嘅嘢冇得返轉頭。

我喺小學坐車去華都，沿路上都冇乜改變。

當我經過中學嗰陣，居然見到阿德喺校門行緊過嚟。

阿德指住天空:UFO呀！

「廿幾歲人仲玩呢啲，好心你啦。」我講。

後來我喺某啲渠道得知阿德原來喺中學教初中中史。

又有一日，小學班group突然有個msg send咗出嚟:「大約下晝2點到香港」，但係之後俾個韓國電話冧把嘅人Del咗。可能send錯咗掛？





但係冇理由㗎喎，我小學嗰屆又冇韓國人。

最終好奇心促使我晨早10點就落樓下坐E21入機場。

不過車費真係好貴，入機場已經等於十年前由天水圍去MK。

入到機場，見到T2開返就狗衝過去。反正仲有兩粒半鐘，睇下有乜新嘢都好。

入面有個勁嘢:VR揸飛機，不過一舊水一次就不了。

Hea下hea下就1點50分，仲有十分鐘，快啲返返去T1先。

2點22分，突然有個女仔拖喼對住我微笑。





個笑容咁似...

咁似咁似邊個呢？唉，一時醒唔起。

既然都等唔到，就坐返E21走。

上咗車之後，啱啱嗰個女仔坐咗喺我隔離。

「乜你住長沙灣嘅咩？」佢問。

「係呀，你呢？」我答

「咁啱嘅，我都係喎。」

雙方都報以一個微笑。





呢個情景令我諗返起12年前嘅3月，啱啱調位調咗去坐某個女仔隔離嗰陣...