毒撚大挑戰之女神要離開了！？: 捌-冷戰、陸運會

10月下旬

我:一於換撚咗個Icon先。

是咁的，個谷入面有條友亂鳩咁講嘢，阿兒就Bam咗佢。而我身為佢朋友梗係要add返佢入嚟。

您新增了 XXX

阿兒又Bam多次。今次我改咗Icon，由本身6X改做阿兒個樣。





阿兒唔服氣，轉返個Icon。我再將佢轉返做阿兒。

阿兒 移除了您

咁就比人Bam鳩咗。佢真係好鬼小家。

之後都冇乜點理過佢。亦都搞到我悶悶地。

後一日





嗰日陸運會。我報咗200米。

陸運會喺元朗搞，所以我搭輕鐵過去。不過都係撞唔到啲熟人(可能我係少數住天水圍嗰啲)。

元朗大球場

應該點講好呢，就係幾堆人一齊，得我自己係一個人。好撚寂寞。

隨著越嚟越多人返嚟，成個看台即刻熱鬧起嚟，更加突顯出我嘅孤單同寂寞。不過依然都係冇人理我。





之後我同一個小同搵咗個位坐。

前面坐咗3條女，全部都係同社。

咦？前面嗰個...

其中一條女:望咩望。

甜美嘅聲線、少少寸嘅語氣，再加上豐滿嘅身材，仲唔係阿兒？

阿兒:仲望？

果然人帥真好，人醜性騷擾。昅下女都唔得咩家陣。

咁撚寸呀嗱，即刻落小食部買嘢食，食完之後掉喺佢個袋上面先。





跟住我落咗去小食部買燒賣食，燒賣會落豉油、甜醬、花生醬，擺個吉兜然後畀風吹跌咗嘅話，阿兒今鋪就真係大吉利是。

於是乎食完之後，就擺咗個吉兜係阿兒個袋上面，期待有風會吹跌佢啦。鬼叫佢ban我。

「男子200米初賽最後一次召集。」死啦，要落去啦，冇得睇住個兜添。

點知落到去先發覺自己柒咗，已經過咗召集時間。都係想返去睇實個兜好啲。

風呢？等咗成三個字都係冇風吹跌個兜，整隻鬼嚟吹跌嗰兜都好呀，唔係我點報仇。

阿兒:屌，邊條友擺個兜喺度呀。

唉，又失敗咗。





咁啱我手上面有個吉水樽，於是我就諗計將個水樽擺落去阿兒個袋度。

好，最後佢哋幾個轉咗位。正式宣佈報仇計畫失敗。

食完飯之後就係啲咩社際班際，全部都係冇我份。

我:而家啲人準備出閘啦下。

我:而家開始轉彎。咦，紅社嗰條友墮馬喎。

冇錯，就係將一個平平無奇嘅賽事講到好似賽馬咁。不過又真係幾無聊。

去到四點放學。即刻一支箭標去坐269D。至於點解要咁強調呢，就係因為我見到架車埋站就即刻標咗去上車。如果我跑200米都係咁嘅速度嗰陣應該會入到三甲嘅，可惜我冇跑到。

再第二日





通常第二日嘅陸運會都係返半晝，一點就放。

一返到去就即刻有兩個小同同我一齊坐。

我:乜咁啱呀。

佢哋:係囉乜咁啱呀。

之後就去霸咗個山頂位坐，又幾舒服下。

陸運會第二日通常都係得啲咩決賽，都係好鬼無聊。所以我同班友喺度吹水。

吹吹下原來就十二點，陣間有頒獎典禮，要啲人分返社坐。再次變返自己一個。





頒獎典禮呢家嘢真係好鬼無聊，又冇我份，只可以坐喺度，又冇得傾偈。要頒私下自己頒咗佢好過啦。

完咗之後即刻搭巴士返屋企。

嗰日夜晚

我:對唔住 阿兒

講到好似啲情侶嗌交咁。

阿兒:算啦算啦

我:多謝

幾驚阿兒以後就咁樣憎咗我。不過都好嘅，至少唔怕以後冇計傾。