毒撚大挑戰之女神要離開了！？: 壹-初遇
一切都要由前年3月開始講起...
嗰陣我仲讀緊小六，咁啱班主任調位。
班主任:XX恆，第5行第3個位。XX兒，第6行第3個位。
又忘記咗介紹自己添。阿恆，都係平平無奇一個毒撚咁啦(應該係)。
就係咁，我就開始同阿兒有少少交流，不過我喺小學係畀人恰嗰隻，所以都唔係好敢同陌生人講嘢，雖然阿兒由小二開始同我同班，但係都冇乜同佢接觸過。
之後上親堂都會因為覺得無聊所以撩下佢，我撩佢嗰下畀其他人見到。根據小學雞邏輯，邊個女仔同邊個男仔一齊傾計就一定係互相鍾意。我都唔例外，所以嗰陣係咁畀人話我同阿兒係互相鍾意嘅。
我哋梗係唔鍾意咁樣畀人話啦。所以阿兒準備咗張紙，上面寫咗啲韓文，個意思大概係:我鍾意韓國男團嘅人。一有人又講我同阿兒係互相鍾意嘅時候，佢就會舉起張紙。不過都係冇用，依然會比人話。
過咗1個月，情況先有所改變。