一篇潮文改變一生: 第一章
好多人都知咩係潮文，咁大家又有無睇過以下一個？如果睇過，可以直接Skip左佢，如果未，請先花點時間看看……(並非只貼潮文，後有原創文章)
講真,四五千話多唔多話少唔少,我建議你上大陸搞生意,香港已經冇咩發展空間喇.你先去買兩張廣州直通車飛,就400蚊,再去信和買1000蚊咸碟,同佢講大量買打個折,應該買到50隻以上,要買鬼妹同日本妹的,唔好買其他,理由下面再講.
坐到上廣州你手上仲有100蚊,去買包雲煙5蚊,然後係車站旁邊睇下邊個蛇頭鼠眼,打個眼色比佢佢就知你想唱假人仔,90蚊唱500蚊番黎,同佢講要唱散唔要100蚊紙.唱完拎包煙出黎問佢食唔食,佢見你幫襯佢就有計傾,你打蛇隨棍上問下邊到賣咸碟好.
將淨低果5蚊打散,用1蚊搭巴士入城,搵佢講既地方.然後搵間士多買罐可樂,比唱番黎既假50蚊佢,找番47蚊真人仔,袋好準備最後用.
等到日落你就開始擺地攤,乜都唔洗,只要擺一塊黃布企係隔黎人地就知咩事.大陸憤青最憎架仔,暴發戶又媚外,你d架妹同鬼妹碟勁好賣.d碟唔係跟身,搵條後巷收好,有人黎就帶佢去收貨,一隻賣佢100蚊,一路賣一路收錢之餘一路將你d假人仔唱番晒出去.
賣完50隻,你應該已經賺到5000蚊,連埋你本身果47蚊+4蚊,已有5052蚊,你既利潤100%,冇野好搵得過咁.如是者你重複50次,你既複利率收益已過億,可以買張武漢高鐵飛坐去溫州,用現金收購就黎執既廠,再請人造名牌手袋當真賣,不出3個月可翻10倍,到時應該有正牌注意到你,同你打官司,你就比5000萬個官庭外和解,跟住執左間廠,渣住9500萬番黎香港準備買殼股上市.
上市後洗人去蒙古做假新聞,話你間野挖到地下有稀土,即時炒起隻股,3日內再賺10倍,然後配股比基金佬配到自己既股份唔夠5%,你就正式引退, 求其捐1000萬比仁濟醫院拎個名人身份黎做,再洗100萬登7張報紙支持政改同起高鐵,等特區政府頒大紫荊比你.
最後一步,就係等,等咩野?等天災.你最後需要既係一個機會,一有大型天災係內地發生,你捐曬副身家上去,然後係街執垃圾比香港傳媒影到,舉世讚美你,1年內就做人大.
做人大後你有得選舉共產黨既常委,選自己,呢個時候唔好忘記你當初留低既47蚊+4蚊,去搵萬里,佢係中共前朝唯一未死既大佬,你拎呢52蚊出黎話係你全副身家,佢會深受感動,重拾共產黨當年起義既激情,結果拉大隊幫拖投你,以佢既影響你你足以被委任為黨主席,去到呢步,唔洗再講啦...
自從家姐係太古廣場比人炒左之後，各大小潮文就此起彼落，除之不盡，我覺得寫潮文的人真係好ON9，尤其是以上這篇，頂你個肺篇野無意義不特止，最重要係咩呀？
計錯數丫嘛！D錢銀都唔Q準，仲話搞生意？搞你老味都嫌你啫啫細啦！
所以話寫出來的人真係一個ON9，而看它的人就更ON9，但係你話有咩ON9得過……
真係跟住佢來做的人丫？
我就係因為咁ON9，所以而家就揹住袋咸碟，企左係廣州車站門口……
你老味我當然又唔會真係信曬佢咁離譜，所以我計過度過先上來博命架，試問我又點會拿住幾舊水就上來這個龍蛇混集之地呢？你當我真係ON9架？
拿！我本身就有五千銀正，買車票堅係用左400，又用左1000蚊買咸碟，而家D咸碟平左好多，一千夠買一百隻啦！雲煙我都唔會買一包咁CHEAP雞，我足足買左兩包！所以而家暫時就剩下現金3590元正！
正式向我的發達之路前進，我要做主席！成功係要實幹架，你估真係BOOK個戲院九UP下就賺到過億呀？返去介紹人食屎啦！
我依指示，好快就搵到個蛇頭鼠眼的人，向佢打左好幾個眼色！只見佢一開始唔為意，四處張望之下，終於肯定我真係同佢打眼色，縮頭縮腦咁行過來。
HA，潮文果然有料到！
佢走到我面前，係我耳邊低聲同我講：「屌你老母望咩九呀？再望打七你丫拿！」
頂丫！講就講啦，貼咁埋做咩春？而家打車輪呀？
如果係香港我一定打七你，話曬我鐵線拳都一個打九個。但係呢度係強國，我又真係唔夠膽，怕佢一陣廿九幾人狗衝咁衝埋來，更怕D咩愛滋針。
我忍你！我係咁意拉一拉我肩上個個型仔Porter，用眼神同呀鼠眼哥講左句「你好野！」轉身有型有款咁行開，成個陳浩南咁款。
唉！咁而家點好呢？又問唔到咩地方擺檔好，你知啦！我呢D八十後好容易放棄架嘛，莫非我個發達夢咁就玩完？
神不守舍之下，同一個身影一撞，我個袋就咁跌左落地，D咸碟散到一地都係！我Por你老母個ter丫，幾千銀個袋條拉鍊咁易鬆開？下次都係用返國產名牌紅白藍算數！
我當然拿拿臨蹲下執返D生財工具先！
「唔好意思呀。」
道歉？正！咁即係話佢唔係惡人啦，剩機屈返筆先！
「喂！」我霍地站起，正想話擺出個兇神惡煞款，佔一佔先機，點知看清對方，D粗口又吞返入肚……
眼前，係一件囡，囡就成日見丫，但係咁正就好難得，只見佢斯斯文文，矮我半個頭，頭髮中等長度，戴副眼鏡，着住套裝，雖然件裇衫扣到上頸，但係咁仲正，因為胸前迫到兩粒鈕就跌咁款，黑色裙下係一對白滑長腿，配上整潔的高跟鞋，如果可以申請比佢踩JJ的話，高登起碼爆五個1001！
你話見到如此質素的囡，叫我點會唔心軟賓周硬？