《前度超渡師》: 第四十一集-告別之前（三）
鐘已響過，一覺睡醒，距離離開香港尚餘最後二十四小時，我決定同我最心愛嘅兩位女人渡過－一個係我阿媽，另一個當然我女朋友。
-
同阿嘈一齊梳洗過後就同杰母一齊落街飲茶，茶樓嘅水準咁多年都無變，皮薄餡靚嘅蝦餃同埋大大粒嘅燒賣，經過咁多年嘅質素都係多年不變，無論我細個嚟食，定抑或而家接近三張幾都係無變。
-
「唔知幾時可以飲新抱茶呢？」當大家飲緊早茶，家母突然爆咗一句出嚟，我同阿嘈面面相覷，不過阿嘈對於呢個問題早有準備。
-
「咁就要睇下你幾時過嚟英國喇，聽聞嗰度搞婚禮浪漫啲，你都想你個仔個婚禮搞得好好睇睇啦！」阿嘈將個波射返俾阿媽，至於我呢……雖然重遇咗阿嘈唔耐，但係無論喺初中情竇初開定係而家成熟咗之後，自己都認定阿嘈就會係我嘅結婚對象，阿嘈無論喺三觀、定係個人生活習慣都同我非常相近。
-
究竟情侶係好似拼圖互補不足定係性格相似好？我就一定要後者無誤喇！大家生活習慣相似，就算之後去到邊度生活都可以唔使驚適應唔到啦！
-
「得！俾幾日時間我，我即刻執行李過嚟，我請埋班親戚包埋機票過嚟飲。」阿媽好大口氣咁講。
-
「喂喂喂，乜我有話而家要娶你咩？」我認我係口裏說不，心裏卻很誠實，點會唔想聚啊，而家即刻求婚都得啦！
-
「乜你唔娶我，仲有其他人要你咩？」阿嘈將個波射返俾我，睇嚟呢個波，我一定要食硬㗎喇！
-
「你唔俾我去到英國風流快活嘅？」英國咁多bar同埋pub，使驚冇女咩？雖然我真係冇興趣，話晒我而家有阿嘈啦，要多一個做咩呢？
-
「你夠膽咪試下囉。」啊！阿嘈個死女包啊，我又真係唔敢㗎喎，一睇就知我係專一嘅男人啦！
-
我可以用三隻字總結咗呢餐飯嘅重點，就係「冇重點」，兩個女人不斷圍住個婚禮點樣佈置，又話啲枱點樣set場，跟住研究擺酒幾多圍，仲要誇張到連過大禮嗰邊都接近傾掂數，唯獨最重要嗰個人-即係小弟，根本冇應承任何嘢，兩位女人已經自動幫我諗好，差在我未俾錢。
-
一般人嘅茶餘飯後嘅話題都係圍繞最近連載嘅電視劇或者日常生活等等，而佢哋依然冇離開呢個topic，繼續執著喺結婚擺酒嗰個方面。古語有云「三個女人一個墟」，但呢度明明係得兩個女人，唔好話墟市咁熱鬧，呢度已經升級到紅館演唱會尖叫聲不斷嗰種熱鬧。
-
今日基本上都係keep住三人行呢個方陣，行李基本上尋晚漏夜收拾好，要預備去英國嘅文件都已經準備得妥妥當當，只要聽朝順利check-in，過完關就可以安心上機，迎接自己嘅新一頁。
-
兩母子加上新抱（未來），今日反撲歸真，唔去啲咩熱鬧人多嘅地方，大家決定一齊行著名偷食嘅百貨公司，當然我哋就唔係嚟偷食，而係大家一齊行下，一齊傾下偈。即使大家冇點提及我同阿嘈準備離開嘅話題，但唔多唔少喺字裏行間之中都聽到阿媽對我哋嘅不捨。
-
行到去超級市場部，兩位女人即刻價格皇上身，用最少嘅價錢，買最多又抵食嘅美食，決定食餐好嘅，作為最後嘅晚餐，聽朝早餐諗住去到機場先解決。
-
尋日同腎仔打邊爐，估唔到今晚都係走唔甩邊爐環節，除咗例牌肥牛烏冬，同埋一啲蔬菜，阿媽決定大手購入一大堆海鮮，阿拉斯加長腳蟹、挪威三文魚刺身當然小不了，仲有去咗街市買咗我最鍾意食嘅花甲、蟶子等等。
-
三個人就好似買咗三十人嘅份量咁，一睇就知食唔晒，無謂浪費一堆新鮮嘅海鮮，我決定獨樂樂不如眾樂樂，打電話邀請埋腎仔上嚟一齊繼續打邊爐，而腎仔聽到有咁多正到爆嘅海鮮，二話不說即刻飛上嚟，當然佢都知道冇理由兩手空空咁樣上嚟又食又拎，醒目嘅佢梗係買定啲高級果汁上嚟，襯托今晚鮮甜嘅海底邊爐。
-
無論係我阿媽定係阿嘈，一早已經知道腎仔嘅存在，所以大家四個人食飯嘅時候完全唔會尷尬，仲可以喺度閒話家常，而且大家都知道我哋嘅工作內容，雖然有句說話叫「食飯唔傾公事」，而且最近都冇咩新個案要我哋去跟進，口水多過茶嘅腎仔就喺度攞啲舊個案出嚟討論，想大家一齊諗下點樣幫事主「超渡」前度係最好。
-
正當佢想分享佢點樣超渡之時，已經俾我截住佢，我都知阿嘈同阿媽都係屋企人，一定唔會爆事主啲秘密出去，同埋件事都close file咗，再討論都已經無意思。
-
點知一停就不可收拾，腎仔就係咁撩我傾關於返工嘅話題，鄰座嘅兩位越聽越上癮，忽然對我嘅工作越嚟越有興趣，明明佢哋一早知道我份工作，亦都知道我主要職責係做咩，不過點樣搵到事主，點樣搵事主嘅前度，點樣進行「超渡」，我又真係冇點樣詳細向佢啲介紹，我淨係好簡單咁形容過我嘅工作內容。
-
趁住最後一日喺香港，我都可以肆無忌憚咁洩露自己嘅工作秘密，詳細咁講，每當一個客人搵我，去到「超渡」完成，都講到表露無遺。一路講，一路望到隔離兩位兩個女人聽到我嘅工作內容之後，對眼已經發晒光，對我嘅工作內容好有興趣。
-
有興趣還有興趣，咁我都已經放低咗「前度超渡株式會社」嘅事務，都已經與我冇關，阿媽突然問一句。
-
「點解你唔喺英國開一個分部呢？」
-
（待續 To be continued）
IG：chingchingstory