《前度超渡師》: 第四十集-告別之前（二）
「明天將你我分離。」我決定飯後同阿媽留下倩影，回想返已經好耐冇同阿媽影相，每次食完飯幫手洗碗清潔之後，都係返睡房做自己嘢，兩母子基本上喺飯前飯後都係無咩對話，各自做自己嘢。
-
「阿媽，不如我哋自拍一張啊！」阿媽聽到我嘅說話之後都呆咗一下，應該都好耐冇同我自拍。
-
呢張相應該係第一張兩母子喺屋企入面影嘅自拍，但我希望呢張唔會係最後一張啦！只要有心嘅，就算去到英國咁遠嘅地方都好，有心見嘅時候，幾遠都見到啦！英國搭飛機返嚟，咪都係十幾個鐘頭，半日都唔使就見到啦。
-
不得不讚賞我阿媽真係好偉大，一個女人仔湊大我呢個不孝子，即使
要花多一個章節都要大大力讚賞我阿媽！媽子，我真係好愛你㗎！
------
兩個禮拜眨下眼就過去，兩日後就係離開嘅大日子，留喺香港嘅最後兩日，我決定揀呢一日交接「前度超渡株式會社」最後嘅事項，再次約腎仔返嚟「前度超渡株式會社」，認真交接嘅事項唔多，所有客人嘅個案已經接近完成，同腎仔打個晏晝邊爐作最後嘅踐行禮，兩個麻甩佬飲住啤酒、食住熱辣辣嘅肥牛，一齊講下男人經。
-
「你記唔記得我哋點識㗎？」腎仔半醉半醒咁問我。
-
「喺……酒吧認識？」我懷疑咁問。
-
「係啊，估唔到你竟然仲記得喎。」腎仔驚訝咁講。
-
「點會唔記得喎，嗰陣時你失戀，我記得你醉到仆街，當酒樽係前度咁錫呀嘛。」對話已經唔足以講到當時嘅情形，就容許我用一下文字表述啦！
-
唔知大家仲記唔記得茶餐廳食客呢個女仔呢？當時失敗追唔到之後，我就終日沉迷流連於蘭桂坊，尋找空虛寂寞凍嘅少女，等我呢個溫柔嘅大哥哥帶一啲溫暖俾缺愛少女。
-
荒淫咗一個月之後，荒就真係有嘅，銀包荒咗，每日沉迷劈酒，銀包迅速減肥，減咗一個碼數；而淫就好可惜真係一啲都冇，唔好話有女一齊跳舞，甚至主動請啲女仔飲嘢都被拒絕。小弟自問都唔係樣衰、filrt女技術都唔差，何解老蘭啲女都唔啱。眾所周知蘭桂坊啲女見你係仔都已經自動埋身，再加上扮嘢嘅ABC口音，係女見到你都濕晒，恨不得即刻跟你去下場做嘢啦！
-
小弟話晒都知書識禮，經過十幾年填鴨式嘅教育，雖然英文都唔算好好，至少起碼食某「隧道」美式漢堡潛艇飽都用英文去落單，而啲外國人員工都識得聽，而且都聽得明啦！都唔知點解完全啲女對我0興趣，真係get唔明囉。
-
木偶有蟋蟀做佢嘅良心，無論係遇到引誘，定係遇到危險，都一定出手相救，將木偶重回正軌，而我嘅良心使者都喺我最頹、最迷失自我嗰下出現，而我嘅良心就係腎仔，當日佢著住西裝，入到嚟大聲叫嚷要酒，彷彿就好似一個醉酒佬未夠喉，去到第二間再飲。
-
眾人皆醉佢獨醒，呢個醉酒佬唔係嚟搞事，亦都唔係嚟食女，反而佢拎咗一杯啤酒，坐咗喺我隔離，而我成為眾人嘅目光，呢個moment唔好話再嚟識女仔啦，連其他男仔見到有痴線佬都唔會過嚟一齊飲酒啦，換言之呢條仔我一定要硬食㗎喇！
-
「你知唔知咩係生活？」佢充滿自信咁望住我，就好似好期待我講完答案，之後到佢分享佢豐富嘅人生經驗咁。
-
對於追茶餐廳女食客嘅故事，詳情請看：（文杰失戀筆記四）
而腎仔嘅相識經過嘅故事，將會喺主線故事完結後連載。
------
「話咁快就已經識咗七年，時間真係過得好快。」腎仔慨嘆一番。
-
「明明就好似上個月先識咁，估唔到轉個頭就要走。」七年之癢，究竟有幾多段友誼可以維持，而我哋呢段正正可以維持，大家一齊做嘢咁多年，同時又一次鬧交都冇發生，你話係咪好奇妙呢。
-
一次落蘭桂坊飲酒，改變嘅唔係我嘅幸福，唔係識咗一個優秀嘅女朋友，而係識咗一個無可挑剔嘅同事，一個完全可以同我出生入死嘅好朋友、好搭檔。
------
一個晏晝喺充滿回憶同慨嘆之下完成，腎仔自告奮勇留低洗碗，叫我去陪阿嘈，重色輕友嘅我梗係搵女啦，叫咗阿嘈過嚟陪我執行李，基本上都執得八八九九，預計今晚要執好，聽日全日留俾阿嘈。
-
「你啲小說要唔要㗎？」阿嘈指住書櫃，呢個書櫃裝住由小學開始買落嘅小說，
-
「嗯，攞一兩本值得紀念嘅囉。」如果攞晒啲小說去就肯定冇可能，啲書又重又嘥位，行李肯定超重啊！我決定攞澄澄出嘅兩本小說《夾出一個他》同《他和她的1347》就算，想當年中學嗰陣時瘋狂追澄澄啲作品，每年書展都一定排隊攞佢親筆簽名。佢啲作品寫得幾好，寫到好切身處地，就好似我做咗主角，體驗咗一個優秀嘅故事情節。
-
執好行李之後，成間房變到好空虛，剩返一啲雜物，我同阿嘈攤喺床上，望住冷冰冰嘅天花板，一種寂寞嘅感覺湧上心頭，感覺一切都嚟得好突然，雖然一早知道要離開，但唔知點解去到呢一刻就突然好唔想走，諗走前一個月都無事，諗走前兩個月都無事，但去到最後兩日竟然唔捨得呢度。
-
或許生活喺呢度唔係最差，但唔一定係最好。冇錯，生活喺呢度咁多年一定會有歸屬感，非常熟悉呢度地方，熟悉呢度所有嘅人同事。人冇可能永遠停留喺同一個地方，永遠唔離開自己嘅comfort zone，咁樣係永遠都唔會長大。
-
外闖一次，寫下自己的個人日記。
-
（待續 To be continued）
IG：chingchingstory