《前度超渡師》: 第二十六集-忘不了的妳（六）

有時我又唔想你擔心，所以我冇同你講，其實我初到英國嘅時候，係成日因為掛住你而喊，但我喺最需要人嘅時候，又冇其他朋友陪伴，所以我嗰刻真係好想好想返香港。
-
可惜當時你都唔搵我傾偈，但我就懶理不理，我估計你呢個時候放棄咗我，唔再搵我，而我見你漸漸冇搵我，我冇再主動搵你嘅意欲。
-
冇再同你對話而嚟嘅幾個月，我都係一個人喺英國面對唔同嘅難題，好想有人可以俾我訴苦。好想有人可以做我嘅樹窿，可以面對面陪住我。
-
好彩皇天不負有心人。聖誕party入面，我喺學生活動室（SAC）認識咗一位同校師兄，原來呢位師兄都係香港人。喺遠洋見到熟悉嘅面孔真係開心到飛起，而師兄就做咗我嘅靠山，我就將自己好多嘢都佢分享，又同佢講咗喺英國一個人生活好悶。師兄就話：
-
「不如假期等我陪你一齊遊英國啊？」
-




孤單上心頭嘅我貿然應承咗，接住嘅每個周末，師兄就帶我周圍遊覽英國，帶咗我去好多唔同嘅地方玩，基本上呢個社區嘅公園、博物館，我通通都去晒。有咗師兄嘅陪伴，我亦都漸漸適應咗英國嘅生活。
-
我哋日久生情，漸漸互相對對方產生愛意。而當時正值聖誕節，大家都唔使返學，沉迷喺濃濃嘅聖誕氣息，師兄藉住浪漫嘅節日氛圍之下，帶咗我去「倫敦眼」，問我可唔可以做佢嘅女朋友。當時嘅我已經對佢有好感，所以都應承咗佢對我嘅追求，正式成為情侶關係。
-
［天荒地老流連在摩天輪，在高處凝望世界流動。］
-
外國同香港嘅聖誕節真係好唔同，個聖誕氣氛真係差天共地，香港好多都係變咗商業化，好多商場用減價促銷應節，而英國真係有唔少好有特色嘅聖誕市集，入面賣嘅嘢雖然都係差唔多，有薑餅人、熱朱古力同啲聖誕裝飾，但最正嘅每個市集都有一棵既高又大嘅真聖誕樹，唔係香港商場嗰啲假膠聖誕樹，而係貨真價實嘅真樹，樹掛上一粒又一粒嘅LED燈飾，樹嘅頂端掛住一粒星光熠熠嘅大星星，呢啲浪漫喺香港係完全體會唔到。
-
熱鬧嘅聖誕市集襯托住寒冷落雪天氣，大家都一路飲住熱朱古力，一路睇住「染白」嘅聖誕樹，街邊嘅情侶手拖手，喺神聖嘅聖誕樹面前錫，寓意拍拖可以長長久久。而我哋都因應傳統，喺樹下獻出我哋嘅承諾，用一個濕吻應承對方，要以後相愛對方。
-




接住嘅好多假期，我哋都一齊度過，一齊相處。你知我好多嘢都敢講、敢做、敢試，唯獨有樣嘢唔得就係，我接受唔到未結婚前搞嘢，我好驚有一刻唔小心中咗，而要照顧BB，所以我推咗佢呢個要求好多次。但我發現當我推卸得越多次，佢對我嘅態度越嚟越冷淡，亦都好少再提出呢個要求。
-
唔知係咪外國文化太open，我有次捉到佢去酒吧然後同一個三唔識七嘅女仔瞓咗一晚，當中佢哋做過啲咩，我唔知，我亦都唔想知。但我真係接受唔到我男朋友同第二個女仔瞓咗一晚，㷫過火屎嘅我提出分手。
-
佢唔接受之餘，仲要鬧我唔開放，十幾歲人又唔飲酒，又唔落club、又唔同佢搞嘢。當佢一講搞嘢嗰下，我簡直係嬲到上心口，直接喺佢同房嘅女面前一腳踢爆佢下面，然後一把車落佢塊臉到，然後喊住跑出酒吧。
-
我好嬲，亦都好傷心，我衝咗落樓，我一下冇咗我唯一嘅靠山，以後英國嘅生涯又得返我一個獨處。有陣寒風突然吹襲，將我嘅孤單顯露得一覽無遺。
-
［如果說對不起，其實愛沒對不起；如果你說星星太美，傍晚我都想起。］
-




呢個時候，我諗起一個人，一個好錫我嘅人，而呢個人就係你-古文杰。我諗起以前同你去食芝士撈麵、諗起一齊搭船睇燈飾嗰種青澀、諗起同你分開之前去晒兩個主題樂園，遊咗香港一個大圈。
-
［如果到下世紀，期待會共你一起；如果你會前程萬里，離別也祝福你。］
-
我嗰陣時每晚都重溫我同你對話嘅內容，由最新睇到最舊，再由最舊睇到最新。睇對話內容就好似瞓覺之前睇小說咁。日日睇、晚晚睇，次次都有新嘅感受，更加掛住你嘅感受。
-
［誰又說起青春永沒完美，悄悄去看你在寫的日記。］
-
望見你追緊圖書館嗰個女仔，我見你當時好認真、好落力咁追。我內心好開心嘅同時亦都好難受。開心嘅係你終於都可以打破自己嘅舒適圈，再次踏上戀愛旅程，唔再需要心掛掛位於遠方嘅我。
-
［重讀著你的世界，明瞭內心的你，是我堅持仍然用真心愛你。］
-
但同時唔開心就係，如果你同佢真係一齊，你就會忘記曾幾何時有個好錫你嘅女朋友，你會同呢個女仔製造更多更開心嘅回憶，從而就會忘記我，而我亦都喺你心中冇再佔一席位。
-
［從來未知會有限期，重遊著一起的故地，來年或者會有陣時，人海中漸漸記起你。］




-
見你之後漸漸冇再發佈關於追嗰個女仔嘅心路歷程之後，我就知道你已經放棄追呢個女仔嘅意欲，我知道自己再有呢個機會，但我都將屬於自己嘅「孤單心事」收埋喺心入面，唔敢再追你。
-
［朦朧夜空撲朔迷離，然而幸福不可細味，真多得有你，讓我天真裏希冀。］
-
（待續 To be continued）

IG：chingchingstory