《前度超渡師》: 第二十五集-忘不了的妳（五）
「想！」喊到不似人形嘅阿嘈點頭。
-
「跟我走，我帶你一個地方。」之前行路，我哋兩個都係保持住朋友關係，但聽完阿嘈對我嘅意思後，我決定拖住佢去一個地方，一個收埋秘密嘅地方。
-
最後海濱嘅談心喺未開始之時已經結束，我倆登上一架往彌敦道北行嘅巴士，去返砵蘭街-一個萬事嘅起源。
-
「做咩帶我返嚟呢度，啱先我哋咪喺呢度出發囉？」大家唔好心邪，我冇帶佢去邊，我係帶佢返去「前度超渡株式會社」啫。
-
「上到去咪知。」真係真係唔係你哋諗嗰啲嘢，我唔係飢餓到咁嘅。
-
「咔嚓、啪。」開門開燈呢啲例牌嘢當然要啦，不過最仲要梗係後面嘅戲肉。
-
「坐低啊！」我指住牆邊嘅梳化可以坐低，而我卻走去辦公枱嘅後面……
-
係呢疊喇！嗱，大家唔好心邪先，我並冇對阿嘈「想入非非」，我係想攞一樣對我好重要嘅嘢俾佢睇。
-
「『文杰失戀筆記』咩嚟㗎？」阿嘈拎住我俾佢睇嘅筆記講。
-
「你自己慢慢睇啦！」要我介紹我手寫嘅筆記都尷尬，喺度同大家講解究竟呢本嘢係咩啦！
-
話說小弟由細到大都有寫日記嘅習慣，無論大小二事，總之就隨行隨寫，而《文杰失戀筆記》正正就係記錄咗我由細到大失戀嘅心路歷程，當然你哋之前睇嘅集數梗係有修改啦，話晒以前寫埋啲咁肉麻癡情嘅情深說話，點可以出街見大家㗎，話晒我都有偶像包袱㗎。
-
「點解零零舍舍得我嘅章節有『我愛你』三隻字嘅？」阿嘈發現咗文章中嘅端倪。
-
「你認為呢？」我決定唔由自己開口，等阿嘈自己咀嚼一下。
-
「你冇可能喺今日先急急腳寫低呢三隻字，即係你……根本仲鍾意我？」當阿嘈做主動嗰個，我都無謂再掩飾自己。
-
「冇錯。」一直而嚟，阿嘈同我以前嘅經歷都呢刻係最深刻，永不磨滅嗰隻。
-
「點解你咁耐都唔搵我？」阿嘈表示不解。
-
「咁你又點解咁耐都唔搵我呢？」我反問阿嘈。
-
「我而家咪搵咗你囉，今日唔係我主動搵你㗎咩？」阿嘈又講得啱，冇佢嘅出現，我都唔會見到佢。
-
「我唔搵你嘅原因係我驚你有心上人，或者已經拍緊拖，到時再搵你，我驚連朋友都冇得做。」我認我因為懦弱而唔搵阿嘈，但我顧及面子，而唔講我笠水嘅事實。
-
「扮晒嘢，淆底唔敢追我就認咗佢啦！」俾阿嘈知道咗個事實㖭，好冇面啊！
-
「得啦得啦，我認我細膽喇，咁你而家知道我心意啦！」既然阿嘈已經知道秘密，我梗係乘勝追擊。
-
「嘩！你唔係想女仔追男仔呀嘛？」我係想㗎，有人追證明我靚仔呀嘛！
-
「我鍾意啊！吹咩？」貴 為厚顏無恥禮儀廉，當然要射波啦！
-
「但我唔鍾意喎。」不過有人俾我更無恥。
-
「不敢說出口，說出口要怎樣善後？」對住鍾意嘅人，詐傻扮懵是常識吧？
-
「你唔講，我走㗎喇。」難道我未開始已經結束，當然唔會，我講明唔會再放手㗎喇！
-
「我認真嘅，你可唔可以做我女朋友？」雖然我知阿嘈實應承，但女仔都鍾意儀式感，幾尷尬都要開口。
-
［愛你，我管不了是禍，未想過是為何，能愛著你苦也未去躲。］
-
「唔可以喎，我有心上人喇喎。」冇嘢嘅，呃我嘅啫。
-
「啱先又話鍾意我嘅？」到我表示不解。
-
「我鍾意嗰個咪……你囉！」頂，連阿嘈都學埋啲低能gag啊！
-
「喂啊！玩嘢咩？我嬲㗎！」以其小器之道，還治小器之身。
-
「嬲咪嬲！小器鬼，嬲死我囉，唔好要我囉！」稚氣一下恢復，將之前喺海濱傷感嘅氣氛一下打走。
-
「嬲你一世㖭啊！」不過見佢咁可愛，點敢再嬲佢啊！
-
「嬲飽佢㖭啊！講得出要做得到。」當女生話冇事，就係有事；當女仔話要嬲佢，即係要愛佢一世。
------
由小學升初中做嘅水泡男，到上次茶餐廳遇上嘅OL女，阿嘈已經將我嘅故事睇到通通透透，彷彿倒轉背出都冇難道嗰隻，而我，都係未知佢嘅故事。
-
「我嘅秘密就睇完，幾時可以到你講？」話晒啱先行去海傍談心之前，阿嘈話會分享同佢前度啲秘密，點知由佢講先變咗我講先。係時候都係要俾我知道㗎喇！
-
「如果我唔講得唔得？」阿嘈調皮咁講。
-
「我話唔得得唔得？」你調皮，我一樣調皮啫。
-
「我唔得你個唔得。」阿嘈瞬間變咗個小學雞。
-
「我唔得你個唔得個唔得！」等我又做個小學雞同佢鬥。
-
「唉我怕咗你！」阿嘈決定收皮，逃唔出唔講秘密嘅魔爪。
-
「我要聽，快啲講。」唔知阿嘈啲前度係點嘅呢，好期待啊！
------
（阿嘈回憶錄）
-
［沉沒在大海怎配有權被愛，命運若一早記載緣份不再。］
-
去到英國，人生路不熟，獨自踏上咗屬於一個人嘅「遠征」。所有起居飲食、生活習慣都要重新適應一次。當中最難適應就係朋友。
-
以前喺香港同啲朋友關係非常好，加上香港話大唔大，話細唔細，即興約朋友去港九新界玩，基本上兩粒鐘內路程邊度都去到。
-
但去到英國，所有舊朋友都留喺香港，而我就要重新認識一班新朋友，好多本土人都唔太鍾意外來人，甚少會同外國學生相處。而我開學初期就係一個朋友都冇。返學、食午餐、放學同返hall都係一個人，可以話係獨行俠。
-
雖然當時心入面仲有你，但基於時差關係，同我都要逐漸適應呢度啲學業而少咗搵你，我有時瞓唔著想搵你，但你呢邊都已經朝早甚至已經返咗學，我都唔敢打攪你，費事影響你休息。
-
（待續 To be continued）
IG：chingchingstory