《前度超渡師》: 第九集-文杰失戀筆記（二-下）
長路漫漫是如何走過，從學校行去碼頭，再慢慢搭船過海，之後仲可以行海濱，不知幾浪漫。去緊餐廳嘅同時，我哋都係咁傾偈，承接返啱先喺郊野公園嘅對話。好認真咁講句，同佢傾偈真係好舒服。
-
飲飽食醉，當然係時候送佢返屋企啦，沿著星光大道行去天星碼頭，維港兩岸高樓大廈嘅聖誕燈飾，蓄勢待發預備發光發亮。搭正六點，五光十色嘅燈飾完全展露喺我哋眼前。
-
維港嘅燈飾固然好靚，但隔離嘅阿嘈仲靚，佢坐窗口位，太陽西斜，將夕陽經海水嘅反射到阿嘈塊臉，星光熠熠嘅燈飾、橙橙黃黃嘅海水，美輪美奐嘅阿嘈，相映成趣。我不禁喺褲袋攞出電話，幫佢影咗張相，呢張相嘅構圖唔重要，最重要嘅係畫面入面嘅人同景。
-
「賤人，偷影我唔出聲？」死，俾阿嘈發現咗我偷影佢㖭。
-
「見呢個景咁靚，咪幫你影下。」諗唔到辦法點兜，唯有從實招來啦！
-
「一齊影呀嘛！話晒個景咁靚。」阿嘈揮揮手，叫我擰轉身一齊自拍。
-
「咔擦。」呢張係我哋嘅第一張合照，係我哋嘅開始。
-
搭車送佢返屋企嘅途中，阿嘈可能今日太攰而喺巴士上瞓咗，隨著巴士顛簸嘅旅程，佢個頭挨咗落我個膊頭到，而我都順勢拖住佢。呢個時候，阿嘈醒咗，唔知係架巴士太搖，定係佢唔想我拖住佢。
-
好彩呢啲通通都唔係，阿嘈望住我笑一下，然後繼續挨住我膊頭，佢匿埋眼問：
-
「你第時俾唔俾我挨住你瞓㗎？」阿嘈咁問，擺明想同我一齊啦！
-
「由今日開始，我個膊頭永遠都係俾你一個挨住嘅。」天荒地老流連在巴士上，今次係真真正正嘅拍拖喇！
-
即日認識，即日一齊，感覺好似一段唔長久嘅愛情，但我肯定我哋係互相愛戀對方。我哋一齊渡過有大家嘅聖誕、除夕、新年，原本都相安無事，甜甜蜜蜜咁過住情侶嘅生活。
-
不過去到暑假之時，佢突然同我講下個禮拜要去外國讀書，我嗰陣時個心情迅速跌落谷底，但我冇發佢脾氣，亦都冇嬲佢點解唔同我呢個男朋友講。因為我知道，阿嘈因為唔想我傷心而咁遲先我講，唔想大家見面時有浸火藥味。
-
阿嘈要過外國讀書已成事實，唔可以返轉頭，作為男朋友亦都唔可以反對佢屋企人嘅決定，而我唯一可以做嘅就係同佢再繼續創造愉快嘅回憶。
-
所以喺最後同阿嘈相處嘅呢一個禮拜入面，我哋每日都出嚟見面，一齊遊香港一個圈，去晒兩個主題樂園、行咗好多個山、去咗勁多地方食好嘢，寧願離開前留低一段轟轟烈烈嘅回憶，都唔想喊住過，大家喺呢一個禮拜都唔提起要離開嘅事實，繼續歡笑、歡欣咁渡過。因為即使將來回味返呢段關係都係甜蜜而且美滿，都唔想切膚之痛咁分手，因為大家仲係好愛對方。
-
出發前一晚，我同阿嘈兩個人就坐咗喺公園傾通宵，第二朝就一齊去機場，我哋回味返呢八個月，由最初喺學校嘅碰面，到秋季旅行嘅邂逅，引申到搭船睇燈飾，再一齊成為情侶，呢啲經歷，彷彿就好似尋日發生嘅事咁。隨住呢條回憶時間線去到啱先嘅迪士尼，我哋攬住睇煙花嘅時候。
-
我哋都唔自覺咁流眼淚，原因無他，就係唔捨得對方，我哋相擁而泣，我哋冇再講嘢，取而代之嘅係彼此心靈沉默交流。
-
晨光漸漸浮現，見證住阿嘈即將要離開我，前往外地展開新生活，我用紙巾幫佢抹下眼淚，幫佢整理一下儀容。然後拖住佢，直到漫步至阿嘈屋企樓下先至放開手。
-
等緊阿嘈整理行裝嘅同時，我喺度諗：究竟之後我哋嘅感情會點？但呢一刻嘅我，我都係冇任何感覺，自己唔想再諗任何嘢。
-
轉眼間，阿嘈同佢屋企人已經落到嚟，我就笑住迎接阿嘈，其實內心嘅我係喊緊，我真係好唔捨得阿嘈，我好唔捨得之前同佢渡過嘅每一段回憶。
-
我跟上阿嘈爸嘅私家車，飛奔向住離別嘅餞行點-香港國際機場。沿著青馬大橋同北大嶼山公路，車上蒙上一層肅靜嘅氣氛，一句聲都冇出，而阿嘈就同我第一次相識一樣，都係挨住我瞓，呢次應該係阿嘈最後一次挨住我膊頭瞓了，再次仔細咁望住阿嘈瞓覺，佢依偎喺我膊頭到都係露出咗幸褔嘅表情，令人好想繼續寵愛佢，不過可惜以後都應該再冇咁嘅機會了。
-
雖然正式上，我哋都未分手，但我哋兩個都有個協議，就係我哋如果未來遇到另一半，就唔好再耽誤對方嘅時間，唔好要外地嘅另一半喺到浪費自己嘅心機。
-
好快，我哋已經到機場，我一隻手拎住行李，另一隻手就拖住阿嘈。我同阿嘈一齊去Check-in，寄存咗行李之後就一齊去到離港嗰個閘口。
-
「好多謝你呢八個月嘅照顧，我要走喇！」阿嘈再一次忍唔住自己嘅淚水，而我亦都俾個深深嘅擁抱阿嘈。
-
「我都好多謝你，我好愛你，你去到嗰邊要開開心心啊！」尋晚，我哋喺公園相擁而泣，而家，我哋都喺機場因為對對方嘅不捨而流下道別嘅淚水。
-
「我走喇！你保重喇！」佢鬆開我嘅擁抱，同屋企人前往離港閘口，我亦都喺非禁區望住佢過安全檢查，排隊等入境處櫃位，直至佢遠離我嘅視線範圍之外先至離開閘口前。
-
兜咗機場一陣，我都返咗屋企休息。沉澱過後，我決定繼續鍾意阿嘈，成為佢遠地嘅守護者，直至將來嘅佢有另一半。
-
但由於香港同英國有幾個鐘嘅時差，所以大家每日所傾到嘅，其實並唔多，每日都係一句起、兩句止。隨著大家嘅忙碌，我哋都漸漸少同大家傾偈，去到最後，亦都冇人再去經營呢段關係，大家都喺冇人講分手之際下離場。
------
事隔三秋，我想好想同你講一句，即使唔知遠方你睇唔睇到：我愛你，曹敏！
-
（待續 To be continued）
IG：chingchingstory