《前度超渡師》: 第八集-文杰失戀筆記（二-上）
將時間回撥到十幾年前嘅初中生涯，大家由小學轉到初中，難免覺得自己成熟咗，但當自己去到高中，就會回想返自己細個做過嘅傻事。
-
［樹蔭有一隻蟬，跌落你身邊。驚慌到失足向前，然後撲入我一雙肩。］
-
初中某次秋季旅行，自己一個去廁所嘅時候，迎面以嚟嘅就係呢位女仔，而張敬軒嘅《櫻花樹下》，正正就係形容我同呢位女仔第一次接觸嘅經過，不過跌落嘅並唔係隻蟬，而係隻蜜蜂飛過，佢俾隻蜜蜂飛過嚇親，咁就跣一跣，我即刻用迅雷不及掩耳嘅速度抱住佢，令佢唔使跌親。
-
［令你靦腆一臉，像櫻花萬千。］
-
呢位女仔叫阿嘈，佢係隔離班嘅一位女同學，其實喺呢次接觸之前，我係完全同佢唔熟，即係我知道學校有呢個人嘅存在，但冇同佢傾過偈。
-
「你……你無事呀嘛？」就算隔咗咁多年，我都係覺得我自己講呢句嘢嘅時候真係好有型。
-
「我冇事吖！好多謝你吖！」阿嘈係咁多謝我啱先嘅英雄救美。
-
「係呢，你叫咩名吖？我係2A班嘅古文杰。」話晒我咁靚仔，梗係乘勝追擊啦，問下叫咩名順便抄埋牌啦！
-
「曹敏，我係2C嘅。好高興認識你。」
-
「不如我哋交換電話傾偈，話晒呢個時候大家要匯合返班朋友，我哋轉WhatsApp傾？」咁嘅荒謬解釋都諗到，我真不愧為「橋皇」。
-
「梗係好啦，我哋可以燒住嘢食邊傾偈㖭，我嘅電話係……」阿嘈亦都俾咗佢嘅電話號碼我。
-
就係咁，我哋嘅第一次交流就喺秋季旅行之中展開。
-
由於大家係唔同班，再加上唔識嘅關係，所以就唔同組燒嘢食，不過燒嘢食嘅時候，我哋都一路透過WhatsApp同對方傾偈，甚至我嘅朋友見我電話不離手，就問我係咪同女朋友傾偈，我就話：
-
「唔係而家嘅女朋友，係未來嘅女朋友。」
-
咁當然成班朋友就起哄啦，話晒上到中學之後，我都冇再拍拖，而身邊嘅朋友已經一早拍使拖，仲要成日喺度放閃。因此我食完嘢都唔留低同佢哋玩，我話想自己行下，實質上就係想搵阿嘈，同埋避開食閃光彈。
-
「喂！你食飽未啊？不如一齊行下消化？」我膽粗粗咁問佢。
-
「梗係冇問題啦！我都唔想留喺度食閃光彈。」好嘅開始係成功嘅一半，睇嚟我都半成功㗎喇！
-
「我都係，成班同學喺度放閃……」望住班同學，我都覺得好閃，同佢呻下，唔知我哋第時有冇得放閃呢？
-
「唔緊要啦，我哋一齊行啦！就中間廁所後面嗰度等啦！」阿嘈好醒目，特登唔約喺啲大路到等，費事俾我或者佢啲朋友見到，同埋你知學校咁多八婆，一俾人見到就麻煩，水洗都洗唔清。
-
話咁快，我已經撇甩晒我啲朋友，獨自前往幽會地點。我喺遠處就望到阿嘈已經默默等候。
-
阿嘈究竟係咩樣，我會用「傻傻更更」四個字嚟形容佢，佢個樣成日呆下呆下，而且佢好易笑，平時喺課室都聽到佢喺隔離班嗰啲大笑聲。但傻得嚟又好可愛，有種好想保護佢嘅感覺。
-
「咁早呀！」我尷尬咁做個開場白。
-
「有幾早吖！」佢笑住咁答我，呢個時候我認真啲望，佢有一對超級迷人嘅笑眼，即係佢笑嘅時候，隻眼都會笑，認真可愛。
-
「早過老麥啲早餐咁囉！」作為風趣幽默之皇，梗係彈返啲笑話出嚟啦！
-
「無聊，咁嘅爛gag都俾你講得出口。」雖然唔知係咪個個女人都鍾意口不對心，但呢位女士肯定係喇！踩我啲笑話唔好笑嘅時候，自己卻笑到見牙唔見眼。
-
「咁你又笑。」望住佢得意嘅笑容，我發現自己塊臉都唔自覺流露咗燦爛笑容。
-
「你個樣好笑呀嘛。」乜靚仔個樣可以咁好笑嘅咩，我百思不得其解。
-
「咁你以後係咪都想望住我個靚仔樣？」雖然我哋係第一日識，但作為男仔，唔主動啲，轉頭俾人溝走咪大鑊！
-
「邊個話你靚仔吖！唔好諗咁多啦！」佢一下拍落我後尾枕，然後我又拍返佢膊頭。
-
「正常人望住靚仔先會笑㗎嘛！」我講下笑咁同佢講。
-
「我見你個樣特別樣衰先笑啫。」唔知呢句係咪都係開玩笑呢？我諗應該就係喇！
-
「行啦！跟住我呢啲樣衰嘅人行有福㗎！」我哋終於離開臭氣熏天嘅廁所範圍，雖然我唔知點解一定要喺廁所後面傾偈，但我鍾意！
-
沿著行山徑上山，我哋都互相講下自己日常生活同興趣。明明呢次係我哋第一次面對面嘅對話，不過帶俾我嘅感覺就好似同識咗好多年嘅老朋友會面咁，可以暢所欲言。
-
歡樂嘅時光過得特別快，秋季旅行就係我哋兩個拋棄自己啲朋友，然後獨自幽會嘅情況就完結，我哋因為啱先燒嘢食嘅時候食得唔飽，就決定返到學校解散之後一齊食下午茶。
-
由於我哋唔同班嘅關係，所以大家就喺郊野公園分道揚鑣，相約喺學校門口再會。
------
「喂！食咩好呀？」學校解散後，阿嘈第一句就問食咩，睇嚟佢真係好肚餓。
-
「不如我哋過海食芝士撈麵？」喺搭車回程返學校嘅時候，我都上網搵下附近有咩好食，呢個時候我醒起佢鍾意食芝士，而咁啱我又無意中見到位於對岸嘅尖沙嘴有間好吸引嘅芝士撈麵，不妨就問下阿嘈啱唔啱食。
-
「真係㗎！好吖，而家就去啦！」阿媽，你個仔終於約到女喇。
-
（待續 To be continued）
IG：chingchingstory