【120k最後釋出】科學禁書目錄——索引上的女孩們（完）: 阿Sir與學生妹妹的邂逅

C：「喂，咪住…你睇下，人哋喺太古呢間補習社補喎，下個站就係，我哋落車去望下啦。」
本來我都係諗住可能有啲更易嘅途徑接近佢，例如教會團契，青年中心義工團呢啲…
可能大家會以為我哋會喺補習社門口撞到佢，不過我哋唔係偵探，亦無諗住做呢樣嘢；呢啲中上住宅區有好多類似嘅個體經營補習社，規模細過啲連鎖集團好多，驟眼望落去就係一個reception，三四間課室咁，啲家長通常就係貪佢哋近屋企，無鬧市區啲大型補習社咁雜，而且一定有真人教學，順便可以做埋功課輔導…當然，我成世人都未嚟過呢啲地方。
我：「妳想點？我扮學生做佢同學？」
按道理又唔係唔得嘅，YEAR4個樣都唔係好大個，扮DSE自修生都係一條出路…
C：「吖，你份人真係咁無大志…妳喺度等等我，我入去問下嘢先。」
五分鐘之後佢出返嚟，手上攞住一大疊時間表價目單，五顏六色咁。
我：「嘩，妳入去打劫呀？」
C：「我同佢講有兩個細佬妹，文科理科都有。」
我：「真係講大話唔眨眼，不愧奸商管理！」


C：「咪咁多聲氣啦，行去food court坐低先慢慢睇下。」
每次嚟到呢啲地方，我就會好似機械人咁轉入去超市買兩包芝蔴八爪魚奉獻畀佢。
我：「點呀，我要報乜嘢course呀？」
C：「點解唔調返轉諗呢？」
我：「可以點調返轉呀？」
C：「諗下教乜嘢course囉？」
我：「吓！吓？點得呀…而且人哋門口都無話請人…我…我…又無工作經驗…」
C：「你…俾你激死！我頭先睇過晒㗎喇，理科form6同雞精DSE應試班都係呢個阿Sir教。」
佢指住單張上面一幅大頭相，寫住Eric Sir嘅一個物體，戴住眼鏡嘅肥仔嚟，括弧標住係鄉村大學嘅Mechan Eng year4學生，點睇都係豬扒變唔成貂蟬都唔會揀嘅男仔嚟。
我：「知道佢係琋玟個呀Sir又可以點？」


C：「殺咗佢，然後你去見工。」
我：「…黐線㗎咩…唔好講笑啦…」
C：「就好似咁…咬！個頭就甩咗…嗯…好味！」
我：「點解妳好似繼承咗Stella嘅毒舌咁…」
C：「點呀？如果有得教你去唔去教？」
我：「應該…當然好啦…但有乜可能喎。」
C：「聽日我去鄉村大一轉，睇下幫唔幫到你啦。」
我：「有無咁緊要呀？」
C：「你有一個老相好，我又點止一個呢！」
我：「Cindy…」


C：「前提係你補習無人工收O唔OK先？」
我：「有乜所謂…嗰啲都唔係錢嚟嘅…」
C：「你講呀！一個鐘人工夠買好多盒八爪魚。」
要佢幫我幫到咁真係唔好意思，但我哋嘅關係又點止無言感激就可以描述完，至少如果唔係我中六陪住佢日日溫書，佢而家就未必係一個大學生；今晚我同佢就繼續喺太古城行街，行完之後佢返佢屋企。
I：『咁好進展呀…唔該晒你呀；我想講呀，你啲小說全部都甜到漏，好難頂呀！』
我想同佢講啲小說唔係我準備，但咁樣講好似好無禮貌，俾佢知道Cindy睇我哋講嘢好失禮。
我：『其實我無睇過㗎，都係喺排行榜度抄出嚟，咁妳啱唔啱用呀？』
I：『還好啦，都係消遺下咁啫；係呢，做乜要畀《沙丘之女》我睇嘅。』
我：『以前有個女仔同我講寂寞嘅時候睇呢本書好有共嗚，咪睇下妳啱唔啱囉，我無睇過㗎。』
I：『真係不負責任！』
我：『唔好睇？』
I：『太有共嗚呀！屌你！』
我：『做乜鬧我喎，覺得唔想睇咪唔好睇囉。』
I：『唔理你呀！快啲跳落個窿度陪我。』
我：『又係妳話我哋永遠都過唔到對面。』


I：『如果過到妳會想過咩？』
我：『唔會，叫妳過嚟好啲，呢邊好和平，我都想妳離開混亂嘅世界。』
I：『咁我個仔點算？』
我：『嗯，過到嚟先一齊諗點摧毀嗰個世界囉。』
I：『好簡單，我會綁住你等你搵唔到Stella。』
我：『妳又知妳綁得住我？』
I：『用我美貌同身體綁住你囉，你答我，我靚女啲定係Stella靚女啲？』
我：『妳靚女啲。』
I：『咁咪就係囉！』
我：『做人唔係剩係睇樣㗎嘛！』
I：『可唔可以話我知你同Stella點識？』
我：『咪全靠…要多謝妳送咗個修改器畀我。』
I：『你由頭到尾講晒成個故仔畀我聽吖。』
就係咁，我好似寫小說咁由我研究時停開始講，幫佢擺自慰pose影相，再到我一巴一巴咁俾Stella打落塊面度，我自己諗返起都好激動好感慨，完全唔明點解後來話分手就分手，雖然一直到而家…
I：『跟住佢就真係喺你面前自慰？』


我：『嗯…然後我重好大膽要求佢除衫同Bra，再直接揸落佢個波度…』
I：『呀，OMG，重好睇過小說囉！』
…
I：『吓！你哋兩個互相開時停就係為咗惜對方？好浪漫呀，點解發明呢樣嘢嗰個唔識咁對我？』
…
I：『呀呀…真係唔止Stella底褲濕晒…估唔到我三十幾歲人仔都有埋…』
我講下講下何嘗不是又硬晒呀，Stella，我真係好掛住妳，唔知妳而家過得點呢；雖然係有啲攰，不過知道Icarius佢可以開心返我都好滿足，至於佢現實做緊乜我就不得而知喇。
到咗第二日，一整日都好平靜，Cindy去咗鄉村大學打探我都無謂騷擾佢，Icarius就繼續喺度睇佢嘅小說，我寫完game評之後就喺屋企百無聊賴直至到夜晚十點鐘。
C：「啦啦啦啦！」
佢自己開門入咗嚟，紅粉緋緋咁應該係同人飲完酒，不過我早就慣晒無乜特別。
C：「喂！傻仔聽日晏晝去見工啦！」
Cindy一攤落梳化就講咗呢句嘢出嚟，我完全無諗過可以咁順利；後尾先知完來呀Eric Sir一早就嫌人工低，交通唔方便，想專心搵書而計劃劈炮好耐。
我：「講真㗎？真係咁簡單？」
C：「呵呵呵，我超勁！快啲崇拜我啦！」
我：「喂，妳唔係色誘佢等佢放棄份工呀…」


Cindy佢坐得超樣衰一隻腳放落地，另一隻腳就擺上梳化，我望來望去發覺唔對路於是揭起佢條裙。
我：「妳條底褲呢？」
C：「做乜嘢呀？擔心我呀？哈哈，頭先班低B毒撚engine仔話難得有女神嚟同佢哋飲酒，話要搞個女神爭霸賽挑戰酒量，我覺得飲酒好無聊咪叫佢哋玩相撲，贏咗嗰個可以攞到我條底褲…點知…哈哈哈哈哈，贏咗個傻仔條底褲都未揸穩就俾人Con到…嘩哈哈哈哈哈！」
我：「Cindy…咁妳無嘢呀嘛…」
C：「有乜嘢喎，摸下睇下又唔會蝕嘅，做人都係想開心啫，我未至於好似Erica咁想俾班臭男人輪姦。」
我：「嗯，辛苦晒妳，妳無事就好。」
C：「係呀，重有樣嘢話畀你知，Stella應該今日飛咗喇，佢會去美國麻省讀書。」
我：「Stella…麻省…嗰間？」
C：「嗯，係佢嘅話就當然係嗰間。」
曾經，我同佢嘅距離只不過第一同第二，而家我終於知道乜嘢叫十萬八千里；我坐喺梳化度，攬住Cindy個膊頭，一時之間都唔知講乜嘢好，我諗Stella可以去到呢間學校讀書，一定可以實現到佢嘅夢想，將來一定會好成功同幸福。
C：「咁想見人哋咪考入去一齊讀。」
我：「咁樣，真係好？」
其實我講唔出口，如果我話想去美國讀書即係我要掉低Cindy喺香港，雖然我唔知佢點諗，但作為一個女仔我相信個心點都會唔舒服。
C：「如果你認為係值得追尋嘅嘢，你咪去做。」
我：「但係MIT…」


C：「我相信你嘅能力，由一開始到而家都係。」
我：「只不過我連點樣開始都唔知道…」
C：「你開始準備聽日見工先呀仆街！唔好剩係得個諗字呀，我好辛苦咁幫你㗎！」
我：「知道！我一定會努力！由聽日開始！」
C：「唓，又唔係為咗我努力。」
我：「Cindy…」
C：「不過，我係好欣賞嗰啲會向住目標燃燒自己，發光發熱嘅男仔嘅。」
我：「多謝妳，一直喺我身邊支持住我。」
C：「多謝Stella啦，係佢叫我咁做。」
我：「妳講真㗎？」
C：「唔知呀，不過既然我要代佢睇住你，我諗佢都會支持你嘅…過嚟陪我沖涼先啦。」
努力，呢兩隻字對我嚟講真係好玄，我好似有好努力過，又好似無努力過，我成日懷疑DSE改我卷條友求祈剔所以我先有八粒星星，至少我呢幾年望住Cindy佢都努力過我好多，我真係有啲慚愧。MIT MPhil要求我唔係唔知，我肯定我而家情況係無可能，但唔代表我應該放䠋。呢一晚同Cindy做完愛之後就瞓咗一覺好嘅，直到第二日打起精神去見工。
C：「喂，傻仔，雖然話係Eric Sir推介你去替佢無乜可能唔請，但你都同我醒定啲呀！」
我：「放心啦，我會正常表現自己。」
C：「其實話時話今次好似係你第一次返工。」
我：「咁我啲freelance都係工嚟嘅。」
C：「性質唔同嘛，出發啦，晏啲話我知幾時收工等我去接你。」
大大話話Cindy都幫人補咗三年幾，到今時今日我呢個曾經的哎呀學霸先第一次同人補習，真係諗起都覺得搞笑…唔得，我要打起精神；結果諗下諗下我就已經入到嗰間補習社，reception度企咗個鬍鬚呀叔類似係老細咁嘅物體。
我：「你好呀，我係Eric Sir介紹嚟見工㗎，我個名叫Issac。」
鍾：「你好，我係鍾生，入嚟謦啦。」
佢帶咗我入去一個課室，而家三點未夠當然未有學生喺度，呢度都幾簡潔，大約有二十set枱櫈，牆上面有兩塊白板，教師枱上面有部notebook仔加部迷你projector。
鍾：「雖然你係Eric Sir介紹嚟，不過循例我都要問下你啲嘢嘅，你而家係咪重讀緊U？」
我：「係，我而家喺城市入面的大學讀緊computer science，今年係Year4。」
佢聽到之後好似有少少不悅，唉，中產地區口面。
鍾：「你之前有無私補或者補習社工作經驗？」
我：「無，不過我以前都會教其他同學仔溫書。」
我就係唔識好似Cindy咁老吹，鍾生口面就更…
鍾：「你應該知道Eric係教DSE理科，介唔介意話我知你嘅DSE成績。」
我喺個公事包度遞咗張Cert畀佢。
鍾：「呀…Eric Sir介紹果然信心保証呀下，佢個衰仔無端端突然走咗去，今次真係要麻煩晒Issac你呀，一陣就靠你睇住班學生，係呢，呢度理科係補星期一三五六，如果你開學嘅話唔知啲時間就唔就到呢？」
嘩，呢個一百八十度變臉，中產呀！真現實！
我：「無問題，我會就返啲course，四點打後一定OK。」
鍾：「哈哈，咁就真係very good喇，嗱，呢邊隔籬課室就係低form嘅，中間呢度有個office仔，哎呀，好亂添，你當係雜物房啦，參考書同影印機都喺晒度…」
就係咁，我就代替咗Eric Sir成為呢度嘅阿Sir亦係我人生第一份用嚟『返』嘅工，雖然唔識得你，但都要內心mode同你講返句多謝！後尾我先知Cindy佢見都無見過人哋…
鍾生佢重有另外一間鋪喺天后，所以佢同我搞完啲admin嘢影印身份證就走咗，佢重叫我要威嚴啲，呢度教高form嘅就係最大粒嗰個，結果我就坐喺間房入面對住四埲牆等運到。
女：「呀，你好呀！你就係替Eric嗰個？」
我：「係呀，我今日開始會替佢，我叫Issac。」
Z：「我係呢度嘅理科DSE Miss，我叫Zoe，喺度做咗年半㗎喇。」
我：「理科DSE？咁同我有乜分別？」
Z：「我睇中四五㗎咋，就考嗰啲都係靠你，再隔籬房係中一至中三，有兩個阿Sir一個Miss，佢哋都會輪流教某啲DSE科目嘅。」
大概重有十分鐘開工，各人都已經返晒嚟，不過唔關我事，我搞得掂中六理科就得，主力科其實係數學，物理，M2，當然啦，化學同M1我都游刃有餘，只不過補習社點sell家長我咪點補。
我攞住張點名紙，上面真係有Laam Hei Man呢個名，我都算放下心頭大石，到四點半上堂時啲學生都差唔多到齊晒，我亦都見到佢…講真，我差啲
就當咗佢係Icarius，外表係點？大家已經知，不贅，有啲學生嚟補習著校服，不過琋玟佢就係著便服，可能因為屋企喺樓上啦；一件長袖米白色針織衫，下身係一條灰色過膝裙尾位有少少開叉，個感覺係好乖女，decent，斯文，當然我望咗一眼就唔去特別留意佢，啲學生見到唔同咗阿Sir個表情都有啲訝異。
我：「咁多位同學你哋好，因為某啲原因Eric Sir唔可以繼續嚟幫你哋補習嘞，由今日開始我就會代替佢，你哋可以叫我做Issac…」
可能佢哋只係以為我嚟代一堂，個個都當堂O晒嘴…
我：「好啦，第一次見面點一點名…」
琋：「阿Sir，我有嘢想問。」
我：「呀…呢位同學有乜嘢想問？」
好險…差啲就叫錯咗佢做琋玟同學，明明第一次見連名都未點…
琋：「Eric Sir無端端走咗都無辦法，但係我哋想知道Issac Sir嘅level大概係點，你知道我哋得返四個月到，啲時間唔可以嘥，而且我哋屋企人都會問返我哋…」
冚，家，中，產！我喺心入面吶喊著。
我：「咦，其實我同Eric都唔係好熟，佢係咪好叻㗎？」
琋：「咁佢起碼喺三大讀Engine，DSE都有四五粒星。」死妹釘又要逼我出殺手鐧…
我攞返公事包張Cert出嚟，行咗去佢前面…
男：「嘩！好呀！Eric啲Chem好廢㗎，我可唔可以順便問你呀！」
一陣嘩聲此起彼落，琋玟佢亦都識趣收聲。
我：「無所謂嘅，空閒時間都可以問我理科嘅嘢，M1同埋ICT都可以，中英文就唔好難為我喇，咁我哋開始點名先…」
就係咁，我開始咗第一日嘅工作，今日係星期三教Physics，啲嘢對我嚟講當然好簡單，不過第一次正式教書都要適應下嘅。
好充實，直到放工個腦都無停過。
C：「點呀，第一日開工，有無蝦轆呀？」
我：「梗係無啦，好開心呀！可以對返住以前日日溫嘅嘢，個感覺好warm，就好似返返去中學自修室咁，睇住Stella死計爛計，然後我又教妳計數；呢度中產區啲人真係唔同啲㗎，啲學生唔會搞事，就算唔係叻嘅都會認真做嘢，同我哋以前中學好唔同…」
C：「知喇，即係話我以前廢…咁琋玟妹妹佢點？」
我：「呀，我顧住講書都無理過佢添，不過佢好似真係好叻，份人斯文認真，係開堂嗰陣質疑過我夠唔夠quali啫。」
C：「嘻，知你專業喇，快啲同我落food court食嘢啦，就快閂㗎喇。」
我：「Food court夠嗱？使唔使試下其他？」
我知道呢度有好多好嘢食，返完工又好似搵咗錢咁，所以問下佢。
C：「最好嘅嘢食同你喺日本食過晒啦，無謂嘥錢，跟我行啦。」
說來慚愧，因為種種原因，Grad trip之後我都無再同過Stella或者Cindy去旅行，對上兩次去日本探親都係得我自己一個人去…
呼！好耐未試過充實嘅感覺，同Cindy食完飯之後就送佢返佢自己屋企，而我臨瞓前就同Icarius講下佢個高曾祖母點樣，可能佢真係好悶，我同佢講乜甚至啲學生點計錯數佢都好開心。