【120k最後釋出】科學禁書目錄——索引上的女孩們（完）: 《沙丘之女》
我：「又真係無出事喎，幾好食。」
C：「又唔係第一次煮畀你食，碎料啦，煎蛋公仔麪，邊個唔識煮。」佢一路好殘忍咁咬甩個八爪魚頭一路同我講。
C：「不過我就覺得自己煮得嘛嘛，我食過啲好味更加多好多倍嘅公仔麪。」
我：「公仔麪可以有幾大分別呀？話我知等我去試下吖。」
C：「你估下邊度有得食，好近㗎咋！」
我：「大快活？YYM親自煮嘅？」
C：「傻瓜！係我變咗做透明食嗰碗呀！」
我：「多謝妳讚我…」
自從真相大白之後，Cindy對於嗰次經歷好似更加懷緬，講親嘴角都會浮起一絲絲嘅笑意；明明就係我鹹濕耍手段嚟得到佢嘅身體，但喺佢心目中就變咗做一次最幸福俾人追嘅過程，我諗呢啲就係叫做真愛。
我：「睇完晒啲message有乜comment？」
C：「唔識comment，我都唔知點幫你。」
我：「其實妳覺得佢嘅舉動合唔合理？」
C：「唔想睇住重視嘅人受苦，而要毀滅一切，咁都好正常吖，如果過程唔涉及痛苦嘅話，哲學嚟講只係存在與否，有同無。」
以前Cindy係一個終日flirt仔無心向學嘅女仔，但我可以肯定呢一刻佢絕對係個稱職大學生。
C：「如果存在係一種負數嘅話，倒不如變成無，零都好過負，好似一間無得救嘅蝕錢公司咁，執咗佢好過。」
我：「即係我應該幫佢？」
C：「你自己諗啦，幫佢你都有成本。」
我：「如果我單單為咗一個人要睇住嗰邊生靈塗炭，我都覺得過意唔去。」
C：「但人係自私，百幾年後嘅事講真唔關你事，呢個世界又無人可以肯定到我哋呢邊到時真係會變成嗰邊。」
我：「其實有人嘅地方就有災難，我覺得點都避唔到，所謂嘅歷史真相都只係睇到嘅表面。」
C：「係㗎，真真假假無人知，如果我扮嬲你咪會惜我氹返我囉。」
我：「無論點我都惜妳嘅…唔使扮嬲…」
C：「如果我喺出面俾人搞大咗但我呃你話係你嘅呢？」
我：「…就算妳直接搵我食死貓…我都…」
C：「唔好剩係識扮好人啦，你應該可以有自己嘅判斷，知道點樣為之正義。」
我：「啱嘅，我諗我點都要試下幫佢先。」
C：「不過你都幾好嘢㗎喎，對住個百三年後嘅姐姐都可以flirt佢。」
我：「我平時淨係同妳哋溝通，無乜啲所謂普通女仔friend，所以咪咁囉…妳呷醋？」
C：「唔係囉，flirt多啲啦。」
我：「點解咁講呀？」
C：「佢係一個沙丘之女，好需要你跳落佢個窿。」
我：「沙丘之女？」
C：「沙丘之女喺日本一本哲學小說，講有個女仔喺個窿入面出唔返去，邊個男嘅跌入去就會俾佢食咗，即係心靈肉體都會被侵佔。」
我：「有無咁誇張呀？」
C：「你明明好精於此道㗎，如果唔係做乜將我變透明困喺你屋企呢？困下困下就實有得食。」
我：「Cindy…」
C：「可惜你係引狼入室，我最鍾意做沙丘之女，食返你呢啲傻仔。」
望住Cindy狡猾嘅笑容，我都唔知佢邊句真邊句假，但肯定有一句係真，我食唔住啲女人。
C：「總之講得過去嘅咪幫下佢囉，如果幫佢你會死又或者Stella會死嘅話，我都會用盡一切方法唔俾件事發生；生於這個年代，我們都有一種責任，就算最後解決唔到問題，都唔應該推畀其他人。」
我：「咁我試下搵佢口中講嗰個女仔先。」
C：「Swap咗佢，你溝咗呢個女仔，歷史咪會翻天覆地囉…不過話時話有無咁易搵？」
Cindy讀咗商科之後諗啲嘢好有商業操作嘅味道，呢樣我就不置可否喇；我將間學校名同個女仔名一打入Google度搵，點知一enter…
C：「學業奬…音樂表演奬…美術奬…STEM優異設計奬…猛人嚟㗎喎！」
我：「睇嚟比Stella有過之而無不及。」
C：「你哋個個都咁叻，唔怪之得去到你呀塞嗰代會搞到世界大戰咁啦，真係一早整定。」
我再click入佢校網睇佢攞奬啲細節，我當堂呆咗，佢同Icarius差唔多一模一樣樣，只不過係著住校服同埋髮型唔同。
C：「嘩，無喇無喇，我同Stella兩個地位不保，認真岌岌可危。」
我：「點會…我好重感情。」
C：「講笑咋，但就算佢咁出名好易search到，你又可以點，唔係學啲變態咁去接人放學呀？」
我：「佢間學校我有相熟嘅人…可以再打探下。」
C：「乜你識咁多friend㗎咩？」
我：「邊有吖…」
C：「係佢？」
我：「嗯。」
C：「我唔知你，自己諗，唔影響你。」
既然諗住要去做，就唔好畀藉口自己，一步一步行落去見機行事就會有方向，於是乎我WhatsApp咗久違嘅『佢』，原來佢重未考晒試今晚會喺U度溫書，我話有急事想搵佢謦下佢話OK。
我：「對唔住呀Cindy，要留低妳一個喺度添…」
C：「乜嘢留低我呀！家陣我有鎖匙㗎，唔係俾你安排我喺唔喺度，你快啲去啦，琴日我搵U-mate，今日到你好公平啫，記住出事嘅話要做足安全措施呀。」
我：「乜妳咁睇我，我同佢一早就無…」
C：「有無都好啦，我忍得住唔代表你忍得住。」
點睇佢都係以退為進，等我提醒自己唔好出事。
我：「Ella，好耐無見，近排點呀？」
好諷刺，我嘅霧水情緣個名叫Ella，同Stella只係差兩個字，雖然其他嘢係差十萬八千里。
E：「咪同以前差唔多，無乜特別。」
我：「妳十月生日，我補返份禮物畀妳吖。」
然後我將一個盒推咗去佢面前。
E：「嘩！點得㗎，我而家…點可以收啲咁貴…」
我：「妳收咗佢啦，如果唔係我放喺度都無用。」
E：「你…你竟然重記得我鍾意呢隻錶。」
我：「其實妳嗰次望住佢心花怒放之後第二日我就已經買咗，諗住等生日送畀妳，結果…不過我又真係記得妳鍾意乜嘅。」
E：「多謝你呀…但而家我都唔知點戴出嚟…」
我：「放喺書枱睇都開心嘅，或者偷偷自己戴。」
E：「喂，你搵我出嚟唔係淨係諗住送嘢畀我掛？」
於是乎我就講咗我個目的出嚟。
我：「我知妳有參加Alumni，所以先冒昧搵妳，如果妳幫唔到我都唔緊要㗎，唔使勉強。」
E：「幫就一定幫到，佢哋而家個學生會Chair同我都熟，呢啲風頭蠆喺學校大把人昅住，好易問到佢啲嘢，但我想知原因，你…對佢有興趣？」
我擰擰頭。
E：「你身邊有人對佢有興趣？」
我再擰擰頭。
E：「咁何解你會無端端搵一個同你完全無關嘅女仔？」我睇得出佢好疑惑，又帶啲醋意。
我：「我嘅原因係好複雜，都唔知點解釋畀妳聽好，但就一定唔係兒女私情嗰啲嘢。」
事實上我根本話唔到佢知，呢個秘密唔可以再有多一個人知道。
E：「你可唔可以肯定唔會傷害到個女仔？」
我：「可以，我用人格擔保。」
E：「咁我幫你啦。」
我：「原來我人格咁值錢。」
E：「識咗你半年知道你係乜嘢人嚟嘅。」
我：「多謝你相信我。」
E：「但我有樣嘢一直想問你，嗰陣除咗我，你係咪重有其他女人？」
我：「點解咁問我？」
E：「因為我諗唔明，其實我哋一齊嗰陣都算開心吖，又無乜鬧㗎，我對自己外表都有返咁上下信心，嗰方面都算夾，點解我話分手你可以表現得咁平淡。」
我：「對唔住，係我唔啱，我應該早啲向妳坦白。」
E：「咁其實我都煩咗好耐幾時同你講…」
我：「吓？」
E：「嗰晚玩得咁興奮，其實第二朝就想話你知，但我唔想咁殘忍一盤冷水淋落去…」
我：「結果我哋就開心咗半年。」
E：「其實我無諗住當你係水泡。」
我：「都過咗去，點都係我唔啱在先。」
E：「你女朋友又係喺外國？」
我：「唔係。」
E：「咁有乜可能，你嗰陣日日陪住我喺U，陪我行街，從來無電話打畀你，又唔使覆message，我重記得喺U同你一齊撞到你個靚女中同Cindy拖住佢男朋友，係咁笑你呢個毒男終於識到女仔。」
我：「乜我真係似毒男咩？」
E：「咁又唔係，但邊會有女朋友容忍到你咁。」
我：「因為佢唔係我女朋友囉。」
E：「吓？你唔係結咗婚呀？」
我：「當然唔係啦。」
E：「炮友，SP？」
我：「妳話我會唔會為咗個SP就可以放手妳呢個女朋友吖？」
E：「即係你有其他對像？單戀人？」
我：「可能係掛，我都唔係好知…係呢，其實妳嗰陣諗住同我講分手會預計係點㗎？」
E：「我以為你會喊到死…之後我又跟住一齊喊…然後我哋做愛…做完我又唔知點算好。」
我：「咁我係咪令妳少咗好多煩惱？」
E：「係嘅…如果唔係我都唔識揀。」
我：「其實由妳向我坦白嗰一刻，妳咪係已經揀好咗囉。」
E：「點解咁講？」
我：「妳同男朋友好似話係中學開始㗎嘛，呢個時期識返嚟嘅感情係最難能可貴，好好珍惜啦。」
E：「你講得啱嘅，雖然我哋過得好平淡，所有嘢又變返好似以前咁。」
我：「愛情唔係為求刺激，日日都刺激嗰啲唔係叫愛情。」
E：「係呢，如果萬一有一日我失戀，我應唔應該搵你呀？」
我：「如果妳唔開心想搵人謦，想訴苦，想有人安慰妳，我隨時歡迎妳搵我㗎。」
E：「唓！咁好啦。」
我：「咁我都走先喇，妳繼續努力溫書啦，等妳嘅結果。」
E：「嗯，byebye。」
如果唔係Stella同Cindy，我諗我真係會喊個半死，點都唔會放Ella走，重可能會同佢個中同男朋友決一死戰…而家因為佢嘅隱瞞反而解決咗我嘅一個煩惱，其實佢真係一個好女仔嚟，只不過好多嘢唔係單睇對像就決定到，時間環境先係擁有最大嘅影響力。
C：「嘩，咁快就返嚟？快槍手！」
我：「無呀！做完正經事咪返嚟囉。」
C：「點呀，搞唔搞得掂？」
我：「OK呀，佢話會幫到我。」
C：「哈，果然冧女有一手，就連EX都要臣服喺你手上，為咗你條PK刮師妹啲料。」
我：「唔好講到我成個變態咁得唔得。」
C：「你同佢點，係咪真係已經玩完？」
我：「做乜喎，好想我哋死灰復燃咩？」
C：「唔係呀，識咗你咁耐第一次見你拍拖覺得好玩咋嘛，佢都幾好吖，靚女斯斯文文咁。」
我同Cindy嘅肉體關係，超越情侶；我同佢嘅情感交流，超越知己；我同佢嘅信任，超越家人。係咪應該用冤家嚟形容呢？呢啲異想天開嘅對話真係好難會喺其他男女關係之中見到。
相反嗰陣Stella知道我有女朋友之後就哦一聲，然後話要專心溫書唔阻我，就係咁樣。
C：「如果你同佢撻返著可能沙丘之女就飲得杯落呢，話唔定歷史咁就改寫晒。」
我：「係喎…等我話畀佢知我搵到佢祖先先。」
C：「你跳入佢個窿度吖，唔使理我㗎喇。」
我：『Icarius，我已經搵到妳講嗰位女仔。』
I：『嘩，咁快！一瞓醒就搵到。』
一瞓醒…嗯，可能佢瞓咗好耐，又或者我哋兩邊時間唔同步…乜都好啦。
我：『我只係知佢而家喺邊，重未接觸佢嘅，其實我下一部應該要做啲乜。』
I：『呀…其實我都唔知，不過佢遺物重有本日記，寫住佢十八歲生咗個女，而據我所知佢就係得呢個女，如果制止到嘅話…』
我：『果然流住淫蕩學生妹嘅血！』
I：『食屎啦！老而不！』
我唔理佢，將個話題拉返去正常。
我：『但係如果佢呢個女唔出世，即係妳，妳對上阿媽定阿爸就會全部消失。』
I：『正確嚟講係我同老竇同阿嫲同太嫲會消失，不過點都好，佢哋已經消失晒，所以對我嚟講無分別，只要而家一切停止就好。』
我：『嗯，咁我睇下有無辦法阻止佢識男仔啦；呀，同埋我諗住聽日去做DNA掃描，我諗個結果file會好大，可以點send畀妳，copy and paste都要抄幾日喎。』
I：『係呀，順便為咗等你容易send小說畀我，我寫咗少少程式碼，你加落安裝檔度update隻app就可以send到一般16進制檔。』
我：『一早就應該加啦，計我話…妳係為咗啲鹹濕小說先咁落力咋…』
I：『你講乜呀！』
我：『想要咩啫？係咪要師生戀嗰啲？想要女學生色誘阿Sir定係阿Sir䚎學生妹裙底斷正？』
I：『我唔係睇呢啲囉！』
我：『咁我已經準備咗《戰爭與和平》，《悲慘世界》同埋《動物農莊》畀妳。』
I：『唔好啦…你話乜就乜啦。』
我：『咁你想睇女仔主動定被動？』
I：『主動啦。』
我：『即係女上男下嗰啲？』
I：『你決定啦…我只係一個正常嘅女人。』
我：『妳有無睇過《沙丘之女》？』
I：『無…我以前睇嘅書差唔多全部係學術書籍。』
我：『咁，我準備完就send畀妳啦。』
I：『多謝你，Issac。』
C：「謦得好開心咁喎。」
我：「無呀…都係咁樣啫…」
C：「唔係話你，我係話作為一個女人同你講嘢會好開心啫，唔使咁緊張。啲小說我幫你搵畀佢，你搵其他正經嘢做啦。」
其實…唔知Cindy點諗嘅呢？呢幾年嚟佢算係對我最大影響力嘅一個人，尤其係佢嘅存在好似令我同Stella相處得更順暢，當然無端端溝到Ella嘅口才都係因為成日對住佢培養返嚟…種種現實層面嘅嘢我當然係知道。
上網搵咗陣，原來而家做全面基因列序都唔係好貴咋喎，四五千港子就搞掂，而且過兩日就有result攞，睇多幾睇揀定咗一間就決定聽日同Cindy一齊去。
第二日中午我就同Cindy走咗去中環做基因列序，整體嚟講係幾新奇有趣，不過過程都只不過係細胞抽取同埋畀錢，無乜值得講；難得出到港島就順便同Cindy拍拖行街，搭下叮叮懷舊下，講真Stella同Cindy兩個知我係金礦都無物慾薰心係非常難能可貴，除咗Grad trip使多咗啲錢之外其餘嘅生活同以前無乜分別，反而同Ella一齊嗰半年真係幾物質，隻錶都係我買過送畀女仔最貴嘅禮物嚟。
搭下搭下我哋就搖到去北角。
我：「呀琋玟妹妹就係喺度讀中學。」
C：「我知呀，東區傳統band1名校。」
咁啱得咁橋，我電話WhatsApp就收到message，估唔到Ella辦事效率快到咁。
C：「睇嚟佢真係好重視你，一個朝早就搞掂。」
呢位琋玟妹妹家世真係唔簡單，老竇以前係某大日本電器代理嘅高層，呢幾年跳咗去間科技初創工司做總監，阿媽就係某大保險公司嘅分區經理，佢係獨生女，一家三口住喺太古城；屋企管得非常嚴，係學校人所共知嘅O0，即係occupied by parents嘅0手女仔；由於中六嘅關係大部份課外活動都停晒，剩返某青年管弦樂團嘅常規練習，其餘就係一個禮拜學一日演奏級鋼琴，同埋大量嘅補習，附註係重識吹長笛；至於學校嘅嘢，同我上網睇嘅差唔多，對我嚟講算係無用嘅資料。
我：「呢啲女仔滴水不漏有乜可能俾人搞大肚呀？」
C：「我就唔同意喇，越係過份保護，一出事就越大鑊，咪話我話。」
我：「咁邊啲女仔先最安全？」
C：「我咪最安全囉，中四就識用condom，識計安全期，睇得出個男仔幾時射。」
我：「咁妳又同我咁危險！」
C：「其實我懷疑咗你係廢J好耐，啲精係唔識游水，YYM同Erica唔計，我同Stella真係四年無事都幾犀利，計我話Icarius啲擔心可能係多餘，佢應該叫你驗精而唔係做基因列序。」
我：「妳係咪真係好想我搞到妳哋出事啫。」
C：「可能我同Stella一早協定好邊個出事就負責埋你單。」
我：「妳講真㗎？」
C：「有無協定你都要硬食㗎啦，唔係咩？」
我：「都唔知妳邊句真邊句假…」
C：「嘻，我同Stella佢兩個點你理得我哋吖。」
我：「嗯…講返正題，呢個女仔咁樣我都接近唔到㗎啦…雖然我都識識地吹牧童笛。」
C：「你真係好意思講出嚟唔面紅嗰下好嘢喎。」
我：「咁唔係點喎，叫妳教我彈琴咩？」
C：「咪玩啦，我啲鋼琴…我教你吹蕭就得。」
我：「嗯…咁睇嚟可以closed file。」
越嚟越複雜，有問題隨便留言問，多謝支持！