【120k最後釋出】科學禁書目錄——索引上的女孩們（完）: 名叫Icarius的孫新抱…
再O嘅嘴都形容唔到我呢一刻嘅面容，但點都好，我終於等到同隻App有關嘅人message我。
我：『孫新抱？乜意思…』
『咪你個仔個仔嘅老婆囉。』
我未至於無常識都唔明呢三隻字，但究竟乜事…
我：『或者，我可以點稱呼妳？』
I：『Icarius。係呢，你係我長輩，請問我可唔可以直接叫你Issac呢？』
咁嘅名…唔通係未來嘅潮流？拜託佢千祈唔好叫我阿公或者阿爺，雖然呢一刻我都未係好相信佢真係嚟自未來嘅所謂後代。
我：『妳叫我Issac啦，我有乜可以幫到妳？』
I：『想問下你而家係乜嘢年份？』
我：『2025年嘅十二月。』
I：『嗯，咁睇嚟應該OK。』
我：『咁妳嗰邊係乜年份？』
我從來無諗過有朝一日我會問人呢樣嘢，好似問時差或者問天氣咁。
I：『2155年。』
我：『介唔介意我問下妳幾大？』
我問完都覺得好奇怪，無論佢幾多歲都好，相對上我都係過百歲，年齡好似無乜意義，但至少我要確定佢唔係一個玩嘢嘅細路女，雖然佢話佢結咗婚…
I：『34歲，做乜？』
原來係一個大我十年到嘅姐姐，即係大過Erica少少，咁我諗溝通上應該無問題。
我：『我同妳相差130年，呢個數好似唔係幾啱咁嘅，止唔止差兩代？』
I：『你問你個仔同你個孫啦！我想㗎咩！』
我：『佢哋好遲生仔？定係我？個孫喺妳身邊？』
I：『你問唔到佢哋喇…已經過咗身…』
吓，乜咁搞法呀…一百三十年後…如果我十年後生仔佢都百二歲，死咗好正常，不過我孫新婦先三十幾，阿孫做乜咁唔小心呀…
我：『無嘢嘅，我都已經一早死咗…』
I：『你而家喺你嗰邊活緊咪得囉！喂，係喇，我琴日畀你嗰隻App你無亂用吖嘛？』
我：『點亂用呀？咪同妳講緊嘢。』
I：『我係話嗰隻修改器呀！』
總覺得佢係想加死蠢兩隻字喺後面鬧我。
我：『吓？個修改器我用咗四年喇喎…』
I：『四年！無出事吖嘛？』
我：『算係無事掛，係搞到自己有啲煩啫。』
對住自己後代，我唔想話佢知我用隻App搞到身邊幾個女人，而且佢重要係一個大過我嘅姐姐；但諗深一層佢又好可能已經知道晒我啲衰嘢。
I：『好彩，我幾驚你已經搞到世界大亂。』
我：『唔會啦，我未至於無聊到製造幾萬公噸鈾239喺我唔鍾意嘅國家上面。』
I：『千祈唔好！拜託！本來我畀完隻App你諗住即刻警告你唔好亂用！』
我：『放心，我係一個有道德嘅人，唔會亂嚟，隻App嘅功能我都知得八八九九，一切都會好小心；不過妳話琴日畀我，但我已經用咗四年，係乜事？』
I：『應該係我琴日斷咗線，導致時間弦流動軸角度唔同咗，時空同步出現咗跳動。』
我唔知佢噏乜，但又感覺到佢想向我表達啲乜，真係好奇怪。
我：『妳叫我離開Stella究竟係乜嘢一回事？』
I：『好長篇，好難解釋，總之你兩個喺埋一齊導致咗呢個年代嘅悲劇，我想呢一切消失！』
我：『其實Stella啱啱離開咗我，算唔算幫到妳？』
I：『如果你已經幫咗我，我就唔會睇到眼前嘅嘢…你而家係咪重會諗住搵返Stella？』
我：『會…係咪我同Stella會有後代，而啲後代做咗啲嘢搞到你哋而家好慘，所以要改變歷史？』
我諗呢個算係一個好合理嘅推斷，我個腦應該係無退化過嘅。
I：『你呢個講法算係正確，但我哋唔止慘咁簡單。』
我：『但如果我改變咗歷史，原本個仔同孫就唔會出現，我同殺咗佢哋有乜分別？而妳都唔會有機會做到我孫新抱，係咪會乜都無晒？』
I：『佢哋而家都死咗…可以咁講，到時我哋呢度成個時空狀態會改變，你都唔會再遇到一個會搵你嘅我。』
我：『咁可唔可以理解做妳消失咗或者死咗？』
I：『如果我對上嘅祖仙繼續按原路推動歷史，物質態嘅我好可能會出現喺一個平衡空間，但訊息態嘅我就一定唔會再存在。』
好複雜，有無course可以畀我進修下…
我：『妳想改變歷史，點解唔搵啲關鍵啲近啲嘅節點落手，要搵百幾年前嘅我？』
I：『你估我唔想？原因係我只可以搵到你…』
我：『得我？點解？』
I：『因為你而家用緊部電話就喺我面前。』
我：『乜話！我部電話用到一百三十年！』
I：『又唔可以咁講，就算你而家送到部電話嚟我呢度都唔會用到，訊號都唔同晒，況且我哋唔再係用電話；但由於你呢部電話係Stella遺囑命令後人要用最高規格保管，而且一早就已經鎖咗喺個低溫低壓嘅氦氣箱入面，無人知點解要咁做，估係同上面個護身符有關，傳到嚟我呢度之後我嘗試將佢同歷史中嘅佢連線，入面粒電就死咗喇，但我仍可以用其他方法幫佢通電，抽到你部電話嘅定位紀錄同網絡組態硬設定，再將啲資料套落去某個大系統處理，喺你時空特定地方製造電波，咁就可以連線成功。』
我：『所謂嘅大系統即係？』
I：『就係你個修改器背後嘅邏輯系統，你唔係諗住靠你部電話仔可以做到呢啲功能呀？』
我：『當然唔係，可唔可以話我知背後系統個運作原理？』
I：『我都未有足夠嘅智慧明白，我諗你都無，佢係你個孫嘅發明嚟，但就害死咗佢…』
我：『原來係咁…我而家有啲攰，可唔可以抖一抖先，遲啲再講？』
I：『好呀，其實我都講到好攰，反正Stella唔喺你身邊你都無嘢做到，但你要應承我Stella如果出現返要即刻話我知。』
我：『可以；呀，問埋妳最後一樣嘢，妳係咪香港人？香港重係講粵語？』
I：『我唔係香港人，算係華人血統掛，我對香港無乜概念，呢個地方好似消失咗咁，而家都無人會用粵語溝通，我係用緊翻譯器。』
我：『明白，如果我用書面語是否就可以？』
I：『你說通用中國語？還是可以的。』
我：『算啦，妳都係翻譯啦…咁我哋聽日再講。』
I：『好呀，拜拜。』
我諗我無懷疑嘅餘哋掛？四年幾前我懷疑隻修改器，諗住邊個咁中二搞出嚟，結果我就狠狠地被打面，頭先呢個姐姐同我講啲嘢都好合乎邏輯，絕對唔似一個惡搞人嘅喺度老吹。我唔明嘅係佢點解要做咁多嘢搵我，人類不嬲就永遠犯重覆嘅錯誤，製造世界上各種各樣嘅苦難，以前嘅人咪又係咁過，元朝大屠殺，中世紀歐洲dark age，一戰二戰，文革…嚟到而家，係咪叫好地地？我唔知，我淨係知我而家唔多好地地…
雖然我唔知所謂背後嘅系統可以做幾多嘢，但係佢至少多一個功能就係跨時間咁傳送訊息；如果我有呢個功能嘅話我會做啲乜呢？返去四年前叫自己唔好同Stella分手？四年次嘅自己會唔會鬧爆我呢？定係叫佢唔好貪心攪Cindy？不過我而家同Cindy相處得咁好真係連而家嘅我都唔捨得。或者返去半年前叫自己疊埋心水揀定Stella同佢表白一齊？我好驚結果又係成日鬧架，而且唔見得佢會為咗我唔去美國讀書，到時long D又係兇多吉少。
你話點搞吖！根本就係多個香爐多隻鬼！工具越多，可能性越大就越令我根本唔知自己想點，好似點都死路一條，就連望住床下底啲黃金我都覺得煩，倒不如叫佢四年前唔好貪得意㩒download制…
咁又唔得，我同Stella，Cindy，YYM，Erica嘅種種經歷，我到而家都重記得好清楚，我好珍惜我哋一齊走過嘅路…
結果我嗰晚就攞咗啲粒子科學同量子力學嘅參考書出嚟睇，話時話我而家minor Physics啲成績係最好嘅，其實都幾諷剌；睇睇下直到唔知幾點我就昏迷咗喺張床上面。
到咗第二日，我繼續我嘅假期，Stella就當然繼續消失，我知佢份人好硬頸，要唔俾我搵到佢佢就講得出做得到。理論上佢應該重喺香港，我係咪可以去試下搵佢？去U搵佢？佢間U大到咁…而且佢因為唔想俾人知自己有親密嘅男性朋友，所以佢一直唔準我去佢U搵佢，就連佢嘅活動範圍我都唔知道。去隔籬屋邨搵佢？其實咁多年嚟我都未上過佢屋企，佢話佢屋企又細又亂，阿媽成日喺度，而我屋企又太方便…
搵到又點吖，佢咪只會再一次請我食閉門羹，而我都係無權say no，唔通我叫佢唔好去讀書咩。或者佢一早諗好咗讀完返嚟搵返我呢，可能佢真係想試我會唔會等佢，又可能想畀個機會我同Cindy認真發展…
好煩呀！女人真係好煩呀！乜都唔想諗呀！
而且重有個叫Icarius嘅姐姐叫我同佢分開…
真係咁大個人第一次放長假係會咁空虛。
胡思亂想完一大輪就出去食嘢，順便買Cindy需要嘅芝麻八爪魚拼盤返嚟。
我：「喂，Cindy呀，我買咗八爪魚喇，妳係咪聽日嚟呀？」
C：「係呀，放心啦，我唔敢放你飛機。」
我：「咦，妳嗰邊咁嘈嘅？補完習嗱？」
C：「係呀，同班U-mate行緊街。」
我：「男定女嚟㗎？」
C：「做乜咁問？」
我：「關心下妳啫。」
C：「唓，有分別咩，就算我同仔上緊床你都係咁㗎啦…」雖然唔好聽但佢講嘅又真係事實嚟，我同佢兩個一直都係咁。
不明男聲：「喂！你睇下！佢條仔打嚟喇，話咗你無行㗎啦。」
不明男聲二：「邊個嚟㗎？邊個嚟㗎？」
C：「好煩呀！仔你個頭呀！…Sorry，係咁先啦，聽日先再講。」然後佢就收咗我線。
呢個時候我唯有做啲正經嘢嚟等自己充實下。
我：『Hi，Icarius。』
I：『嗯，我喺度呀。』
我：『我有啲問題想問妳。』
I：『你問啦。』
我：『妳話妳而家時空嘅歷史係俾我同Stella嘅後代整出嚟，但係如果妳唔send隻修改器畀我嘅話，我當初就應該唔會approach到Stella，亦都唔會有我哋嘅後代，咁又何來妳而家嘅歷史呢？咁呢件事咪變咗無限循環囉？』
I：『呢個，我諗係掛，我都控制唔到，因為我只係憑自己邏輯嚟做事，只要發生咗呢堆事，我就會自然咁搵你，至於你嗰邊嘅事，我唔一定控制到，又或者就算無嗰隻App你都會同Stella喺埋一齊呢，其實時間都係一個維嚟，唔一定要一條直線咁行，可以向前可以向後可以扭曲，只不過我哋自身就好似上咗一架單程火車咁，感覺上時間咪永遠向前不變囉。事實上如果我哋兩邊產生咗邏輯循環，可以解釋做我哋嘅量子態產生咗糾纏，唔係可以咁易分返開，因為信息態唔係一種我哋可以簡單操作嘅嘢嚟。』
睇嚟佢真係無乜責任感，不過講嘅嘢又好合理。
我：『我假設咁問，如果我而家自殺死咗，係咪就可以改變到個狀況。』
I：『應該係，但你證實唔到結果，如無意外而家嘅你同而家嘅我都會消失，不過我唔會要你咁做。』
咪玩啦，人都死咗就梗係會消失㗎啦。
我：『我而家喺電話同妳講緊嘢會create history，咁啲history係咪已經會出現晒喺妳眼前嘅同一部電話上面？』
I：『我唔肯定，亦唔會做呢個操作，我唔想有任何我控制唔到嘅事發生。』
我：『咁妳話我知我個仔幾時出世，我半年到十個月之前都唔同Stella做愛咪得囉…』
I：『啲文件喺戰爭嗰陣毀滅咗好多，而你個孫，即係我老公又從來唔記呢啲資料…』
乜咁似我嘅…我真係連老豆老母生日都唔知，自己又唔慶祝生日，就連Stella同Cindy生日都只係知月份…
I：『不過都無分別，中文有個詞語叫殊途同歸，係好適合用嚟描述量子態嘅信息轉移。』
我：『即係點？』
I：『物質理論嚟講，一滴精入面有上億條精子，只要唔係同一條精子所生出嚟嘅BB就會唔同；但從信息學嚟講，無論係第一滴精，或者最後一滴精，朝早射入去或者夜晚射入去，其至乎係下個月粒卵先射入去都好，只要差異量未大到信息態改變，之後生出嚟個BB同歷史都唔會變。』
聽住個姐姐係咁同我講射精同卵，個感覺真係好Q奇怪，但我竟然好似有少少反應。
我：『有無咁過份呀？』
I：『有無聽過蝴蝶理論？』
我：『有，撒哈拉沙漠蝴蝶拍翼做成南極大風雪吖嘛，地點係邊唔重要啦。』
I：『如果唔係南極係北極得唔得？』
我：『得，呢個理論本身係講失控，不可預測，擴散性骨牌效應，所以我咪話地點唔重要囉。』
I：『試下將時軸反轉？』
我：『無論南極定北極大風雪，另一邊都係撒哈拉沙漠蝴蝶拍翼…』
I：『呢個就係信息態纏繞囉，如果纏唔到就唔會有大風雪亦唔會有人理隻蝴蝶，但如果纏到嘅話個風雪喺邊都未必有任何影響。』
我：『可唔可以用最簡單方法講下背後個系統點運作？』
I：『有個隱藏咗嘅大型太空站，上面有仿星儀，核融合製造能源，有部量子干涉儀喺上面，可以影響維度包括時間空間，能量，物質，各種信息咁樣；其實同你哋而家喺CERN部粒子對撞機嘅諗法差唔多，都係改變現信息組態，只不過你哋嗰部限死咗喺幾粒原子嘅物質上所以無乜作用。』
我：『即係相對論，粒子理論，量子力學去到最後會喺返埋晒一齊？』
I：『Exact7ly，你好叻仔！』
我不得不佩服翻譯器嘅能耐，但俾個咁嘅姐姐話我叻仔都唔係幾開胃，我想知佢係乜料。
我：『想問下Icarius妳嘅學歷？』
I：『我係頂尖分數入大學㗎，我讀Physics，不過俾你個孫搞大咗我之後就無再讀，但我自己有睇書自學，我諗程度係介乎你個年代嘅MPhil到PhD咁樣囉。』
咁講即係叻過我…我諗我喺佢面前都要謙卑啲…
我：『咁我個孫點識妳㗎？』
I：『佢係我個大學教授…』
我：『乜話…淫賤女大學生…勾引教授？哈哈哈哈哈！真係好鬼正！』
I：『食屎啦你！根本係你成家老而不！』
我：『有幾老而不？我而家喺妳面前只係個後生仔，哈哈哈哈哈。』
I：『Sorry，喺我印像中你只係一個滿頭白髮入咗棺材嘅老嘢。』串嘴到咁究竟係學咗邊個？
我：『呢個App係咪send唔到相，連頭像都無嘅？可唔可以知道妳點嘅樣？』
I：『死鹹濕仔我點嘅樣關你乜事喎，可以隔住時間傳訊已經好難，唔好咁高要求啦！』
我：『人有要求，科技先會有進步，以前夠係得ICQ send文字啦，廿年後已經變晒video streaming，我都係想知呀孫嘅眼光啫。』
I：『都唔知你噏乜…你識唔識JPEG coding呀？我搵返個古懂軟件出嚟encode張相畀你喇。』
我：『JPEG原始碼？妳send嚟啦，我應該識搞。』
之後嗰十分鐘佢就一段一段HEX code咁send過嚟，有成十幾段，我就滙返晒入去部電腦入面decode，直到我打開到個JPEG檔。
相入面有個女仔企喺間房入面抱住個乜都無著嘅BB，個女仔望落最多廿歲，個樣好清秀，一頭短黑髮三七分界，落到頸就向內彎；皮膚好雪白，重白過Cindy；條眉好黑好實好整齊，一對大眼超級水汪汪，望落都覺得好醒同埋有智慧；鼻同嘴生得好精緻，感覺唔會係大癲大肺嗰啲人，小面通常係會乖巧內斂；佢身材好fit，望落應該算細粒，無乜多餘嘅脂肪；穿著應該係未來嘅流行服飾，上身係一件黑色皮tube top咁嘅嘢，類似YYM嗰啲，下身係黑色貼身長褲連埋boot咁樣，將佢優美嘅腿線，腰線，大約C cup嘅胸部，同埋鎖骨位都表露無遺…我只可以咁講，單計外表撼贏Cindy！
我：『Icarius，雖然我知我咁講身份唔係幾啱，但妳真係好靚女！』
I：『慳啲啦，你個孫已經代你呢個老而不講咗不下上千次。』
我：『點會老而不，我欣賞緊妳個好可愛嘅BB，即係…我個塞？』
I：『係呀，不過已經係十幾年前…』
我：『嗯，如果佢食奶嘅話一定更得意。』
同佢謦咗咁耐，我開始可以當佢唔係我後輩，唔係未來人，唔係大姐姐咁講嘢，其實佢都係一個女人啫。
I：『食屎啦！老而不！咁想睇BB食奶自己生啦！』
我：『講下笑啫…』
I：『唔得，收返，你千祈唔好生！萬一你同Stella生咗我真係死畀你睇！』
我：『但歷史證明咗我同Stella生完之後，妳嚟到妳而家呢一刻重係生勾勾。』
我開始心諗，既然我遲早都會同Stella生仔，我又使乜諗佢離唔離開我呢，即係佢讀完書最後會返嚟搵我㗎啦，但諷刺嘅係我係咪會避開佢嚟改變歷史，但歷史真係咁易改變？或者命中注定呢樣嘢係真嘅…
I：『最弊我而家生不如死呢…』
我：『係喎，都未問妳現況添…同埋妳個仔呢？』
I：『佢咪就係我半死不活嘅原因囉…』