我鍾意咗我親生姐姐，但係佢已經有男朋友？！: 女神候補篇（13）

店長沿住更衣間來回行走，低頭不語，我唔知佢係諗唔到要講啲咩，定還是係唔好意思開口。過咗一陣，佢遞左件女僕裝比Nana，叫佢著一著套Cos服上身，雖然唔知佢打咩如意算盤，但Nana唯有照做。

我一眼就認得出呢套衫係出自《會長是女僕大人》女主角嘅黏澤美咲…不過真心講句，美咲性格同Nana又真係有啲分別，一個傲嬌高冷，一個就高雅加大小姐類型。如果真係要完美還原都要下幾番苦工摸彷佢嘅性格。

正如我之前講Cosplay唔係淨係著返件cos服帶個假髮就成事。而係你要用自己嘅演繹方式去重現嗰個角色嘅性格、習慣、體態、神情、語調同埋行為舉止。一旦你著得嗰件衫，你就要負上責任去理解佢，成為佢，超越佢。我相信大部份人都係因為鍾意一個角色所以先想靠自己去完成喺現實世界去創造屬於自己嘅「某位」自己。

我重申一次，Cosplay唔係單純模彷，而係你要用心去感受你所理解嘅「佢」去令自己成為佢。連靈魂同埋事實都要同時同化喺自己身上。正正係咁，呢個圈子先會有所謂嘅偽廚同真fans。

大概十分鐘後，Nana喺更衣間出返嚟…





由於本身係model，佢好清楚點樣去襯搭嚟突顯身形上最美一面，仲有以特有角度去最大幅度減少臉上瑕疵。不過…

店長話：「的確好靚，你係我見過最靚嘅女仔。不過係最唔合格嘅coser…」

就連唔係專業嘅我都明白店長頭先一番說話係咩意思。Nana作為model絕對係一流，知道評核同觀眾鍾意啲咩，會為佢地展現作為時裝表演嘅精粹。平時只要有留意開街邊雜誌都一定會見到Nana身影，每個pose，每寸動作都係經過深思熟慮，精密計算去做出接近完美嘅姿勢。但佢忘記咗一樣嘢…「宜家唔係要表現自己，而係畫出角色嘅色彩。」

佢繼續講：「一個角色嘅設定係有佢嘅依據，點解原作者要塑造佢嘅性格係有佢嘅意思。從商業角度出發，宜家好多角色可能都係大波大pat。不過唔係個個角色都係咁，單單係你宜家身上嘅美咲已經係位出色嘅女性，但係你無視左佢嘅紋路、象徵。你唔覺得好似奪去咗佢團火？拎咗佢條命？」

Nana無從反駁…





店長遲疑咗陣又拎起另一套衫，指住中間嘅䘗章講：「呢件suit我諗你應該知係邊套作品掛？」

我同Nana互相望咗大家一眼，異口同聲咁答：「銀魂嘅月詠！」

「Bingo！月詠之所以人氣高係咪因為佢靚？我唔可以否定呢一點，不過淨係憑外表嘅雕刻唔能夠維持長期嘅鮮麗。一定係靠內在去推動佢嘅美。」店長一路講一路打理住月詠嘅假髮，邊掃返直叉起咗嘅部份。

「如果你見到月詠有疤痕，你會唔會用濃妝遮咗佢墶疤？」

自尊心一向高嘅Nana開始有幾滴眼淚湧下湧下咁，不過feel到佢強忍住。我原本想行過去安慰佢，但見到佢好有決心咁聽緊店長批評，身為旁觀嘅我又有咩資格打擊佢。






「你…唔合格，喺你未真正了解自己嘅cos之前，我都唔會比你行入呢度。」

雖然佢好有禮貌咁請我地出去，但無疑係對Nana最無情嘅天罰。