我鍾意咗我親生姐姐，但係佢已經有男朋友？！: Molly的約會（7）

Molly：「嘢就食完啦，不如我哋宜家去…」

就喺我同Molly討論緊去邊度嘅時候，旁邊有個女人撞咗過嚟，用一把好刺耳但自以為鬆容嘅高音向Molly搭話。

「啊～唔好意思！你咪Molly? 好耐冇見喎，冇見一排，個樣同以前一樣柒呀。」

個女人語氣雖然差，但係無可否認樣絕對係極上品，打個比喻：如果小倩係A+級，家姐就係S級，但係呢個女仔係凌駕之上嘅S+級。而可以婫美佢嘅就只有在場嘅Molly。我冇誇大言詞，更加唔會拎家姐個樣嚟講笑。雖然我識得嘅女仔入面個個都有樣有身材，但今日我終於明白人外有人天外有天呢個道理。映入我眼中嘅並唔係女人咁簡單，而係某種披住「神」之名嘅外來之物。

但係Molly並冇退讓，反而係更自信咁企硬。符合佢嘅性格，絲毫不屈，我喺佢身上見到黃金一樣嘅不滅意志。





Molly:「你盲㗎？不過唔怪你嘅…平時狗眼看人低，出街又點會睇路呀？你冇仆死真係好啊，費事死咗個陣嚇親細路仔。」

Molly講呢番說話嘅時候面上沒有任何一絲不滿而係滿臉慈祥，好似一個活彿咁。平時潑婦罵街見得多，但係兩個神級女神喺條街度罵戰真係第一次見，我相信亦都係最後一次。另外，由於佢哋實在太耀眼，佢哋外面好似有層薄膜聖光圍繞住，強調我哋呢啲凡人冇資格行入去。

女：「仲係咁口末遮欄，唔怪之得仲係冇男朋友啦～啊，你唔會眼光差到揀後面嗰隻垃圾蟲呀？原來盲撚係你先啱.. 呵！」

佢哋我一言你一語都唔係辦法，Molly竟然會怒羞成怒到咁，仲癲過上次個二世祖。我都好好奇對方究竟係乜來頭，但當務之急係要拉走佢先。我無視個女人嘅高語，快快手拉走左Molly。

去到遠處一個公園我地搵到個位，Molly總算可以講清來龍去脈。





Molly:「頭先個女仔叫Nana，係我中學嘅死對頭，因為佢男神暗戀過我一直懷恨在心。估唔到憎到我宜家..くそ！」

女人嘅恩怨，我再一次體會到係不可觸碰嘅逆鱗。更加估唔到Molly會嬲到爆粗，雖側係日文。

Molly繼續講：「曾經有段時間我同佢都有幫日藉公司做過Model，我哋一直維持競爭對手嘅關係。直到三年前因為某啲原因我先冇做，不過嗰段期間我哋喺日本宅圈叫紅過下…外界曾封包含我哋兩個在內嘅四位女仔為天界四神。」

聽到Molly話日藉Model，我即刻醒起家姐都係model，我可以斷言佢作為「女性」絕對係超班。如果佢同果個Nana見面嘅話，一山不能藏二虎，我肯定個situation會更加慘烈。論樣一流，性格九流正好形容呢個情況。

Molly:「我決定咗！我唔想比佢睇死，我想嬴佢！！嚟緊個月有個最佳情侶比賽，佢一定會叫埋佢條仔一齊出賽，作為傳說之一嘅佢咁鍾意做風頭躉，打死都唔會錯過呢個機會。所以阿唏。嘿嘿！！又要麻煩你做我男朋友仔啦。」





再同Molly有咁親密嘅接觸我真係會背叛對家姐嘅心意，但係，就算係咁，呢一刻，我仍然係你嘅男朋友。所以…

我：「知道啦～知道啦～四神嘅大小姐！我一定唔會令你失望。」

Molly:「一言為定！」

去到呢度，我開始諗如果Molly作為Model復出，同佢會唔會越走越遠。我心入面有種感覺，呢種洪溝比同家姐之前嘅距離更加大。就算家姐離開香港，我同佢之間仍然仲有名為「姐弟」嘅牽絆。但係換作Molly我同佢又會變返陌生人。