我鍾意咗我親生姐姐，但係佢已經有男朋友？！: 情敵（一）

「家姐？」

「阿...唏？」

呢種偶然嘅概率究竟要幾好彩先會喺呢種情況見到家姐拖住佢男朋友，仲要俾佢見到我同另一個女仔出街？我真係唔知...


「哦～呢個就係搞到你近排神不守舍嘅女仔呀？」

家姐一臉平靜咁jer 住我，分明係針對緊我。





「唔...」

我又唔可以喺呢個時候縮沙，講到明今日要陪足小倩一日，如果否認就會令我誠信破產。

「唏仔！呢個女人係邊個嚟？」

小倩痴到我勁埋，好似要向家姐宣示主權咁，搞到我宜家淨係想快啲離開呢個是非之地。

「呵...我都唔想阻住我嘅「好」細佬拍拖..」




「阿Paul, 我哋快啲走啦....」

說時遲 那時快，家姐已經拖住佢男朋友，阿Paul走咗。

我第一次見到家姐塊面黑到咁，仲黑過包青天。我知道我返到屋企之後，一定會有一場暴風雨降臨。

不過呢個男人，阿Paul，我始終都認為佢唔係好人。

至於原因就係幾個星期之前，我同家姐關係開始轉好之前，我落街見到佢拖住另一個女仔，仲要攬頭攬頸，勁sweet, 並非佢講嘅「表兄妹」關係。





我唔知點解佢有「女人」之餘仲要接近我家姐，但唯一可以肯定嘅係我一定要儘快搶返家姐返黎。

「喂！快啲行喇，我好肚餓啊，肚仔已經咕咕叫！」

小倩拉住我入咗附近一間餐廳....

但係我根本冇辦法專心，因為我個腦全部都係嗰個阿Paul嘅事。

「係呢，話說頭先個女人係邊個嚟？我都唔知你有個咁靚嘅friend...」

小倩皺一皺眉，「唔通就係之前搞到你喊嗰個..？」

佢少少不滿咁指住個Menu, 令我覺得有少少內疚。或者係歸於同情？還是係補償？我真係唔想見到小倩露出同「當時」一樣嘅表情。

「佢係我家姐啫，咪之前同你提過嗰個串到爆嗰個..」





一聽到我講「家姐」，小倩就立即回復生氣，跳跳紮咁。

「不過你家姐個男朋友竟然係佢，你最好叫佢小心啲，你知啦，佢份人唔係善男信女。」

連小倩都講到呢個地步，我真係開始擔心家姐嘅安危..

「佢究竟係邊個？佢好出名架咩？」

對大學呢啲社交圈子不熟悉嘅我完全聽都冇聽過有關Paul嘅事。

「阿Paul曾經一腳踏七船，仲曾經搞到人大肚，出埋人命，你家姐咁靚，我都幾肯定佢係目標之一。」小倩一臉擔憂咁講..

「唔係掛....」





我開始對自己嘅魅力有所保留，有冇能力r返家姐返嚟都成問題...