我鍾意咗我親生姐姐，但係佢已經有男朋友？！: 出租女友？（下）

到達灣仔嘅時候，Molly不斷重複道歉：「唔好意思呀！頭先激動得滯，仲喺你面前喊到咁，失禮死人啦。」佢塊面越講越紅，紅到就變馬騮屎忽。「你當頭先乜事都冇啦！」Molly隻眼仲有少少紅腫，另一隻手撳住自己個額頭，試圖掩飾自己嘅尷尬。佢上氣唔接下氣咁，情緒仲未平復得切。

「呢啲嘢難免係會傷心嘅，應該係我唔好意思先真，唔知頭唔知路就問你....好對唔住。」對於自己嘅唔成熟，我深感歉意。

Molly將個頭伏喺我身上，雙手捉實我隻手，溫柔咁講「梗係唔關你事啦，你表現好好，只係我唔好彩啫！而且...今日你仲係我男朋友，唔好再理以前啲嘢啦，傻仔。」講完之後就拖住我「好啦，我哋去搭電車啦，反正我都冇乜搭過，要你帶路架！」佢唔單止冇怪我，仲調返轉氹番我轉頭，我作為一個男仔，深深了解到如果我真係佢男朋友，我一定唔合格。小倩、家姐仲有Molly, 我無一次可以比倒佢地好好嘅回憶，次次都衰收尾，當完成到小小成績之後，好快又有另一棟高牆出現阻止我去完成每一件事。如果唔係我，可能佢哋三個都會有更好嘅待遇。

我同Molly去到灣仔站，今次就冇乜人，排咗一陣間就上得電車。電車嘅「叮叮」聲令Molly大開眼界，第一次親身體驗到復古式交通工具令佢回味無窮，以前嘅交通工具普遍都冇冷氣，而且個位又窄又冇扶手柄，要好小心行先可以保障到安全。同巴士唔同，電車連叉電孔都冇，係完完全全嘅舊世代產物，後生仔未搭過真係唔出奇。除咗比較少見之外真係無特色，不過無特色可能就係佢嘅特色。尤其行駛速度好慢，可以明顯感受到搖下搖下咁郁，一般人唔會無程程走去搭。正因為咁，坐電車嘅人可以享受到一躺靜靜又懷舊嘅旅程，可謂因禍得福。

「嘩！好正呀！好耐未試過搭車搭到咁爽，啲風迎面吹過嚟，涼浸浸，好舒服。」Molly捉住欄杆伸左半個身出去，雖然好危險但我冇阻止佢，因為我第一次搭電車同佢都係同一樣心情，所以唔想將電車嘅樂趣剝削。天真爛漫嘅笑容令我好難想像佢啱啱先大喊咗一次。我心諗「如果佢可以一直係咁就好」，我見倒佢充滿童真嘅行為打從心底祝福佢，「希望你可以一直都咁開心。」





Molly突然之間坐底，甜絲絲咁同我講「你話如果你係我男朋友究竟會好定唔好呢？」佢塊面貼到我好近，我不自覺咁吞左啖口水，「我估應該會幾開心呱～講下笑。」之後就繼續攬住我隻手。我哋坐左幾個站，去到太古站就落咗車。我仍然想享受呢段虛假又真實嘅關係，唔想放開手，所以就維持呢個姿勢行去商場。途中我哋有講有笑，佢又窒下我，我都串返佢，一路到夜晚七點。開心嘅時間過得特別快，又係時候講拜拜，終於到尾聲，我呢個男朋友嘅身份係時候結束。

Molly行近我，小心翼翼咁gut高個身，今次到佢摸我個頭，向我道別「今日真係好開心，好耐都未試過笑得咁開心，你今日真係做得非常唔錯啊，男。朋。友！」佢合埋眼，頭微微一則，笑住同我揮手，就跑左落地鐵站。但係仍然未夠，我硬係覺得差咁少少野，好似有啲嘢未做足，呢股不安感喺我個身度游嚟游去。

「下次再同我一齊出去玩呀！Molly」

我未清楚自己做緊咩就跑咗出去，大大聲咁叫出口，其他人全部停晒手望住我，唯獨係呢個衰妹，呢個陪左我成日嘅出租女友擰轉頭向我罷出一個YEAH嘅手勢。