我鍾意咗我親生姐姐，但係佢已經有男朋友？！: 出租女友？（小倩的回憶）［特別篇］

記憶中，小倩同我出過一次街，係第一次亦都係最後一次，至少係中學生涯唯一一次。嗰陣時正值中五暑假，大概係七月中左右。之後我哋就冇再聯絡，直到上次喺街度撞返佢。

我同佢中學都唔係太熟，有一次體育堂佢唔記得帶衫，我就將自己套衫借咗比佢，反正我又唔想上。最後梗係比老師罰啦，正因為咁佢先逃過一劫而我哋兩個亦因為呢次機緣巧合開始friend。之後我同佢上堂會傳下紙仔，玩下過三關，彈下橡根咁。總之有啲咩麻煩野都一定有我哋份。班上同學開始傳我地有嘢，當然我哋極力否認啦。但其實我心入面有少少開心，因為同佢一齊嘅時間好舒服好放鬆。

或者係因為咁，我同佢之間嘅關係越嚟越曖昧，有時佢會挨住我膊頭，我又會瞓喺佢大脾度。呢種不上不下嘅相處方法係每個人一定會經歷過嘅，既刺激又溫馨。兩人之間嘅秘密關係係當時中學最有價值而且最重視嘅事。慢慢地，當兩人獨處之時，我哋都會互相叫對方個名，只係咁樣已經足夠，已經滿足，純情又潔淨嘅「愛」對於當時仍然係中學生嘅我哋係一份貴重嘅回憶。相比起社會中用金錢衡量同肉體堆砌出嚟嘅愛，呢種純愛就好似「紅寶石」一樣耀眼。

直到有一日放學，我行過班房，聽到小倩啲朋友講：「阿晞條友唔係呀？佢咁嘅款都想同小倩一齊？賴蛤蟆想食天鵝肉。」我就知道自己高攀唔起，我同佢根本唔係同一個世界嘅人，佢係眾人中嘅掌上明珠而我係一個讀唔成書嘅壞珍珠。呢一刻，我終於清醒，「夢」始終都係要黎，我下定決心，如果可以同佢出一次街，我就會放棄佢，唔會再同佢一齊，將會由密友成為陌路人。

果然，佢好快就約咗我出去，一齊去睇「美女與野獸」。途中我都冇乜睇過套戲，淨係一直望住小倩。直到完場我都仲望緊佢。臨走前，佢仲興高采烈話下次再出去，不過我冇答到佢，淨係摸咗佢個頭一下，同佢講「今日真係好開心。」然後就走咗，自此之後，我都冇再返過學亦都冇再見倒佢.....





之後嘅事就如同之前所講，同家姐關係已經差到無法補救，自己一個度過大學生活，之後再同家姐關係開始好轉，重遇小倩，識倒Molly......