我鍾意咗我親生姐姐，但係佢已經有男朋友？！: 尷尬過後的第一次

「我返嚟啦！」

聽完小倩嘅建議之後，佢嗰句「女仔係需要男人主動，同埋需要被愛」遊走於大腦之間，一直揮之不去。我拎住家姐盒豉油皇炒麵行嚟行去，思考緊究竟點先可以做到所謂嘅「主動」。一個星期前，我主動同家姐講我鍾意佢但失敗收場，小倩口中嘅主動同我所做嘅主動，兩者之間究竟有咩分別。

「你返嚟啦？」就係我徘徊之際，家姐突然之間喺我後面出現。佢望住個鐘，「都已經八點，你頭先去咗邊度？」

我又唔好講話見到中學同學傾計傾到忘我所以遲咗返，佢一定好鬼死肚餓，比佢知道分分鐘溶咗我都似。「我...」呢個情況之下，我諗唔到作咩藉口，我只可以拼命諗，諗吓有啲咩藉口係合理又唔誇張而家姐又會信。

但我真係諗唔到有咩計仔，情急之下唯有坦白，將見到同學嘅事同家姐講，仲將我同小倩嘅對話一五一十講曬出嚟。



家姐聽完之後，表情先係有少少困擾，之後又有少少苦惱，隨之而來嘅係一個略帶溫柔嘅笑容。「ummm...咩你真係咁鍾意我咩？」家姐把聲有少少震，語氣比平時嬌柔，好似一隻被馴服嘅小野貓咁。

我第一次見到家姐因為「感情」而面紅，而且紅到就出煙，好似「太陽出來了」咁。一個星期前，我因為同家姐告白搞到佢唔知點面對我，宜家我再一次同佢表白，家姐開始有少少「接受」嘅意思，我仍然唔係好明白，但隱隱約約察覺到有少少差别。同樣係「主動式表白」，但時機唔同，地點唔同，情況唔同，呢三點係好影響一個女仔對於告白嘅判斷。

嗰日家姐同Paul原先有下場，再者佢搵我出去嘅目的係基於Paul, 所以當我同佢表明心意嘅時候，歸於罪疚感，佢無法答應我嘅請求。第二，我嗰日雖然係「主動」，但態度斯斯縮縮，比唔到信心佢，所以先會搞到咁。但此時此刻唔同，今日得我同家姐兩個，無任何其他因素，加上我用對咁真誠嘅眼神望住家姐，理想上贏嘅機會大好多。好似美斯一個人衝去對家龍門咁而守龍又行開咗，只差一腳就可以踢個波入去。

「係呀！我鍾意你！」

我單刀直入，開門見山，直入主題，充滿自信咁答佢。為咗唔會冷場，我九秒九遞個炒麵比家姐，唔比佢有回答嘅機會再轉移話題，「係呢，一唔一齊食呀。我頭先睇YouTube 有大塚愛LIVE, 不如一齊睇。」既然都將目的轉達咗比佢，剩低嘅就只有家姐嘅決定。不過對於宜家嘅我，都係享受同家姐一齊嘅時間會舒服啲，所以之後嘅事之後再決定，深謀遠慮始終唔係我嘅性格。



「.....」家姐冇出聲，只係搶走咗我個炒麵再霸埋我個位。「快啲啦，唔係睇大塚愛咩？」家姐又變返以前嘅港女格，但今次似乎又有少少改變，而且係好嘅改變。

「okok, 宜家黎！」雖然我冇特別表現出嚟，但我內心一早已經雀躍不已。