我鍾意咗我親生姐姐，但係佢已經有男朋友？！: 巧遇？

自從同家姐出街之後已經過咗一個禮拜，我同佢之間又變返以前咁，毫無交集，剩低嘅只有偶爾叫我幫佢按下隻腳。嗰日佢連飯都冇同Paul食，果然同佢講咗啲咁嘅嘢令佢不知所措。

「喂，...幫我捽下隻腳。....」

不過佢對我嘅態度好似有少少微妙，又唔係話差，冇呼呼喝喝，但硬係奇奇怪怪咁，我寧願佢直接屌柒我或者唔理我。似是而非嘅態度令我完全捉摸唔倒。

「哦...」

只有短短一句就將話題結束咗，我連一啲幻想都想像唔到，淨係想快啲返房，化解呢個無言嘅局面。





老豆老母去咗旅行，呢個星期都係得我同家姐兩個喺屋企，本身已經夠尷，加埋上星期單嘢，真係想搵窿捐。我偷偷地用眼尾稍下家姐，佢合埋咗眼。

「umm...今晚你想食咩？」我是但問佢啲嘢試吓水溫，換來嘅係一片死寂。

大概過咗一分鐘，家姐突然開口「你鍾意啦...」。

快快口講完佢就令轉面，完全唔想望我。我心知不妙，都知瀨曬撻架喇，冇再出聲。

「我去買牛河同意粉。」





既然佢唔想見到我，我就出去買嘢食，順便散下心，如果唔係我亂鳩咁嚟應該已經可以同佢改善下啲關係，可能宜家已經同佢玩緊switch，一齊玩動物森友會，大家種緊菜，種埋上床。

本來仲打算如果關係好咗，約佢去睇戲，宜家冇啦，一切都如同泡沫，化為泡影，計劃幻滅。夢入面，我同家姐一齊去街街，我餵佢食嘢，佢餵我飲嘢，一齊去卡拉OK唱歌，陳奕迅呀，張國榮呀，西野加奈，中島愛，乜柒都唱下。可惜事與願違，連個天都唔幫我。

一路諗就越唔甘心，唯一嘅希望就因為衝動化為碎片。咁大個仔都未試過咁，比打機輸咗仲sad, 或者呢啲就係「初戀」啦，雖然只係我嘅「單方面暗戀」。我個腦全部都係家姐嗰日嘅傻笑，古惑樣同埋嬲豬樣。

我醒起林志美首初戀嘅歌詞，「愛戀沒經驗，今天初發現，遙遙共他見一面，那份快樂太新鮮。」原來鍾意一個人可以係咁痛苦，咁悲傷。甜酸苦辣全部包含曬喺呢份感覺入面，即使我未試過拍拖，都深深明白到「鍾意」一個人係會有幾大嘅壓力同負擔。佢笑我會開心，佢喊我會痛心，我會因為佢而囉囉攣，亦都會因為佢而神魂顛倒，佢笑一下已經足以令我開心成日。但宜家，我個心得到嘅只有悲哀，絲毫沒有一點嘅快樂。

眼淚開始喺眼角流出，雖然佢冇拒絕我或者有明確回應。但佢嘅愛理不理，令我嘅內心世界完全崩壞，此刻猶如心如刀割一樣。





「先生..你有冇事？先生？先生？」

哭喊途中，我feel倒有人拍我膊頭。

「你冇事呀嘛，我有紙巾，你抹一抹啲眼淚先啦。你有啲咩事不妨講出嚟，我可以聽架。」

呢一句說話令我知道人間有愛，三唔識七都會有人遞紙比我仲要聽我講心事。

「唔該晒你呀，不過...」

「咦？」

「？！」

「你咪葉小倩？」





眼前出現嘅係中學時期一個女同學，而佢係曾經暗戀過我嘅？