[純愛］［校園］［一個月的愛情詛咒］: 2.初遇

第一次叫做真正望佢係喺校隊選拔入面。

由於我由細細個就打開羽毛球，小學又有打，咁上到中學冇理由唔打㗎！

但係又驚落選嗰下好樣衰，就唔夠膽去，但係諗咗一排之後，都係膽粗粗咁樣去咗。

不過諗返起，如果冇去嘅話，我同佢就應該冇咗個開始，亦唔會有之後嘅事，故事就完左，結局，拜拜！


講笑啫，去選拔點解咁重要？





咪就係因為佢都想入隊囉！

但係男仔同女仔要分開選拔，所以我同佢都冇講過野，不過我好記得有一刻我望過去佢嗰度，佢咁岩都望住我。你眼望我眼，未試過之前覺得冇咩野，試咗之後就覺得勁尷尬，你又同唔到佢講嘢，又唔知要比咩表情好。

最後都係佢笑咗一笑，就去搵返佢班friend。唔係講笑，佢笑嗰下雖然未令我去到一下就沉船咁勁，起碼俾咗個幾好嘅印象我。


選拔嘅過程都冇咩野好講，其實都幾悶下，都係差下波，開下game 玩下。之後啲師兄話俾我聽，原來只要有去，填咗份表格，基本上就入到。





早知之前就唔使咁驚啦！

咁選完拔之後梗係返屋企㗎啦，但係嗰日又想買少少嘢食先，咁就自己一個行咗去士多。

又咁啱得咁橋，佢好似又去我去緊嗰間士多，咁為咗唔好俾佢唔會我係跟蹤狂，咁我咪行快啲囉！冇辦法，毒L係咁㗎啦。

去到俾錢嗰陣，佢企我後面，我準備俾錢嘅時候，突然feel到有嘢掂我個膊頭，一轉頭就見到佢望住我

「你係咪xxx呀（我個名），咁啱嘅，唔好意思呀，可唔可以借10蚊嚟呀，我...唔夠....」





「好呀。」真係咁咩，見面第一句就問我借錢，咁我又冇咩所謂嘅，咪借囉，$10又唔係好多。

俾咗佢之後，咁我就走咗，行咗一陣就返到屋企，我要放低個書包即刻瞓喺張床上面。

瞓落床嗰刻，第一刻我竟然唔係飲緊佢啲嘢，係究竟佢會唔會還錢。雖然我對玩唔玩錢方面又唔會太介懷，但都諗咗一陣。


一個女仔同一個啱啱識嘅陌生人借錢，會唔會還呢？唔還好似好冇道德咁....唉...算，都係瞓陣先。

「起身啦，都叫你琴晚早啲瞓覺啦，一定掛住打機啦！再唔起身嘅話就唔留餸俾你。」

講得呢句野嘅，仲可以係邊個，梗係我阿媽啦！

起咗身，食完飯沖完涼，做咗一陣功課，諗住瞓覺嗰陣，有個WhatsApp send咗過嚟。仲以為係邊個，原來係呀羊羊





「喂，你平時有冇玩傳說？」


「有啊，做咩？」

「開舖？Carry你」

「你唔好搞到我10連跪就得」

「睇吓邊個累邊個！」

咁打咗一陣機，有啲眼瞓就上咗床瞓覺，第二朝就神今早起身食早餐返學，又係呢啲千篇一律嘅生活。