是咁的,我同女神做咗鄰居: 181.
「休息下啦,希望你快啲好。」我摸一摸她的頭說。
「嗯...」
說罷我便離開啊童的房間,準備回到自己家。
「走啦?」婆婆問。
「係呀,啊童瞓緊覺我費事阻住佢休息吖嘛。」
「哦,唔該哂你照顧啊童喎。」
「應該嘅應該嘅,咁我走先啦婆婆。」我說。
「好吖,Bye Bye啦。」
「Bye bye。」我打開大門,回去隔壁家中。
你問我返到過去有咩做?
「啊正!打唔打機呀?我擺脫咗啊童嘅控制啦,終於有一日我可以打機啦!!!」我在Discord問啊正。
「嘩咁大件事冇人講嘅?你地分咗手呀?」同在Discord的Marcus問。
「屌你,佢病咗而家瞓緊覺呀on9,唔得閒再迫我溫書,快啦,係咪打㗎?」
「打打打,緊係打啦,好耐冇同你打過機啦,成日都重色輕友,唔理我地。」啊正說。
「你估我想㗎咩,佢一嚟到我屋企就霸住我個位,然後再收走我部電話。點打機啫?一陣講多兩句佢又嬲我就唔好啦。」我說。
「你覺得佢咁煩咁你不如分手啦,分咗手佢唔理你你咪可以日日同我地打機囉。」
「咁又唔得喎,我係鍾意比佢管呀~你吹咩?」
「你真係麻L煩,快啲打返鋪先啦。」啊正說。
嗚呀...好耐冇試過晏晝打機啦,好開心呀!!!
吃過晚飯後,我便循例打給啊童關心一下她的狀況。
「喂?」
「點呀你?」我問。
「都係咁啦...食咗藥好攰呀,啱啱食完飯,而家喺梳發坐一陣就返房瞓覺啦。」單憑聲音就已經能感受到啊童有多疲累。
「咁呀好啦,唔阻你休息啦我,你坐一陣消化完就返去瞓啦。」我對啊童說。
「打機就打機啦你,扮哂嘢話咩唔阻我休息。」
「你點可以咁睇我㗎,我似係啲只顧打機唔理女朋友嘅人咩?」
「似呀,你根本就係。」
「吖你真係,發燒都仲咁串,我絕對唔係想去打機所以先打算收你線,我係真心想你休息㗎。」
無錯我係講緊大話,我真係好想去打機。
「你呃我唔到㗎,你根本就係寧願打機都唔理我!」
「痴線唔好亂諗嘢啦你,我真係唔係打緊機。」
「你而家緊係唔係打緊機啦,你收咗我線之後先打吖嘛。」
「我保證我收咗線之後都唔打機,咁得未?」
反正佢都唔會知我係咪打緊機,正所謂承諾係用嚟打破㗎嘛。
「Big Brother is watching you。」
「big乜7brother吖,得啦,我一陣諗住睇書,唔好再講落去啦,阻住你休息就唔好啦。」
「你小心啲呀我話你知,拜拜。」啊童Cut了線。
跪求大家Follow我既IG: MaanYin05