是咁的，我同女神做咗鄰居: 165.

「做咩呀？」我問。 

「我Daddy話俾利是你呀，你過嚟吖。」 

「哦。」我於是又折返過去啊童家。 

「嗱啊言，呢度係利是，祝你學業進步啊吓。」周叔叔把利是遞給我。 

「多謝周叔叔，祝你身體健康，出入平安。」我接過利是。 





「唔，多謝你係學校到幫我睇住個女。」 

「我先唔駛佢睇住啊！」啊童立即反駁。

 「點都好啦，希望你地兩個可以繼續一齊行落去，互相睇住對方啦。好啦，都唔早啦，你返過去啦。」周叔叔說。

 「Bye Bye 周叔叔。」

 「Bye Bye。」他回應。





 之後既日子都冇咩特別，返學溫書無限Loop， 

每一日都係咁過，星期五就打下波，然後星期六就由啊童同我練波。

 偶然出去拍下拖啊，放學去吓海旁到睇日落啊，

明明呢啲野好似普普通通，冇乜特別咁， 

但係一有啊童既陪伴成件事就唔同晒，

同佢駁下嘴，比佢打下，嘻嘻哈哈又一日。 

都幾開心吖。 時間跳到三月廿七，

啫係我學界決賽個一日。

 打你個肺我起身既時間仲要早過平日返學既起身時間。 

不過都冇辦法啦，要比賽吖嘛，

八點前要去到... 

啊童緊係會跟住我去啦，

話曬佢都係我半個教練吖嘛。 





與啊童會合後，我們便一起出發前往比賽場地，

彩虹道體育館。 

我們坐上地鐵，啊童急不及待立即找位置坐下睡覺，

這行為好像已成了她出門的指定動作， 

「你琴晚好夜瞓咩？點解你好似成日都咁攰咁既？明明你返學既時候都唔係咁㗎？」我終於忍不住問。

 「返學要早起吖嘛，咁咪早瞓囉，難得今日星期六放假，所以琴晚咪夜啲瞓囉。」啊童連眼睛也懶得張開。

 「放假啫，但係你都要去打學界㗎嘛。」 





「錯！係陪~你去打學界，唔係我去打，我係出於好心咋！我明明今日應該可以瞓到好~晏㗎嘛。」

 「唓，咁之前啲星期六點解你又可以咁精神咁同我練波？」 

「咁個時知道第二日要做運動咁咪早啲瞓囉，今日我齋睇咋嘛，所以琴晚咪煲劇煲到成點幾囉。唉呀你唔好阻住我瞓覺啦。」啊童說罷便真的閉上了嘴巴不再出聲。

 不出一小時，我們便抵達了那體育館，

沿著樓梯走上去。 

「嘩嘩嘩！好過份喎啊言，公然拖住女朋友嚟放閃。」不知從那裏冒出來的毛毛說。

 「咦，你又係度既？」 

「乜野意思啊你？我唔係正選啫，但係我話晒都係後備嚟㗎嘛，緊係要嚟啦。唔止我啊，隊長佢地都係後面啊，望到晒你呢個咁過份既行為...嗚...隻眼盲咗。」





 我向後一望，果真見到全隊男A隊員連教練都在後面看著我，

我嚇得立即鬆開原本牽著啊童的手。 

「我去廁所先。」啊童連忙離開現場。

 好過份...

啊童竟然拋低我一個面對呢班人。




跪求大家Follow我既IG: MaanYin05