《我的MK妹同桌》第二季: 242

返到香港，個人特別沉重。
 
我同佢嘅合照，同埋幫佢影嘅相，已經無咗，我淨係帶咗一啲英國街景嘅相返嚟。
 
到步後，我同呀詩講咗聲，我返到啦。
 
佢一如既往，好快就online，輸入中⋯⋯
 
呀詩：好，返到去好好生活啦
 




然後，就無然後呢一回事。
 
好想覆佢，但一拎上手，就覺得無再覆嘅必要。
 
如果今日我係純粹鍾意，我唔會諗，我會直接覆，因為我想表達自己嘅喜歡，唔需要其他人嘅認同，比起認同，我更想佢感受到我對佢嘅鍾意。
 
但依家，我想為佢好。
 
既然選擇咗呢一個結局，就應該有佢結局嘅方式。
 




不打擾，對我哋嚟講，都容易放低吧？
 
即使⋯⋯我仲成日都心思思想搵返佢⋯⋯
 
想問下佢，係嗰邊點啊？
 
想見到佢⋯⋯
 
想知佢有無人關心佢⋯⋯
 




想知佢係咪都同我一樣，會諗起對方呢？
 
但係我忍咗落嚟。
 
辛苦地忍咗落嚟。
 
如果經歷過第一次分手，係撕心裂肺嘅痛；咁之後嘅分手，就係綿密嘅痛。
 
返咗嚟幾日，好唔習慣無咗佢，同時間又知自己會捱到過去。
 
我無出過街，手機少咗好幾個call，看似熟悉，但又可以完全唔適應。
 
屋企人問我去英國去成點，我唔識應，選擇講大話呃屋企人。
 
「幾好玩啊，啲景真係靚，但係啲嘢食好貴。」




 
「咁呀詩呢？」都預咗你㗎啦，老媽。
 
「佢幾好啊，過得幾開心。」為咗令大話講得逼真，要眼都唔眨，有一絲猶疑都會俾人懷疑。
 
深夜，因為時差瞓唔著嘅時候，全部都用嚟諗起佢。