《我的MK妹同桌》第二季: 241

我就係飛機度望住呢堆回憶，去到後期，我已經喊唔出，個旅程去到中後段，都係啲傷心回憶，我想喊，但喊唔出，我都唔知自己係度做緊啲乜，就搞成咁。
 
最後喊到啦，一喊就喊到好勁⋯⋯成隻手都濕曬，全部都係我抹落嚟嘅眼淚。
 
喊完一次之後，就喊唔出，睇下啲相，啲相真係用嚟勾起啲回憶㗎仆街。
 
每一個細節位都仲記得，連呀詩嘅觸感，都仲縈繞係心頭，亦清楚呢種熟悉嘅感覺最後都會散去，不過此刻，呢樣係我痛苦嘅來源。
 
我好鍾意坐係窗邊位。
 




我望完啲相，勾起啲回憶，然後就望住窗外，沉醉係回憶嘅世界入面，真係美好，唔捨得出返嚟。
 
就咁呆呆咁望住出面，再睇下一張，好記得張相係幾時，係邊度影。
 
今次分手，我哋真係徹底玩完，不過唔知嘅係，無咗呀詩，呢個新開始係咪好事呢？
 
一路以嚟，人生最開心同無憂無慮嘅兩個階段，都有呀詩嘅陪伴，依家我真係唔習慣，亦唔知點好，唔知自己面唔面對到。
 
到臨落機，提示我哋差唔多返到香港啦。
 




我亦都做咗一個決定。
 
係我決定開呢啲相嚟睇，嚟回味嗰陣，就同咗自己講。
 
『睇完就好del啦⋯⋯』
 
我由頭再碌落嚟，一張張㩒開佢，一張張del。
 
每一張，都係我親手del。
 




我都知咁樣好快，捨得㗎啦？
 
唔捨得㗎，但我都想之後嘅路可以好好地行落去，唔好因為時不時嘅留念，而選擇行行停停。
 
決定好，就好去做。
 
落手嗰陣好爭扎，但越del越快，因為已經無後路，第一、二張最有紀念價值嘅相都無咗，唔會再搵得返，就索性就咁講bye bye。