《我的MK妹同桌》第二季: 219

我真係唔知，依家我個腦得一個諗法，就係享受咗當下先，可能我哋會搵得返愛嘅感覺，可能我哋最後都會唔捨得大家呢？
 
我就係抱住呢種諗法，打算咁樣渡過呢次旅行。
 
其實我煮嘢食唔係好叻，叻嘅係我老母，我都諗住陣間睇下youtube學下點煮，照板煮碗。
 
點知一返到嚟，呀詩應該係聽到鎖鑰聲，因為我一開門，佢就企係門口，迎接住我。
 
呢個⋯⋯呢一幕⋯⋯就係我期待咗好耐，亦係將來好想見到嘅畫面。
 




「做咩事出嚟啊？你唔係要趕功課咩？」我藏唔住個笑容。
 
係佢面前，由中學開始就係咁，收唔埋自己，坦然咁將自己所有嘅模樣都展露曬出嚟，係想收都收唔埋。
 
所以頭先我係下意識咁講出嚟，但係原來咁樣嘅狀態，可以將自己投入係另一個人度，係得呀詩先做到。
 
將來⋯⋯就算有另一半都好，都可能再做唔到好似依家咁，傾盡所有。
 
我知，咁樣係對將來嘅佢唔公平，所以我唔會咁快再拍拖，甚至做好將來一世單身嘅準備。
 




「想等你返嚟啊嘛。」呀詩講完，就一嘢抱上嚟。
 
好似隻樹熊咁，攬住我。
 
而我兩隻手都拎住嘢，根本都無手抱返佢。
 
「喂喂喂⋯⋯我兩隻手拎緊嘢㗎，好易跌㗎。」我盡力平衡自己身體。
 
呢排呀詩嘅情緒時好時壞，係夜晚我有時都見到佢自己偷偷地食藥⋯⋯我留意到嘅時候其實好心痛。
 




只要佢開心，我都一定會遷就，就算係要我離開都好。