《我的MK妹同桌》第二季: 217

同一個空間裡面，各自忙碌。
 
可能呢啲係大個咗嘅寫照？同自己想要嘅將來有出入，我會想我哋兩個人再忙碌都好，我哋嘅關係都可以好溫馨，再忙都抽時間出嚟，照顧一陣對方。
 
唔洗好耐，短暫回過氣，令自己有返向前行嘅動力，咁就可以。
 
其實係件好簡單嘅嘢，並唔係要自己將來有車有樓，只係想要咁樣嘅生活模式。
 
可能係我諗得太過美好，過於理想化，簡單嚟講姐係FF。
 




因為呢一次經歷，我都諗深咗一層自己想要啲咩將來，原來自己對未來係有藍圖。
 
只不過我更趨向接受呢個無奈嘅現實，無力去改變啲咩嘢，任由呢種想法、追求一路係腦海裡面遊遊蕩蕩。
 
陣唔時，我會走過去問下：「點啊，做成點啊？」
 
就算之前傾好咗，我都唔係幾忍受得到咁死寂嘅空間。
 
「都仲有好多啊⋯⋯」呀詩悔氣咁講。
 




從語氣聽得出佢嘅唔開心、怨氣、想發脾氣。我好似問錯嘢，踩錯咗地雷咁。
 
我無出聲，只係掃掃佢背脊，摸一摸佢個頭，就走返去hea。
 
然後中間除咗基本生理需要，食嘢啊沖涼嗰啲有交談之後，就無啦。
 
第二日，我無出去，我照原定計劃係度9hea一日，不外乎都係睇下片打下機，呀詩瞓到好晏先醒，佢醒咗之後係床度碌咗陣手機。
 
我煮好嘢俾佢，今日煮咗個公仔麵俾佢，食完佢就又做功課。
 




中間我都好怕問題嘢，又牽動佢嘅情緒，戰戰兢兢嘅環境搞到我唔係幾敢講嘢。
 
一日好快過去，去到今日，我嚟英國嘅時間已經去咗一小半。
 
我都思考緊接住落嚟點樣運用呢幾日好呢？
 
上網搵下資料，睇下邊度買嘢方便，期間好想呀詩可以跟埋嚟一齊join。不過正如前面所講，不如意嘅事實在太多，無都無辦法，唯有面對現實。
 
「你今日唔出去咩？」呀詩好專心咁做功課，做做下突然問我。