《我的MK妹同桌》第二季: 140

之後呀詩真係多咗搵我，msg係覆得密咗，但係我哋個話題始終越嚟越少，好多時都係生活上面嘅分享。
 
二十歲至三十歲呢段時間好快就過，因為生活上實在太充實，每日都會有唔同嘅事煩住你。
 
當你清閒啲嘅時間，你已經攰到淨係想癱係張床，咩都唔想做。
 
然後過咗中間嘅考試，辛辛苦苦捱完，正享受完第一日嘅假期，手機就震起上嚟，係Gigi打嚟。
 
我同佢變得越嚟越fd，啱啱識嗰段時間有啲尷尷尬尬咁，到後尾熟絡之後，就咩都夠膽講。
 




「嗚嗚⋯⋯嗚⋯嗚⋯嗚嗚嗚嗚⋯」我一接起電話，電話入面就係抽泣聲，加一時斷斷續續嘅收鼻涕聲。
 
「咩事啊？」我問完之後，都係得唔到回應，所以等佢發洩完啲情緒先囉。
 
Gigi係呢通電話入面不停喊，老實講，我係有啲嚇親，到底咩事可以令佢打俾我，然後要不停咁係度喊。
 
過多陣，佢開始喊到攰嘅時候，放慢曬個節奏。
 
「做咩啊？」我小心翼翼咁問。
 




「我⋯我⋯⋯男⋯朋友，佢係出面有第二個⋯⋯」呢個係我頭先佢喊嗰陣，估嘅其中一個可能性。我有諗佢係咪考得唔好，或者係屋企有啲咩事。
 
「我真係好辛苦⋯⋯讀書已經夠辛苦，屋企人又成日唔俾我呢樣唔俾我嗰樣，連我男朋友都要咁對我。」Gigi一輪嘴咁樣咆哮，我估佢真係壓抑咗好耐，唔知可以同邊個講先打俾我。
 
「仲要話我唔識服待佢⋯⋯仲嫌我唔俾佢掂。」中學畢業之後，忽然覺得個世界大咗好多，好多千奇百怪，你想像唔到嘅事會發生喺你身邊。
 
同埋我估唔到佢會分享到咁深入。
 
「下？姐係佢想搞你？但你拒絕咗，咁樣？」我疑惑地問。
 




「嗯嗯。」Gigi用佢嘅哭腔無力地發聲。
 
「我覺得就算你唔俾，佢都可以尊重你，用好啲嘅語氣講姐。」我唔知點安慰人，我覺得我講嗰啲嘢都廢廢地，但我真係唔知講咩好。
 
而且我哋都大個，呢啲嘢唔需要好似小朋友，有嗰種封建嘅思想，如果呢個係一個問題嘅話，都係需要拎出嚟傾同埋解決佢㗎。
 
都幾慶幸我同呀詩無呢方面嘅問題。