《我的MK妹同桌》第二季: 136

嗰晚之後，生活嘅所有嘢都返返去水平線，照常返下part time，忙功課，就連打機嘅時間都無以前咁多，而呢一年，係最忙最chur嘅一年。
 
因為關乎之後升唔升得返上U，好多人都搏曬命溫書，Gigi都係，我見佢成日都會拉住佢男朋友去溫書。
 
子晴都入咗U，開展佢嘅新生活，ig用嘅次數都多咗，但佢嘅相入面，少咗蕃薯仔咁。
 
我有whatsapp過佢，問佢最後同蕃薯仔點。
 
子晴：無咩點啊，我最後都無講到。
 




我：點解嘅？
 
子晴：因為佢係我最無助嗰陣一路陪住我，如果我啱啱捱過咗，入到U，然後就講分手，我覺得自己咁樣好仆街⋯⋯
 
子晴：我會好內疚。
 
我睇到呢到，我藍剔咗，我唔知點覆子晴呢段說話，覺得好無奈，亦感受唔到有愛情係入面，我係有啲接受唔到。
 
覺得咁樣只係拖落去，繼續一齊，只係因為唔想嗰種內疚感纏身。
 




呢一刻，我係度諗，呀詩會唔會都係咁？
 
我無去問呀詩，我哋嘅生活一切如常，我亦都尊重子晴嘅選擇，佢有佢自己嘅考量，決定點樣，都係佢哋兩個嘅事。
 
依家唔會再好似以前咁，做埋啲雞仔媒人，嗰個年紀，撮合一對情侶係件好開心嘅事，依家關心人哋嘅感情，係一件好攰嘅事。
 
人哋都有人哋嘅難關，係需要佢哋自己去克服。
 
我同呀詩一唔見，就好似將大家嘅生活分割咗咁，佢會忙佢大學嘅嘢，佢都無去玩，但搵我嘅次數，手指加腳指就數得曬。
 




出到嚟拍拖，又無乜嘢，佢會不停講，而且好似糖痴豆咁，可以滿足我嘅，都會滿足我。
 
上高登睇感情台，上面啲人成日話條女唔理你，實係搵其他男仔啦，小心啲戴帽啊，唔怕戴㗎其實，最緊要除得快！
 
搞到我有陣時都會諗，呀詩係咪都會⋯⋯有其他男仔呢？
 
尤其是大學咁花花世界，係hall又可以咁精彩，上其他堂啊、上莊又可以識到其他男仔，俾人撩都唔少啦。
 
曾經我都有懷疑，但係佢嘅表現無咩可疑，所以我想知嘅，佢都會一五一十咁話俾我知，呢種猜疑心先係最可怕⋯⋯
 
因為你連細節位都可以猜忌。
 
我有一刻諗過呢啲係咪都係作嘅呢？下一秒我就駁返自己，如果連呢啲都要作故仔，都幾攰下，事前就已經諗掂個劇本，然後同我拍拖就好似一個表演咁，將個劇本演繹一次出嚟。
 
拍拖要拍拖到咁，真係幾可怕。




 
所以我選擇相信，既然選擇相信，就唔好又猜疑，我會信到底。
 
一係就做戲做成世吧。
 
我同呀詩咁就差唔多一齊第四年，橫跨咗中學同埋大學嘅開頭，雖然我係Asso仔。