《我的MK妹同桌》第二季: 95

原來我同呀詩不知不覺已經一齊咗2年幾3年，扣除返我哋之前分手嘅時間，大約2年到。
 
好似隨住畢業之後，就個個都向前衝咁，時間過得好快，仲好忙碌。
 
我係開學無幾耐，就搵到份part time，係賣電話卡嘅，專係賣俾啲菲傭啊，印傭，主要都係返禮拜六日，有底薪，賣到卡就有佣金，除咗要出去日曬雨淋之外，其實呢份part time幾好，全部都係靠手機whatsapp報到，自己都會出去行吓，又唔會chur你數。
 
禮拜一到五就上堂，但我太低估Asso嘅壓力，原來好辛苦，除咗啲嘢多之外，嚟呢到嘅人目的都係為咗想搏返U。
 
只不過，總有人係例外，咁啱我哋組就有一個⋯⋯
 




「我哋今晚幾點傾下份功課點做啊？」我想早啲搞掂呢一份功課佢，雖然大家係輪住present，我哋組嘅日子就係中間，但係其他份功課都堆曬係後面，唔早啲搞嘅話，之後就係忙到仆街。
 
「吓？但係我今晚唔得閒喎。」呢個組員叫阿Sam。
 
「你今晚幾點完啊？」Gigi都係呢組度，佢加入討論。
 
「我唔知㗎，應該都好夜㗎啦。」淨係睇文字都已經令我躁躁地底，一開始大多數都係選擇，忍。
 
「我哋之前已經約好曬時間啦喎，你依家先嚟話有嘢做？」姐係又要再約過時間，諗吓都覺得麻煩。
 




「我臨時有急事啊嘛，一唔係你哋傾住先囉，傾完再話我知。」佢咁樣講，我都唔知點好。
 
最怕就係之後同佢講返，佢又話呢樣嗰樣，頓時搞到躁躁地。
 
係我思索緊點好嘅時候，呀詩打電話嚟，見到佢打嚟，我煩躁嘅心情得到一點緩和。
 
「喂？強b，你一陣可唔可以嚟接我啊？」呀詩係電話裡頭問。
 
「吓？點解嘅？」我一頭霧水。
 




「我今日ReU啊，想你過嚟接我。」呀詩柔聲地問。
 
係喎，我都唔記得咗呀詩今日佢Re U添，佢之前有同我講過。
 
我再諗多層，我明點解呀詩叫我去接佢啦。
 
「好啊，係邊度啊？」
 
既然條撚樣都話有嘢做，咁就另外有約日子，雖然我都有私心，但咁啱得咁橋姐。