《我的MK妹同桌》第二季: 85

呀俊佢好似話走就走咁，之前都無聽佢提過自己會離開香港，突如其來嘅消息一開始又嚇咗我一跳。
 
之後大家真係四散嘅時候，先接受呢一個事實，真係開始體會到剩返嘅都係一啲真心然後又重要嘅朋友。
 
餐飯係歡樂下度過，其實係笑聲嘅背後，隱藏咗男人嘅情意，同埋對歲月嘅唏噓。
 
我哋幾個人一路送呀俊去機場，一路上我哋幾個都提唔起勁，反而係呀俊安慰返我哋。
 
「屌你哋，咪好似出殯咁樣得唔得啊？又唔係唔返嚟。」佢揹住一大袋行李，兩隻手仲有手提袋添。
 




「唉⋯⋯呢個就係呀俊嘅遺言啦。」蕃薯仔同我講。
 
唔知點解，發覺蕃薯仔份人越嚟越開朗，比以前多嘢講咗，以前佢好鬼無膽，又唔係點講嘢，依家識搞下笑。
 
唔知係咪子晴嘅力量呢？
 
係蕃薯仔隔離，佢拖住嘅係子晴，我都好耐無見過佢啦，自從放咗榜，佢話要重讀嘅時候，佢真係斷曬所有社交媒體，咩都唔玩，證明佢真係幾有決心。
 
「仆街啦你！過一排你哋開學識到新朋友就唔會記得我㗎啦。」
 




「點會啊，你咁撚俊！」我用開玩笑嘅方式嚟遮掩自己離別之愁。
 
人生第一次送朋友機。
 
我以為呢啲會係電影先會出現嘅情節，然後呀俊之前一路鍾意嘅女仔會追過嚟機場，同佢講我都會好唔捨得你啊⋯⋯之類，然後相擁，仲要一定要抱起個女仔揼揼圈。
 
「我都差唔多啦，咁⋯⋯」呀俊佢同屋企人整埋啲登機手續，見佢一袋二袋咁，我就百感交集。
 
我以為會好似啲漫畫咁，啲回憶會出返曬嚟，感性咁諗返起以前啲趣事啊，經歷咁。我想講，真係唔係咁，當我想咁樣回想返啲嘢嘅時候，佢就偏偏咩都無。
 




只得傷感，下一再見已經係好耐之後，大家都會有各自嘅新生活，我哋嘅時間軸，好難再重疊。
 
呀俊屋企人都好通氣，話：「你同啲朋友仔講聲掰掰啦⋯⋯」見呀俊媽咪好有禮貌咁同我哋，散發出一種高雅嘅氣質，呀俊真係好幸福。呀俊屋企人過去幫佢哋打理吓啲生活，已經叫我哋所有人覺得羨慕啦。
 
「姨姨啊，可唔可以幫我哋影張相啊？」子晴識趣地問。
 
最後就留低咗呢張相，我係笑得好牽強，打從心底開心唔到。
 
張相嘅我哋，痴得好埋，呢張係青春嘅寫照。
 
蕃薯仔帶頭攬一攬呀俊，然後我哋都一個個咁上去攬住佢，我都好用力咁攬實佢，我哋都唔撚理gay唔gay啦，換轉係平時，一定大聲鳩叫「好撚gay啊！！！！！」
 
「哇，你哋搞到我真係勁想喊⋯⋯」男人真係唔輕易留眼淚，喊得嘅，一定好大件事。
 
呀俊話口未完，就喊起上嚟。




 
「多謝你哋！」佢嗚咽咁講，我都差啲忍唔住，不過隔離嘅子晴就已經忍唔住，跟住喊埋一份。
 
我哋幾個人圍住咁樣，又攬又喊咁，都分唔清，都唔理旁人點睇我哋，可能覺得我哋誇張、戇居，但我好鍾意呢班朋友。
 
喺入去前，我哋將張卡送俾呀俊，係我哋手寫嘅祝福語，係一啲同呀俊熟嘅朋友一齊寫嘅，張卡都幾大張，呀俊收到嗰陣，個樣幾感動。
 
最後呀俊講咗句：「如果佢都有嚟就好啦⋯⋯」
 
「又唔係唔見。」牛佬意味深長咁講咗句，就目送呀俊入離境大堂。
 
呀俊好大力咁同我哋揮手，手上仲拎住我哋送俾佢嘅手寫卡。
 
直至係入面見唔到佢，我哋先放鬆曬落嚟。
 




「咁就走咗⋯⋯」屌，飛仔呢句嘅語氣真係講到好似佢死撚咗咁，俾佢整到笑到gap gap聲。
 
我哋係度講緊呀俊嘅嘢嗰陣，有個女仔氣喘喘咁走埋嚟。
 
「呀俊走咗啦？」佢頭髮凌亂，鬢角仲流緊啲汗。
 
「啱啱入咗去啦⋯⋯」蕃薯仔答佢。
 
我哋對呢個女仔並唔陌生，因為佢係隔離班嘅嘉盈，佢外表清純可愛，有著一個包包臉，笑起上嚟仲有個單邊嘅酒粒。
 
嘉盈聽到之後，個樣好失落，當堂個眼神望去入面，見唔到之後，個眼神就好似唔知飄去邊咁，好迷茫。