《我的MK妹同桌》第二季: 84

請呀詩食個甜水本來就應份嘅，見到佢開心返，無事就掂當，之後要氹返，就唔係咁容易嘅事了。
 
日子，又回復平淡，係人生呢一條直線上面，唔係好多樣嘢都會有個記憶點，大部分嘅時間都係無聊到淡無味。
 
呀詩又繼續返工啦，同時間又就快開學，中間嘅時間其實過得好快，短短嘅暑假，有史以嚟覺得好快就完咗咁。
 
而臨近開學，知道有啲朋友要離開香港，去其他地方讀書，有熟有唔熟，唔熟嗰啲就會大班咁約出嚟食個飯，比較熟嘅就會圍內幾個約出嚟食飯。
 
有個男仔同我哋都幾fd嘅，同我仲有蕃薯仔都fd，中學小息無聊嘅時候都會一齊圍埋吹水。
 




傾下打機、傾下囡、傾下頭先小測點樣，咩都傾一餐。
 
點知8月頭嘅時候同我哋講，佢要去加拿大到讀書，我聽到之後sad咗一嘢，因為始終未預料到佢會離開香港。
 
有個同子晴都幾fd嘅女仔都話要去英國，隔離班有人去台灣，有人去澳洲，返大陸嘅都有⋯⋯
 
有個仲走去西班牙添。
 
忽然間覺得好唏噓，認咗咁耐嘅fd，一齊係同一個班房3年嘅人，一畢業就四散，聽講入面有人拍緊拖，姐係之後都long d啦喎？
 




定會分手呢？真係唔知⋯⋯
 
我哋幾個男仔約出嚟食餐farewell飯，嗰個主角係笑得最開懷，屌佢老母，搞到我仲傷心咗一陣。
 
「你下次幾時返啊？」蕃薯仔問道，話時話，我都好耐無見過蕃薯仔，自從放咗榜之後就無再約出嚟。
 
「唔知㗎，我諗暑假先會返嚟，聖誕放得又短，返嚟機票又貴。」呢個男仔叫呀俊，係邊撚度俊，呢個名已經俾我哋笑咗好多年。
 
每個人身邊都有個朋友叫呀俊，通街都係，再大個啲，呢啲名就得返啲舊朋友先叫，你會用英名嚟掩蓋你自己叫呀俊嘅事實。
 




「哇，姐係一年先見你一次咋喎。」蕃薯仔數一數手指，其實咁樣計，計計吓，一個大學好快就完咁。
 
「你懵咗啊？我返嚟成兩個月，見好多次都得啦，你淨係想見我一次啊？？？」我哋幾個考完DSE之後，都有返下part time，唔再好似以前咁，就算出嚟食都要揀啲平少少嘅。
 
呢餐我哋食放題，話要臨走前食豪啲，食盡佢！
 
「屌你！話唔定你溝咗個鬼妹之後就唔返嚟呢，係嗰邊逍遙快活。」我講笑咁講。
 
「溝到實唔返㗎。」佢笑住咁答我，派下膠。
 
我哋幾個都係度笑，嘻嘻哈哈咁，男仔嘅快樂就係建基係屌嚟屌去，串嚟串去嘅基礎上。
 
「咁你幾時走啊？」在場除咗我、蕃薯仔、呀俊，仲有個男仔嘅，不過佢有一樣比較特別，就係佢好似會講自己嘢，但平時相處又無咩問題。
 
「我，過幾日就走啦。」呀俊咁快就走？真係出乎我意料之外。




 
「吓？咁快？！」我同蕃薯仔一齊講。
 
「要早啲過去執吓嘢，熟習吓環境啊嘛。」