［科幻有甜］《一場末日危機，令患上中二病的我變成救世者》18+: 第七十章：婚紗背後(下)

我被辛梓玲把聲音嚇到當堂呆住。
「妳唔係辛梓玲，妳究竟係邊個？」說話同時，我馬上捉緊對方隻手，正因為辛梓玲同我提過佢曾經被鬼上身嘅野，即使真實係比想像更恐怖，但為咗救佢，我已經唔理得咁多。
「有本事你咪殺咗我囉，就好似上次咁，嘿嘿........」辛梓玲望住我，雙眼突然變得好邪。
「妳係.......撒旦？」
「係又點？殺咗我囉........點呀，唔捨得郁手丫？咁我走㗎啦.........」辛梓玲一邊講，一邊甩開我隻手，然後脫去身上面嘅婚紗，直至一絲不掛為止。
「放咗佢！妳隻惡魔到底想點？」

辛梓玲以佢手上嘅權杖喺沙灘上變咗一個結界出嚟，然後挺胸向我講：「記住.........唔想你個未婚妻同你個仔攬住一齊死嘅話，三日之內，交你條命仔俾我。」
天空開始入黑，我哋之間嘅對話亦就此結束。隨住一陣海風將婚紗從沙灘吹起，全身赤裸嘅辛梓玲以惡魔嘅姿態背向我踏入結界，整個身體逐漸消失於黑暗之中。此時此刻我渾身都感覺好痛，除咗心痛之外，啱先被喪屍爪傷過嘅地方亦開始中毒發炎。最奇怪嘅係，之前遇到嘅男人同喪屍跟辛梓玲一齊不知所蹤。



我識得嘅絕招，冇一樣係用嚟對付鬼上身，面對咁無助嘅情景，個腦即時一片空白，嗰一刻我甚至呆咗唔知點去反應，任由辛梓玲大模斯樣咁離開。
「你冇說話好講啦，彌賽亞！」就喺呢個時候，我背後忽然傳嚟另一把熟識嘅聲音。
我立刻回頭一望，發現位於日落餘暉嘅遠處企咗彼得、菲臘同蘿莉三個人，從聲音得知，剛剛說話嘅人應該就係彼得。
「你哋三個點解會喺度？」其實我一直只關心辛梓玲嘅安危，對於彼得嘅質問，根本完全聽唔入耳，但為咗敷衍彼得，我隨便問咗一句。
「你梗係想我哋唔喺度啦，方便你串通撒旦。」點知彼得一答完，跟住同菲臘講：「菲臘，好明顯支權杖係阿當偷嘅，你依家相信佢就係嗰個內鬼啦！」
「我冇說話講。既然係咁，阿當就交由你處置。」菲臘嘅回答令我冷汗直冒。
「蘿莉，阿當出賣自己人，已經唔再係彌賽亞，立即將佢就地處決！」
「收到。」說話期間，蘿莉面上竟浮現住一副恐怖嘅神情。