［科幻有甜］《一場末日危機，令患上中二病的我變成救世者》18+: 第六十九章：婚紗背後(上)

為咗辛梓玲，我終於以海外專才嘅身份上對方家長屋企同佢父母見面。我明白到只要身邊有舊錢，傾婚事原來係冇想像中咁困難。由於辛梓玲因工作需要習慣周圍飛，佢出國嘅時間仲多過留港，所以佢父母一啲都冇懷疑過我哋點樣認識對方。就係咁，婚禮安排咗喺兩個月後。我知道如果再繼續做彌賽亞，變返做正常人嘅我一定唔會再享有以往嘅安樂日子。如今撒旦已死，地球末日尚未至，世界根本唔需要由超能力者去領導，為咗盡快過返正常人嘅生活，交捧係必須嘅，不過對於交個位俾彼得，我感到非常猶疑，希望之後一切平安，冇事發生。

過多兩個月我就會正式脫單，諗返起呢一年發生嘅事，令我嘗盡人生甜酸苦辣，先係我無辜被夏娃帶上太空並且經歷兩次死亡，然後我因為捲入潛伏者之間嘅叛變同戰爭而變成磨心，我媽更因此無辜慘死，雖然依家總算能夠同暗戀咗好耐嘅女同學結婚，但如果有得揀嘅話，我寧願咩都冇發生過。馬太形容得啱，內疚同仇恨正正係侵蝕彌賽亞力量嘅手段，自從成為彌賽亞之後，我內心一直都冇平靜過，就好似我媽被撒旦所殺嘅仇一直纏繞我內心，再加上我對我媽同夏娃所產生嘅內疚感，令我好抗拒自己嘅宿命。

今日，我同辛梓玲約埋攝影師去郊外拍攝婚紗相，穿起婚紗嘅辛梓玲顯得格外明艷照人。攝影師建議我哋去西貢，因為嗰度有原始風貌，加埋有最靚嘅海景，張相影出嚟構圖保證一定靚。我哋一班人坐車入西貢，喺萬宜水庫東壩落車，一路行一路搵，搵咗幾處海邊景，但都俾辛梓玲彈話唔靚，入到浪茄後，著住婚紗嘅辛梓玲開始感到不適，仲出現中暑嘅徵狀，我立即扶佢埋一邊然後坐低休息。坐咗一排，由於辛梓玲都仲係有啲唔妥，於是我向攝影師提議走回頭路坐車返市區，點知攝影師因為唔想成本超支，不斷遊說我休息完再繼續影落去，正當我哋爭論緊走定唔走嗰陣，原本坐嚮一邊休息緊嘅辛梓玲眾目睽睽之下突然平空消失！

我打辛梓玲電話但冇人聽。就喺呢個時間，四下無人嘅山頭野嶺突然出現多隻大狼狗，當中為首嘅黑色大狼狗喺上次有份跟蹤我同辛梓玲返屋企。知道佢哋嘅目標係辛梓玲後，我第一時間好驚，怕未婚妻會因為我而遭遇不測，我唔想再有任何人因為我而死，特別係我最重視嘅人。為咗唔想喺攝影師同佢助手面前展露超能力，我唯有用藉口打發佢哋先走，然後我用元氣手槍趕走一班野狗，再四周搵辛梓玲下落。

行下行下，嚮地上見到一啲屬於辛梓玲嘅飾物，雖然我沿途不斷呼喚對方，但冇人回應。當下我內心充斥住不詳嘅預感，精神蹦緊至極限，就咁樣行咗大概半小時去到大浪灣，接近黃昏嘅時候，終於俾我嚮一處空無一人嘅沙灘見到辛梓玲，我見到佢坐咗喺舊石上面，但神情非常古怪，身上嘅婚紗仲接近破損嘅程度，令我極度不安。
「梓玲.......係我！妳冇事嘛？」身處遠方嘅我高聲呼叫辛梓玲嘅名字。點知就喺呢個時候，嚮我身後三米範圍內突然出現多隻上次襲擊蘿莉嗰種喪屍！一班喪屍明顯以我為狩獵目標，我以敏捷嘅身手成功避開其中一隻嘅偷襲，點知下一秒上身立即被另一隻以利爪擊中，禮服亦被割開，當場掛彩。


「嘿嘿.......彌賽亞，我哋又見面啦！」嚮夕陽下嘅幽深草叢背後，一個身穿黑色教士袍同配戴倒十字架嘅男人忽然現身。
「你係.......邊個？我好似唔知邊度見過你？」
「你唔需要理我係邊個，只要知道今日係你死期就得啦！」

正當個男人想郁手殺我之際，我利用時空夾縫嘅能力避開佢，然後立即衝向辛梓玲所在嘅地方，目的係救對方離開。令我覺得奇怪嘅係，當我接近辛梓玲嘅時候，我發現佢手上突然多咗一支來歷不明嘅權杖。
「梓玲.......呢度好危險，快啲跟我一齊走！」我拖住辛梓玲隻手同佢講，點知佢面上卻報以一副陰森詭異嘅表情，我隨即感到不寒而慄。
「靚仔，你以為你放棄唔再做彌賽亞，自己可以置身事外嗎？哈哈.......哈哈.......」呢個時候，一直沉默無言嘅辛梓玲竟以另一把聲音向我說話！